ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ​ហ៊ុន សែន​ បដិសេធ​មិន​អត្ថាធិប្បាយ​លម្អិត​អំពី​ការ​ជំរុញ​ឲ្យ​គោរព​សិទ្ធិ​មនុស្ស​ពី​សំណាក់​សហ​រដ្ឋ​អាមេរិក


ប្រធានាធិបតី​សហរដ្ឋ​អាមេរិក​លោក Joe Biden និង​នាយករដ្ឋមន្ត្រីកម្ពុជា​លោក ហ៊ុន សែន ចូលរួ​ម​ក្នុង​កិច្ចប្រជុំ​កំពូល​អាស៊ាន​​-សហរដ្ឋ​អាមេរិក នៅ​ក្នុង​អំឡុងពេល​នៃ​កិច្ចប្រជុំ​កំពូល​អាស៊ាន​នៅ​រាជធានី​ភ្នំពេញ ថ្ងៃទី ១២ ខែវិច្ឆិកា ឆ្នាំ២០២២។ ASEAN2022 Phnom Penh Media Center via REUTERS

​លោក​នាយក​រដ្ឋ​មន្ត្រី ​ហ៊ុន សែន ​កាល​ពី​ថ្ងៃ​អាទិត្យ ​បាន​បដិសេធ​មិន​ឆ្លើយ​តប​សំណួរ​អ្នក​សារ​ព័ត៌​មានមួយ​រូប​ ដែល​បា​ន​ចោទសួរ​ទាក់​ទង​សេច​ក្តី​ប្រកាស​ព័ត៌​មាន​របស់​សេតវិមាន​សហ​រដ្ឋ​អាមេរិក​ស្តីពី​ជំនួប​របស់​លោក​ជាមួយ​ប្រធានាធិបតី​អាមេរិក ដែល​មាន​ការ​ជំរុញ​ឲ្យ​គោរព​សិទ្ធិ​មនុស្ស ​និងបើក​លម្ហ​សេរីភាព​ស៊ីវិល​ និង​នយោបាយ។​

កាលពី​ថ្ងៃ​ទី១៣ ​ខែ​វិច្ឆិកា លោក Joe Biden ​ប្រធានាធិបតី​សហ​រដ្ឋ​អាមេរិក​បាន​ជួប​ទ្វេភាគី​ជាមួយ​លោក​នាយក​រដ្ឋមន្ត្រី ​ហ៊ុន សែន ​នៅ​គ្រា​ដែល​លោក ​Biden​ បាន​មក​ចូលរួម​កិច្ច​ប្រជុំ​អាស៊ាន​ដែល​កម្ពុជា​ធ្វើ​ម្ចាស់​ផ្ទះ។ ​ក្រោយ​ពី​ជំនួប​នេះ ​សេតវិមាន​អាមេរិក​បានចេញ​សេចក្តី​ប្រកាស​ព័ត៌​មាន​មួយ ​ដោយ​បញ្ជាក់​ថា លោក​ Biden​ បាន​ជំរុញ​ឱ្យកម្ពុជា​ដោះ​លែង​សកម្ម​ជន ​ដែល​ត្រូវ​បាន​ឃុំ​ខ្លួន ​ក្នុង​នោះ​មាន​កញ្ញា​ សេង ធារី ​មេធាវី​សញ្ជាតិ​ខ្មែរ​អាមេរិកាំង​ ​និង​បើក​ចំហ​សេរី​ភាព​ស៊ីវិល ​និង​នយោបាយ​ នៅ​មុន​ការ​បោះ​ឆ្នោត​ឆ្នាំ​២០២៣​ខាង​មុខ។ ​លោក​ប្រធានាធិបតី​បាន​លើក​ឡើង​អំពី​ការ​ព្រួយ​បារម្ភ​ទាក់​ទង​នឹង​ស្ថានភាព​នៅ​មូលដ្ឋាន​កង​ទ័ព​ជើង​ទឹក​រាម ​និង​សង្កត់​ធ្ងន់​ពី​សារៈ​សំខាន់​នៃ​តម្លាភាព​ពេញ​លេញ​អំពី​សកម្ម​ភាព​របស់​យោធា​ចិន​នៅ​មូលដ្ឋាន​កងទ័ព​ជើង​ទឹករាម​ផង​ដែរ។ ​

​ក្នុង​សន្និសីទ​សារ​ព័ត៌មាន​នា​ថ្ងៃ​អាទិត្យ ​លោកនាយក​រដ្ឋ​មន្ត្រី ​ហ៊ុន សែន ​បាន​បដិសេធសំណួរ​របស់អ្នក​សារព័ត៌​មានម្នាក់​ដែល​សួរ​អំពី​ការ​ជំរុញ​ការ​បើក​លម្ហ​សេរីភាព​ស៊ីវិល​ និង​នយោបាយ​ពី​សំណាក់​ប្រធានាធិបតី​អាមេរិក។​

លោក Joe Biden ប្រធានាធិបតីសហរដ្ឋអាមេរិក និងលោក ហ៊ុន សែន នាយករដ្ឋមន្ត្រីកម្ពុជា ក្នុងជំនួបទ្វេភាគី ក្នុងអំឡុងកិច្ចប្រជុំកំពូលអាស៊ាន នៅរាជធានីភ្នំពេញ ថ្ងៃទី ១២ ខែវិច្ឆិកា ឆ្នាំ ២០២២។
លោក Joe Biden ប្រធានាធិបតីសហរដ្ឋអាមេរិក និងលោក ហ៊ុន សែន នាយករដ្ឋមន្ត្រីកម្ពុជា ក្នុងជំនួបទ្វេភាគី ក្នុងអំឡុងកិច្ចប្រជុំកំពូលអាស៊ាន នៅរាជធានីភ្នំពេញ ថ្ងៃទី ១២ ខែវិច្ឆិកា ឆ្នាំ ២០២២។

លោក ​ហ៊ុន សែន ​ប្រាប់​អ្នក​សារ​ព័ត៌មាន​ដែល​ចោទ​ជា​សំណួរ​ឱ្យទៅ​សួរ​សហ​រដ្ឋ​អាមេ​រិក​វិញ។​ លោក​បញ្ជាក់​ថា​ ក្នុង​ជំនួប​រវាង​លោក ​និង​លោកJoe Biden ​ប្រធានាធិបតី​អាមេរិក ភាគី​ទាំង​ពីរ​បាន​ពិភាក្សា​ជា​ទូទៅ​ ដែល​រួមមានការ​បោះ​ឆ្នោត​ថ្នាក់​ជាតិ​របស់​កម្ពុជា​នៅឆ្នាំ​ក្រោយជា​ដើម។ ​

​នៅ​ក្នុង​សន្និ​សីទ​សារ​ព័ត៌មាន​ស្ដីពី​លទ្ធ​ផល​នៃ​កិច្ច​ប្រជុំ​កំពូល​អាស៊ាន​លើក​ទី​៤០​ និង៤១ និង​កិច្ច​ប្រជុំ​កំពូល​ពាក់ព័ន្ធ ​លោក​នាយក​រដ្ឋមន្ត្រី ​ហ៊ុន សែន ​បាន​ប្រតិកម្មតប​ថា៖ ​«ទាក់​ទង​អាមេ​រិក​ប្រកាស​អី ​ អាហ្នឹង​ទៅ​សួរ​អាមេរិក​ខ្លួន​ឯ​ង​ទៅ! ​សួរ​អាមេរិក​ខ្លួន​ឯង​ទៅ!​ ខ្ញុំ​អត់​ឆ្លើយ​ទេ ​ ព្រោះ​ខ្ញុំ​អត់​ដឹង​ថា​ អាមេរិក​និយាយ​ពីអី​ផង​ ព្រោះ ​Joe Biden ​គាត់​អត់​និយាយ​អី​ជា​មួយ​ខ្ញុំ​ច្រើន​ទេ។ ...​ស្ថានទូត​អាមេរិក​មា​ន! ​សួរ​ទៅ!​ ​Email ​ទៅ!​ ​សួរ​អាមេរិក​ទៅ។ ​កុំមក​សួរ​ខ្ញុំ ​ព្រោះ​ខ្ញុំ​ដឹង​តែ​ធ្វើ​កិច្ច​ការ​ងារ​ប្រទេស​ខ្ញុំ​តែ​ប៉ុណ្ណឹង»។​

​លោក​បន្ត​ថា៖ ​«ហើយ​ខ្ញុំ​ក៏​បាន​ប្រាប់​នៅពេល​គាត់​និយាយ​ពី​បញ្ហា​នេះ បញ្ហានោះ។​ ក្នុង​ពេល​សន្ទនា​ជា​មួយ​គ្នា​ ​ខ្ញុំ​ក៏​បាន​លើក ​គាត់​ក៏​និយាយ​ពី​ដំណើរ​ការ​បោះ​ឆ្នោ​តឆ្នាំ​ក្រោយ។​ ខ្ញុំ​ក៏​បាន​និយាយ​ពី​ដំណើរ​ការ​បោះឆ្នោត​ជា​ហូរ​ហែ ​ហើយ​អំពី​ការ​ព្យាករ​ទុក​នៅ​ឆ្នាំ​ក្រោយ​នេះ​វា​យ៉ាង​ម៉េច។ ​បន្ថែម​ពី​លើ​នេះ​ យើង​ក៏មាន​និយាយ​ពី​បញ្ហា​នេះ​ បញ្ហា​នោះ​ទៀត។​ វា​មិន​មែន​គ្រាន់តែ​ជា​បញ្ហា​ដាច់​ដោយ​ឡែក​...។ ​ Joe Biden ​មក​នេះ មិន​មែន​និយាយរឿង​ផ្ទៃ​ក្នុង​កម្ពុជា​ទេ ​មក​និយាយ​ពី​បញ្ហា​សកល។​ អា​នេះ​ខ្ញុំ​គ្រាន់​បញ្ជាក់​ជូន​ប៉ុណ្ណឹង»។​

អ្នក​សារ​ព័ត៌មាន​របស់​វិទ្យុ​សំឡេង​សហ​រដ្ឋ​អាមេរិក ​និង​វីអូឌី​មិន​ត្រូវ​បាន​អនុញ្ញាត​ឲ្យ​ចូលរួម​សន្និសីទ​សារ​ព័ត៌មាន​របស់​លោក​ ហ៊ុន សែន​ ឡើយ ​ក្រោម​ហេតុ​ផល​ថា​ ស្ថាប័ន​សារ​ព័ត៌មាន​ទាំង​ពីរ​ត្រូវ​បាន​មន្រ្តី​ថ្នាក់​លើ​មិន​អនុញ្ញាត​ឲ្យ​ទទួល​កាត​ដើម្បី​ចូលរួម​ក្នុង​សន្និសីទ​ ដូច​អ្នក​សារព័ត៌មាន​ផ្សេង​ទៀត​ រួម​ទាំង​អ្នក​សារ​ព័ត៌មាន​បរទេស​ផង​ដែរ។​

អ្នក​នាំ​ពាក្យ​សមាគម​សិទ្ធិ​មនុស្ស​អាដហុក​ លោក ​ស៊ឹង សែនករុណា ​ថ្លែង​ថា ​ក​ម្ពុជា​គួរតែ​បញ្ជាក់​ការណ៍​ពិត​ឱ្យ​ប្រជាជន​បាន​ដឹង​ដើម្បី​ធានា​ថា​ កម្ពុជា​ពិត​ជា​ប្រទេស​មួយ​ដែល​ប្រកាន់​លទ្ធិ​ប្រជា​ធិបតេយ្យ ​ ហើយ​ត្រូវពិចារណា​រាល់​ការ​លើក​ឡើង​របស់​ប្រធានាធិបតីសហ​រដ្ឋ​អាមេរិក ​ក្នុង​ការ​បើក​លម្ហ​លទ្ធិ​ប្រជា​ធិបតេយ្យ​ក្នុង​ប្រទេស​ឡើង​វិញ​ដើម្បី​ជា​ផល​ប្រយោជន៍​រួម​របស់​កម្ពុជា។​

លោក​ថ្លែង​ថា៖​ «អ៊ីចឹង​គួរតែ​កម្ពុជា​មាន​ការ​នូវ​អ្វី​ដែល​ជា​ការ​ថ្លែង​លើក​ឡើង។ ​ហើយ​បញ្ហា​ទាំង​អស់​នេះ​ ​បើ​កាល​ណា​យើង​មាន​ការ​ជជែក​ពិភាក្សា​ ហើយ​សូម្បី​ការណ៍​ពិត​មួយ​ យើង​មិនអាច​បង្ហាញ​សាធារណ​ជន​បាន!​ ហើយ​សម្រាប់ការ​លើកឡើង​ទាំង​អស់នេះ​ ​សម្រាប់​ខ្ញុំ ​ ខ្ញុំ​មាន​ការ​ព្រួយ​បារម្ភ​ ព្រោះ​ការ​លើក​ឡើង​ទាំង​អស់​នេះ​ក្នុង​នាម​ជា​ប្រធានាធិបតី​សហ​រដ្ឋ​អាមេរិក ​ គេ​មិន​ចេះ​តែ​លើក​មក​និយាយ​ចោល​នោះ​ទេ។ ​អ៊ីចឹង​យើង​ខ្លាច​ថា ​ការ​លើក​ឡើង​ហ្នឹង​ ​យើង​មិន​យក​ចិត្ត​ទុក​ដាក់​ ហើយ​យើង​បែរ​ជា​ច្រាន​ចោល ​ហើយ​មិន​មាន​ការ​បញ្ជាក់​ឱ្យ​មាន​ភាព​ច្បាស់​លាស់»។​

គួរ​បញ្ជាក់​ថា​ កាលពី​រដ្ឋ​មន្រ្តី​ការ​បរទេស​អាមេរិក ​លោក​ Antony Blinken ​ដែល​បាន​មក​បំពេញ​ទស្សន​កិច្ច​នៅ​កម្ពុជា​ កាល​ពី​ដើម​ខែ​សីហា ​ឆ្នាំ​២០២២​ លោក​ក៏​បាន​ស្នើឱ្យ​រដ្ឋាភិបាល​កម្ពុជា​ដោះ​លែង​កញ្ញា​ សេង ធារី ​និង​បើក​លម្ហ​សេរីភាព​ក្នុង​ប្រទេស​កម្ពុជា​ផង​ដែរ៕

XS
SM
MD
LG