ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

លោក ហ៊ុន សែន ថា លោក​ប្រើថ្នាំ​បុរាណ​ចិន​«ការពារបន្ថែម» ទោះ​មន្ត្រី​សុខាភិបាល​ប្រាប់​ពលរដ្ឋ​ឱ្យ​ជៀសវាង​ការប្រើប្រាស់​ដែល​មិន​ចាំបាច់


រូបឯកសារ៖ លោក​នាយក​រដ្ឋមន្ត្រី​ ហ៊ុន សែន​ មក​ទទួល​​ការ​ចាក់​​វ៉ាក់សាំង​បង្ការ​ជំងឺ​កូវីដ១៩​​ របស់​ក្រុមហ៊ុន​ AstraZeneca​ ដែល​បាន​ទទួល​ស្គាល់​ដោយ​អង្គការ​​សុខភាព​ពិភពលោក (WHO)​ នៅ​មន្ទីរពេទ្យ​កាល់ម៉ែត្រ​​ ភ្នំពេញ​ ថ្ងៃទី៤​ ខែមីនា​ ឆ្នាំ២០២១។ (ខាន់​ សុគុំមនោ​/​វីអូអេ)

លោក​នាយក​រដ្ឋ​មន្ត្រី ហ៊ុន សែន បាន​និយាយ​នៅ​ថ្ងៃ​ព្រហស្បតិ៍​នេះ​ថា លោក​ប្រើ​ប្រាស់​ផលិត​ផល​ឱសថ​បុរាណ​ចិនមួយ​ប្រភេទ​ ដើម្បី​«ការ​ពារ»​ខ្លួន ​ទោះ​មន្ត្រីក្រសួង​សុខាភិបាល​ធ្លាប់​បាន​ព្រមាន​មិន​ឲ្យ​សាធារណជន​អំពីការ​ប្រើប្រាស់​ឱសថ​នានា​បង្ការ​ជំងឺ​កូវីដ​១៩ក៏​ដោយ។

ថ្លែង​ក្នុង​សុន្ទរកថា​ទៅ​កាន់​ប្រជាជាតិអំពី​ស្ថានភាព​កូវីដ១៩​នៅ​កម្ពុជា​ លោក​ ហ៊ុន សែន​ ដែលកំពុង​ធ្វើ​ចត្តា​ឡីស័ក​ថ្ងៃទី១៣ ​នៅ​ភូមិគ្រឹះ​របស់​លោក ក្នុង​ក្រុង​តាខ្មៅ ​ខេត្ត​កណ្ដាល ​បាននិយាយ​ថា​ លោក​បាន​ប្រើប្រាស់​ឱសថ​ប្រភេទ​ថ្នាំ​គ្រាប់ Lianhua Qingwen នាពេលកន្លង​មក។

អំឡុង​ពេលនិយាយ​ពី​វិធានការ​នានា​ដែល​បាន​ដាក់​ចេញ ​ក្នុង​ការ​ទប់​ស្កាត់​កូវីដ១៩ ​លោក ​ហ៊ុន សែន ​បាន​និយាយ​អំ​ពី​ការ​ប្រើ​ប្រាស់​ថ្នាំ​ព្យាបាលថា៖​

«កន្លង​ទៅ​នេះ ខិតខំ​រក ហើយ​កន្លង​ទៅ​ក៏​បាន​រក​ឃើញ​ហើយ​ ថ្នាំ ​រក​ឃើញ​ហើយ​ ថ្នាំ ​ដែល​សូម្បីតែ​នៅ​ឌូបៃ អារ៉ាប់​អេមី​រ៉ាត់ និង​នៅ​មជ្ឈឹមបូព៌ា ​គេ​ប្រើថ្នាំ​របស់​ចិន​ហ្នឹង​តែម្ដង ​ដែល​លេប​រាល់​ថ្ងៃ។ ខ្ញុំ​ក៏​លេប​ដែរ ហើយ​ខ្ញុំ​មាន​ថ្នាំ​ចិន មុន​នឹង​ចេញ​ដំណើរ​ទៅ​ណា ត្រូវ​លេប​ថ្នាំ​ហ្នឹង ទោះ​បី​មិន​ឈឺក៏​ដោយ ត្រូវ​តែ​លេប​ការពារ​បន្ថែម​»។

​កាល​ពី​សប្ដាហ៍​មុន មន្ត្រី​ជាន់​ខ្ពស់​ក្រសួងសុខា​ភិបាលធ្លាប់​បាន​ព្រមាន​ពី​ការ​ប្រើប្រាស់​ឱសថ​ក្រៅ​វេជ្ជបញ្ជា​ព្យាបាល ​ចំពោះ​មហាជន​ដែល​ចង់បង្ការ​ខ្លួន​ពី​ជំងឺ​កូវីដ១៩។

វេជ្ជបណ្ឌិត​ ឱ វណ្ណឌីន​ រដ្ឋលេខាធិការ​ក្រសួង​សុខាភិបាល ​បាន​ថ្លែង​កាល​ពី​ថ្ងៃទី២៤ ​ខែមិថុនា ​នៅ​ក្នុងពិធី​មួយ​ថា ​តាម​ទិន្នន័យ​ស្រាវជ្រាវ​របស់​អ្នក​ជំនាញ​ជាតិ​និង​អន្តរជាតិ​ មិន​ទាន់​មាន​ឱសថ​ណាអាច​ត្រូវ​បាន​ប្រើ​ប្រាស់​ដើម្បី​«ការពារ»​មនុស្ស​ពី​ជំងឺ​កូវីដ១៩ ក្រៅ​តែ​ពីថ្នាំ​ចាក់​បង្ការ​ ឬ​វ៉ាក់​សាំង​នោះ​ឡើយ។

«ក្រៅ​តែ​ពី​វ៉ាក់សាំង ​គឺ​មិន​ទាន់​មាន​ឱសថ​ណា ដែល​បាន​បញ្ជាក់​ថា​ ជា​ឱសថ​សម្រាប់​ការពារជំងឺ​កូវីដ​១៩​ទេ អ៊ីចឹង​សូម​បង​ប្អូន​កុំ​ផ្អើល»។

អ្នកស្រី​ ឱ វណ្ណឌីន ដែល​ជា​អ្នកនាំពាក្យ​ក្រសួង​ផង​នោះ​បាន​បន្ថែម​ថា៖

«ហើយ​សួរ​ថា​បើ​យើង​ទៅ​ទិញ​ថ្នាំ​មក ថ្នាំ​ហ្នឹង​លេប​ទៅ វា​អត់​ការពារ​យើង​បាន​ទេ ហើយ​បែរ​ទៅ​ជាថ្នាំ​នោះ វា​នឹង​អាច​ធ្វើឱ្យ​ប៉ះពាល់​ដល់​សុខភាព​យើង​ទៅវិញ​ទេ ដោយ​សារ​តែយើង​មិន​ដឹង​ថា ​ខ្លួនយើង​នោះឈឺ​កូវីដ​មែន ​ឬ​មិន​មែន​ នែស៎ ចាស៎»។

មន្ត្រី​រូប​នេះ​បាន​បន្ត​ថា៖ «មិន​មែន​យើង​ភ័យ​ឆ្លង​ ហើយ​មិន​អនុវត្ត​វិធាន​ការ​ការពារ តែ​យើង​បែរ​ជា​ទៅ​ទិញ​ថ្នាំ​យក​មកការ​ពារ​ខ្លួន! សួរ​ថា​ការ​ពារ​បាន​ទេ? អត់​បាន​ទេ។ ថ្នាំ​ដែល​បង​ប្អូន​ទិញ​យក​មក​ហ្នឹង ខ្ញុំ​សូម​បញ្ជាក់ជូន មិន​មែន​ជា​ថ្នាំ​សម្រាប់​ការពារ​ទេ ការពារ​អត់​បាន​ទេ។ បង​ប្អូន​លេប​ទៅ លេប​ទៅ ដល់​តែ​បងប្អូន​ចប់​ពី​លេប​ថ្នាំ ពី​ព្រោះ​ថ្នាំ​នេះ​ មិន​អាច​លេប​ជាប់​មួយ​ខែ​ ពីរ​ខែ ​បី​ខែ​នោះ​ទេ ចាស៎ វា​មាន​កម្រិត​នៃ​ការ​ប្រើ​ប្រាស់​របស់​វា»។

ការ​ថ្លែង​កាល​ពី​ថ្ងៃទី២៤ ​ខែ​មិថុនា​ ឆ្នាំ​២០២១​ របស់​អ្នកស្រី​ ឱ វណ្ណឌីន ​នៅ​ទីស្ដីការ​ក្រសួង​សុខាភិបាល ត្រូវ​បាន​ធ្វើឡើង​ចំ​ពេល​មាន​ការ​លក់​ចែក​ចាយ​ឱសថ​បុរាណ​ចិន​ប្រភេទ​ថ្នាំ​គ្រាប់ Lianhua Qingwen នៅ​តាម​ឱសថ​ស្ថាន ​និង​លើ​បណ្ដាញ​សង្គម ដែល​នាំ​ឱ្យ​ក្រសួង​សុខាភិបាលឈាន​ដល់​ចេញ​សេចក្ដី​ជូនដំណឹង​ព្រមាន​ថែម​ទៀត​ផង នៅ​ថ្ងៃទី២៦ ​ខែមិថុនា ​កន្លង​ទៅ។

វីអូអេ​មិន​ទាន់​អាច​ទាក់​ទង​អ្នកស្រី​ ឱ វណ្ណឌីន ដើម្បី​សុំការ​បំភ្លឺ​បន្ថែម​នៅ​ឡើយ គិតត្រឹមល្ងាច​ថ្ងៃព្រហស្បតិ៍​នេះ ដោយ​ការ​ហៅ​ទូរស័ព្ទ​ទៅ​កាន់​លេខ​របស់អ្នកស្រី​ ត្រូវ​បាន​ចុច​បិទ។

លោក ​ផៃ ស៊ីផាន​ អ្នកនាំពាក្យ​រដ្ឋាភិបាល​ ក៏មិនទាន់​អាច​ទាក់ទង​សុំបាននៅ​ឡើយដែរ ​នាថ្ងៃ​ព្រហស្បតិ៍​នេះ។​

បណ្ឌិត​ សេក សុជាតិ ​នាយកប្រតិបត្តិនៃអង្គការអភិវឌ្ឍន៍ផ្នត់គំនិត​ បានចោទសួរអំពីការ​បញ្ជូន​សារផ្សេងគ្នា​របស់មន្ត្រី​រដ្ឋាភិបាល​ ដែលអាចនាំឱ្យមហាជនមាន​ការពិភាល់យល់ច្រឡំ និង​បង្កើត​បញ្ហាប្រឈម«ធំធេង​ណាស់»ដល់​ការប្រយុទ្ធ​ប្រឆាំង​នឹង​កូវីដ និង​បញ្ហា​សុខភាព​សាធារណៈ។

បណ្ឌិត​ សេក សុជាតិថ្លែងថា៖ «ហើយ​ជា​ទូទៅ ថ្នាក់ដឹកនាំ​ជាន់ខ្ពស់​ដែល​ជាប្រមុខ​រាជរដ្ឋាភិបាល ក៏ដូច​ជា​ថ្នាក់​ដឹក​នាំ​នៅក្នុង​វិស័យ​ជំនាញ ជា​ពិសេស​នៅ​ក្នុង​ក្រសួង​សុខាភិបាល គួរ​តែ​មាន​សំឡេង​តែ​មួយ ពី​ព្រោះ​អី សំឡេង​តែ​មួយ​របស់​ពួកគា​ត់ ធ្វើ​ឱ្យ​កម្ពុជា​មាន​ទំនុក​ចិត្ត ការ​ជឿជាក់​គ្នា ហើយ​ដឹង​ច្បាស់​អំពី​ហានិភ័យ​អំពី​អ្វីដែលពួក​គាត់​កំពុង​ប្រយុទ្ធ​ប្រឆាំង វា​មាន​ស្ថាន​ភាព​ ឬ​ហានិភ័យ​កម្រិត​ណា»។

បណ្ឌិត ​សេក សុជាតិ ​បាន​បន្ថែម​ថា៖ «តែ​បើ​ពួកគាត់​មាន​ភាព​ស្រពេច​ស្រពិល ឬ​ប្រទាំង​ប្រទើស​គ្នា​ដូច​សព្វ​ថ្ងៃ ​ក្រសួង​និយាយ​ផ្សេង ​រាជ​រដ្ឋាភិបាល​និយាយ​ផ្សេង វា​ហាក់​ដូច​ជា​ពួក​គាត់ មាន​តែ​រចនា​សម្ព័ន្ធ តែ​ពួក​គាត់​អត់​បាន​ធ្វើការជា​មួយ​គ្នា​ទេ»។

អ្នកតាម​ដានបញ្ហា​សង្គមរូបនេះ បាន​លើក​ទឹកចិត្តឱ្យមាន​ ការត្រួតពិនិត្យ គ្រប់គ្រងព្យាបាល​ ការ​រាល​ដា​ល​ជំងឺ​កូវីដ​១៩ ដោយមានការ​ពិគ្រោះបច្ចេកទេសឱ្យ​បានដិតដល់ជាមួយនឹងអង្គការសុខភាព​ពិភព​លោក​ស្របតាមនិយាមវិទ្យាសាស្ត្រ​អន្តរជាតិ។

លោក​នាយករដ្ឋមន្ត្រី​ ហ៊ុន សែន​ មាន​អាយុ៦៨ឆ្នាំ និង​បាន​ទទួល​ថ្នាំ​ចាក់​បង្ការ​ជំងឺ​កូវីដ១៩ ​ប្រភេទ AZD1222 ផលិត​ដោយ​ក្រុមហ៊ុន AstraZeneca និង​វិទ្យាស្ថាន ​Serum ដោយ​ចាក់ដូស​ទី១ នៅ​ថ្ងៃទី៤ ខែមីនា​ និង​ដូសទី២ នៅ​ថ្ងៃទី២០​ ខែមេសា។

កាល​ពី​ពេល​ថ្មីៗ​នេះ ​វេជ្ជបណ្ឌិត​ ម៉ម ប៊ុនហេង​ រដ្ឋមន្ត្រី​ក្រសួង​សុខាភិបាល ​ត្រូវ​បាន​កាសែតក្នុង​ស្រុក​ដកស្រង់​សម្ដី ដែល​លោក​បញ្ជាក់​អំពី​អត្រា​ជា​សះស្បើយ​ខ្ពស់​នា​ពេល​ថ្មីៗ​នេះ ក្នុងចំណោម​អ្នក​ជំងឺ​កូវីដ១៩ ​ដែល​កំពុង​សម្រាក​ព្យាបាលថា ​មក​ពី​ការ​ប្រើប្រាស់​ឱសថ​បុរាណ​ចិន Lianhua Qingwen នេះ​ផ្ទាល់​តែ​ម្ដង។

ឱសថ​ប្រភេទ​ថ្នាំគ្រាប់ Lianhua Qingwen ត្រូវ​បាន​ផលិត ​និង​ចែកចាយ​ដោយ​សហគ្រាសឱសថ Yiling Pharmaceutical ដែល​មាន​មូលដ្ឋាន​នៅ​ខេត្ត Hebei ប្រទេស​ចិន និង​ធ្លាប់​ត្រូវ​បានប្រើប្រាស់​ក្នុង​ការ​ប្រយុទ្ធ​ប្រឆាំង​នឹង​ជំងឺ​រលាក​ផ្លូវ​ដង្ហើម​ស្រួច​ស្រាល​ ឬ ​SARS ​កាល​ពីឆ្នាំ២០០៣។

តាម​គេហទំព័រ​ផ្លូវការ​របស់​ក្រុមហ៊ុន ថ្នាំ​នេះ​ត្រូវ​បាន​តម្រូវ​ឱ្យ​ប្រើប្រាស់​ក្នុង​ការ​លាង​សម្អាត​សួត បញ្ចុះ​កម្ដៅ ជា​ពិសេស​ក្នុង​រោគ​ផ្ដាសាយ​ធំ ហើយ​ត្រូវ​លេប​បីពេល​ក្នុង​មួយ​ថ្ងៃ និង​មួយ​ពេល​៤​គ្រាប់។ ក្នុង​ករណី​លេប​បីថ្ងៃ​ហើយ​មិន​ធូរ​ស្រាល អ្នក​លេប​ត្រូវ​ទៅ​មន្ទីរពេទ្យ​ព្យាបាល។

ប្រភពពី​គេហទំព័រ​ក្រុមហ៊ុន​ផលិតក៏​បាន​បន្ថែម​ដែរ​ថា អ្នក​ដែល​មាន​ជំងឺ​បេះដូង ក្រលៀន និង​ជំងឺ​រ៉ាំរ៉ៃ​ផ្សេង​ទៀត មិន​ត្រូវ​បាន​អនុញ្ញាត​ឱ្យ​ប្រើប្រាស់​ថ្នាំ​នេះ​នោះ​ទេ បើសិន​ជា​មិន​មាន​ការ​ពិគ្រោះ និង​ចេញ​វេជ្ជបញ្ជា​ពី​គ្រូពេទ្យ។

ក្រសួង​សុខាភិបាល​បានចេញ​លិខិត​អនុញ្ញាត​ឱ្យ​ប្រើប្រាស់​ឱសថ Lianhua Qingwen នេះ​នៅក្នុង​ប្រទេស​កម្ពុជា ​ចាប់ពីថ្ងៃទី២៧ ខែមេសា​មក គឺ​បួនថ្ងៃ​មុន​ពេល​រដ្ឋាភិបាល​ចិន​ បាន​ប្រគល់ឱសថ​នេះ​ចំនួន​៨៨.០០០​ប្រអប់ ជា​ជំនួយ​ដល់​ក្រសួង​សុខាភិបាល ​កាល​ដើម​ខែ​ឧសភា។

ក្រុមហ៊ុន ​Dynamic Pharma​ របស់​កម្ពុជា​ដែល​បាន​អះអាង​ថា ​ខ្លួន​ជា​តំណាង​ចែក​ចាយ​ផ្ដាច់​មុខនៃ​ឱសថ​បុរាណ​ចិន​ខាង​លើនេះ​ ក៏​បាន​ប្រគល់​ឱសថ​នេះ​ចំនួន​៥ម៉ឺន​ប្រអប់​បន្ថែម ដល់ក្រុម​គ្រូ​ពេទ្យ​ស្ម័គ្រចិត្ត​សម្ដេច​តេជោ ​TYDA​ ដែល​ដឹក​នាំ​ដោយ​កូនប្រុស​ និង​កូនប្រសា​រលោក ហ៊ុន សែន​ ផង​ដែរ កាល​ពីថ្ងៃទី២២ ខែមិថុនា កន្លង​ទៅ។

ក្នុង​សុន្ទរកថា​កាលពីព្រឹកថ្ងៃ​ព្រហស្បតិ៍​ដដែល ​លោក ​ហ៊ុន សែន ក៏​បាន​បញ្ជា​ឱ្យ​ក្រសួង​សុខា​ភិបាល ​ទិញ​ឱសថ Lianhua Qingwen នេះ​បន្ថែម​ផង​ដែរ ដើម្បី​ប្រើ​ប្រាស់​ជា​បន្សែ​បន្សំ​ក្នុង​ចំណោមថ្នាំនានា​ ដែល​បើក​ជូន​អ្នក​ជំងឺ​កូវីដ១៩​ នៅ​មណ្ឌល​សម្រាក​ព្យាបាល​នានា៕

XS
SM
MD
LG