គណបក្សប្រជាជនកម្ពុជាបានចងសម្ពន្ធភាពជាមួយគណបក្សនយោបាយចំនួន២៧ទៀត នៅថ្ងៃពុធនេះ ដែលលោក ហ៊ុន សែន ប្រធានគណបក្សកម្ពុជាអះអាងថា សម្ពន្ធភាពនេះធ្វើឡើងដើម្បីបង្កើតមិត្ត។
ក្នុងពិធីចុះហត្ថលេខាចងសម្ពន្ធភាពនៅវិមាន៧ មករា ដែលជាទីស្នាក់កណ្តាលគណបក្សប្រជាជនកម្ពុជា លោក ហ៊ុន សែន បានឆ្លើយតបនឹងសំណួររបស់អ្នកសារព័ត៌មានថា ការចងសម្ពន្ធភាពនេះ មិនមែនធ្វើឡើងដើម្បីទាញយកប្រជាប្រិយភាពសម្រាប់គណបក្សកាន់អំណាចនោះឡើយ។ លោកបន្ថែមថា គណបក្សប្រជាជនកម្ពុជាអាចដើរតែម្នាក់ឯងក៏បានដែរ ប៉ុន្តែអ្វីដែលឈានដល់ការចងសម្ពន្ធភាពនេះ គឺដើម្បីឆ្លើយតបនឹងបំណងប្រាថ្នារបស់គណបក្សនយោបាយទាំងនោះ និងដើម្បីបង្កើត«មិត្ត»។ អតីតនាយករដ្ឋមន្រ្តីរូបនេះបញ្ជាក់ថា គណបក្សចងសម្ពន្ធភាពទាំងអស់នេះ គឺជាដៃគូស្មើភាព និងស្មើសិទ្ធិ។
លោកថ្លែងថា៖ «គណបក្សប្រជាជននៅតែឯង វាក៏មិនលើស វាក៏មិនខ្វះ ប្រៀបធៀបជាមួយនឹងការចងសម្ពន្ធភាព។ ប៉ុន្តែអ្វីដែលល្អ គឺនៅត្រង់ថា គណបក្សប្រជាជនបានធ្វើលេខបូក នៅត្រង់ថា យើងបានបង្កើតមិត្ត ជាមួយនឹងបណ្តាគណបក្សនយោបាយដទៃទៀត ដើម្បីសហការទៅលើគោលដៅធំៗ ដែលជាផលប្រយោជន៍ អាយុជីវិតរបស់ជាតិ ហើយគណបក្សប្រជាជន មិនស្វះស្វែងធ្វើអនុត្តរភាព [ឬ] លេបគណបក្សដទៃនោះទេ»។
បើតាមលោក ហ៊ុន សែន កិច្ចសហប្រតិបត្តិការ និងចងសម្ពន្ធភាពនេះ គឺជាការអនុវត្តនយោបាយបង្រួបបង្រួមជាតិឱ្យកាន់តែរឹងមាំ។
លោក ហ៊ុន សែន បញ្ជាក់ថា៖ «កិច្ចសហប្រតិបត្តិការ និងសម្ពន្ធភាពរវាងបណ្តាគណបក្សនយោបាយនៅកម្ពុជា ដើម្បីជំរុញការអនុវត្តនយោបាយបង្រួបបង្រួមជាតិឱ្យកាន់តែរឹងមាំ ដើម្បីប្រមូលកម្លាំងសេ្នហាជាតិ ចូលរួមថែរក្សាសន្តិភាព ស្ថិរភាពនយោបាយ សំដៅធានាឱ្យភាពសុខសាន្ត និងការអភិវឌ្ឍប្រទេសរយៈពេលយូរអង្វែង»។
មូលហេតុដែលឈានដល់ការបង្កើតសម្ពន្ធភាពនេះ ផ្តើមចេញពីគំនិតផ្តួចផ្តើមរបស់គណបក្ស១៨ រហូតដល់មានការចុះហត្ថលេខារវាងគណបក្សចំនួន២៨ នាពេលនេះ។ នេះបើតាមលោក ហ៊ុន សែន។
គណបក្សដែលចងសម្ពន្ធជាមួយគណបក្សកាន់អំណាច មានដូចជាគណបក្សខ្មែររួបរួមជាតិ គណបក្សសំបុកឃ្មុំសង្គមប្រជាធិបតេយ្យ គណបក្សយុវជនកម្ពុជា គណបក្សស្រ្តីដើម្បីស្រ្តី គណបក្សសញ្ជាតិខ្មែរ គណបក្សធម្មាធិបតេយ្យ គណបក្សខ្មែរតែមួយ គណបក្សខ្មែរក្រោក គណបក្សខ្មែរសាធារណរដ្ឋ និងគណបក្សម៉ូលីណាកា ជាដើម។
បើតាមកិច្ចព្រមព្រៀងសហប្រតិបត្តិការ និងសម្ពន្ធរវាងបណ្តាគណបក្សនយោបាយនៅកម្ពុជា ដែលមានចុះហត្ថលេខារបស់ប្រធានគណបក្សទាំង២៨ គណបក្សទាំងអស់បានព្រមព្រៀងគ្នាចំនួន ៨ចំណុច ដោយក្នុងនោះ រួមមានការពង្រឹងកិច្ចសហប្រតិបត្តិការល្អជាមួយគ្នា ដោយស្មើភាព ស្មើសិទ្ធិ គោរពនូវឯករាជ្យ និងស្វ័យភាពរបស់គណបក្សនីមួយៗ ការប្តេជ្ញាគោរពប្រតិបត្តិ និងការពាររដ្ឋធម្មនុញ្ញកម្ពុជា និងការពាររបបរាជានិយម និងការលើកកម្ពស់លទ្ធិប្រជាធិបតេយ្យ សេរីពហុបក្ស ធានាសិទ្ធិមនុស្ស ការគោរពច្បាប់ យុត្តិធម៌សង្គម និងពង្រឹងក្រុមសាមគ្គីជាតិ ការប្តេជ្ញាការពារឯករាជ្យ អធិបតេយ្យ និងបូរណភាពទឹកដីកម្ពុជាឱ្យបានគង់វង្ស និងការពារសន្តិភាព ស្ថិរភាពនយោបាយ និងសណ្តាប់ធ្នាប់សង្គម ដើម្បីធានាដល់ការអភិវឌ្ឍសេដ្ឋកិច្ចសង្គម ដោយចីរភាព និងលើកកម្ពស់ជីវភាពរស់នៅរបស់ប្រជាជនទាំងមូល។
ក្រៅពីនោះ គណបក្សទាំង២៨ សម្រេចថាសហការគ្នា ដើម្បីទប់ស្កាត់ និងកម្ចាត់នយោបាយជ្រុលនិយម ប្រឆាំងដាច់ខាតចំពោះឧបាកល និងសកម្មភាព ដែលព្យាយាមបំផ្លាញឯកភាពជាតិ បង្កអស្ថិរភាពក្នុងសង្គម បំផ្លាញលទ្ធិប្រជាធិបតេយ្យ ប៉ុនប៉ងធ្វើឱ្យមានការផ្លាស់ប្តូរណាមួយដែលផ្ទុយពីរដ្ឋធម្មនុញ្ញ និងច្បាប់ជាធរមាន និងប្តេជ្ញាមិនធ្វើការប្រឆាំងរវាងគណបក្សចងសម្ពន្ធដោយប្រការណាមួយ រួមទាំងការមិនធ្វើការឃោសនាប្រឆាំងគ្នាក្នុងយុទ្ធនាការបោះឆ្នោត និងមិនធ្វើសម្ពន្ធភាពជាមួយគណបក្សនយោបាយ ឬក្រុមនយោបាយណា ដែលប្រឆាំងនឹងសម្ពន្ធភាពរបស់ខ្លួន។
បន្ថែមពីនេះ លោក ហ៊ុន សែន បញ្ជាក់ថាគណបក្សទាំងអស់នឹងកសាង និងពង្រឹងទំនាក់ទំនងសហប្រតិបត្តិការ តាមខ្លឹមសារនៃកិច្ចព្រមព្រៀងនេះ ហើយ«ក្នុងករណីមានបញ្ហាចោទឡើង ត្រូវចាត់តាំងតំណាងឱ្យជួបពិភាក្សា រួមគ្នាដោះស្រាយដោយសន្តិវិធី» និងបើកទូលាយសម្រាប់គណបក្សនយោបាយស្របច្បាប់ផ្សេងទៀត ដែលគាំទ្រ និងមានបំណងចង់ចូលរួមសហប្រតិបត្តិការក្នុងសម្ពន្ធភាពនេះ។
លោក ពេជ្រ ស្រស់ ប្រធានគណបក្សយុវជនកម្ពុជា ប្រាប់វីអូអេថា កាលពីកន្លងទៅ អ្នកនយោបាយ និងអ្នកគាំទ្រនយោបាយទាំងថ្នាក់ជាតិ និងថ្នាក់ក្រោមជាតិ តែងតែមើលមុខគ្នាមិនត្រូវ ដូច្នេះលោកថាការចងសម្ពន្ធភាពនេះ ដើម្បីបញ្ចៀសការរើសអើងគ្នា។
លោកថ្លែងថា៖ «នយោបាយធ្វើដើម្បីបម្រើជាតិ និងបម្រើប្រជាជនតែប៉ុណ្ណោះ មិនមែនធ្វើស៊ីសាច់ ហុតឈាម សម្លាប់ភាគីខ្មែរណាមួយទេ។ អ៊ីចឹងយើងត្រូវរួមគ្នា ធ្វើយ៉ាងណា ដើម្បីឱ្យខ្មែររួបរួមគ្នា ហើយយើងបម្រើជាតិទាំងអស់គ្នា។ ហើយគណបក្សណាមានសមត្ថភាពដឹកនាំបានល្អជាង ប្រជាពលរដ្ឋ គាត់មើលឃើញ គាត់បោះឱ្យហើយ។ វាមិនមែនបាត់បង់ការគាំទ្រដោយសារ សម្ពន្ធភាពហ្នឹងទេ ព្រោះសម្ពន្ធភាពនេះ មិនមែនមានតែខ្មែរទេចង នៅថៃក៏ចងដែរ»។
គណបក្សហ៊្វុនស៊ិនប៉ិចដែលមាន៥អាសនៈក្នុងរដ្ឋសភា មិនបានចូលរួមក្នុងសម្ពន្ធភាពនេះឡើយ។
ការចងសម្ពន្ធរបស់គណបក្សទាំង២៨នេះ ធ្វើឡើងក្រោយពេលគណបក្សប្រឆាំងចំនួន៤ ក្នុងនោះមានគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា បានចងសម្ពន្ធភាព ដើម្បីត្រៀមកម្លាំង ក្នុងការចូលរួមប្រកួតប្រជែងការបោះឆ្នោតនានា ជាមួយគណបក្សកាន់អំណាច ទាំងការបោះឆ្នោតព្រឹទ្ធសភា និងបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ នាឆ្នាំ២០២៤ និងការបោះឆ្នោតថ្នាក់ជាតិអាណត្តិទី៨។
លោក សុក ហាច អនុប្រធានគណបក្សភ្លើងទៀន ធ្លាប់បានថ្លែងថា ការចងសម្ពន្ធនេះ ក៏ដោយសារតែគណបក្សទាំងអស់ធ្លាប់ទទួលបានមេរៀនពីការបោះឆ្នោតជ្រើសតំាងតំណាងរាស្ត្រដែលគណបក្សភ្លើងទៀនមិនអាចចូលរួមការបោះឆ្នោត។
លោកបន្ថែមថា ការចងសម្ពន្ធនេះ ក៏ជួយកុំឱ្យកើតឡើង នូវបញ្ហាចាស់សាជាថ្មីផងដែរ ដូចជាអវត្តមានគណបក្សប្រឆាំង ក្នុងការចូលរួមការបោះឆ្នោតថ្នាក់ជាតិនាឆ្នាំ២០២៣នេះជាដើម។
អ្នកវិភាគនយោបាយ លោក សេង សារី យល់ថា វិវឌ្ឍនយោបាយបែបនេះបានបង្កលក្ខណៈល្អប្រសើរសម្រាប់នយោបាយកម្ពុជា ដែលធ្វើឱ្យប្រជាពលរដ្ឋ ឃើញប៉ូល២ ដែលងាយស្រួលក្នុងការសម្រេចចិត្តបោះឆ្នោតជ្រើសរើសគណបក្សដែលខ្លួនពេញចិត្ត។
លោកប្រាប់វីអូអេថា៖ «សម្រាប់ខ្ញុំ ខ្ញុំមើលឃើញថាវាល្អសម្រាប់នយោបាយកម្ពុជា វាល្អសម្រាប់សង្វៀននយោបាយ សង្វៀននៃការប្រកួតប្រជែងនយោបាយកម្ពុជាទៅអាណត្តិក្រោយៗទៀត»។
លោកបន្ថែមថា៖ «ជាការសន្និដ្ឋានរបស់ខ្ញុំ ខ្ញុំមើលឃើញថា ហាក់ដូចជាយុទ្ធសាស្ត្រ ខោកក្បាលអង្អែលខ្នងគណបក្សភ្លើងទៀន ខណៈដែលកន្លងមក គឺគណបក្សភ្លើងទៀន មិនមានឱកាសចូលរួមការបោះឆ្នោត មេដឹកនាំរបស់ចលនាប្រជាធិបតេយ្យ ដែលយើងស្គាល់ថាជាលោក សម រង្ស៊ី មិនអាចចូលស្រុកបាន។ អ៊ីចឹងហើយខ្ញុំមើលទៅមានន័យថាដូចជា ចាត់ការក្បាលម៉ាស៊ីនអ្នកប្រជាធិបតេយ្យ ក៏ប៉ុន្តែហាក់បីដូចជាធ្វើខ្លាចចលនាប្រជាធិបតេយ្យដែលកំពុងតែរួមគ្នានេះ»។
គួរបញ្ជាក់ថាក្រោយការចងសម្ពន្ធភាពរួចរាល់ គណបក្សភ្លើងទៀនបានប្រកាសថានឹងចូលរួមការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ និងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ ដែលនឹងជ្រើសរើសយកគណបក្សមួយ ដែលបានចងសម្ពន្ធភាពទៅប្រកួតប្រជែង។
លោក ហ៊ុន សែន នៅថ្ងៃពុធនេះ ក៏បានថ្លែងថា គណបក្ស៤រួមមានគណបក្សភ្លើងទៀន ដែលចងសម្ពន្ធនាពេលថ្មីនេះ ពិតជាបានសម្រេចគោលដៅរបស់ពួកគេសម្រាប់ការបោះឆ្នោតព្រឹទ្ធសភា ដែលនឹងធ្វើឡើងនៅថ្ងៃទី២៥ ខែកុម្ភៈ ឆ្នាំ២០២៤៕
