លោកនាយករដ្ឋមន្រ្តី ហ៊ុន សែន នៅថ្ងៃសុក្រនេះ ឱ្យដឹងថា កម្លាំងនគរបាលបានចាប់ខ្លួនមនុស្សម្នាក់តាមបញ្ជារបស់លោកក្នុងករណីបង្ហោះរូបភាពតាមប្រព័ន្ធសង្គម TikTokថា មានមនុស្សស្លាប់នៅក្នុងខេត្តកោះកុង ដោយសារជំងឺកូវីដ១៩។
លោក ហ៊ុន សែន ថ្លែងបែបនេះនៅក្នុងពិធីអបអរទិវាមច្ឆជាតិ ដែលធ្វើឡើងនៅក្នុងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ នាថ្ងៃទី១ ខែកក្កដា ឆ្នាំ២០២២។
លោកនាយករដ្ឋមន្រ្តីបានព្រមានទុកជាមុនថាការបង្ហោះសារបំភ្លៃទាក់ទងនឹងកូវីដ១៩ ដែលលោកថាបង្កជាចលាចលសង្គម មិនអាចទទួលយក និងលើកលែងបានទេ។
លោកថ្លែងថា៖ «បើអ្នកឯងមិនចង់ជាប់ខ្នោះទេ អ្នកឯងកុំធ្វើរឿងអ៊ីចឹង ព្រោះរឿងនេះមិនមែនរឿងលេងសើចទេ។ ការភ័យខ្លាចក្នុងចំណោមសាធារណជន មិនមែនរឿងបញ្ចេញមតិទេ។ ខ្ញុំសូមបញ្ជាក់ ខ្ញុំសូមព្រមានទុកជាមុន អ្នកណាក៏ដោយដែលយកបញ្ហាកូវីដទៅជាបញ្ហាលេងសើច បំពុលបរិយាកាសត្រូវបានចាប់ខ្លួន»។
បើតាមលោក ហ៊ុន សែន មនុស្សម្នាក់នៅក្នុងខេត្តត្បូងឃ្មុំដែលលោកថាមានឈ្មោះ«អ៊ូខុង» ប្រើប្រាស់ប្រព័ន្ធសង្គម TikTok ត្រូវបានចាប់ខ្លួន ហើយបញ្ជូនមកតុលាការរាជធានីភ្នំពេញ នៅថ្ងៃសុក្រនេះ ដោយអនុវត្តតាមដីការបស់ព្រះរាជអាជ្ញាតុលាការរាជធានីភ្នំពេញ។ លោកបន្ថែមថាកម្ពុជាមិនមានអ្នកជំងឺសូម្បីម្នាក់នៅក្នុងមន្ទីរពេទ្យ ប៉ុន្តែមានការបង្ហោះរូបភាពមនុស្សស្លាប់នៅខេត្តកោះកុង ដែលជារូបភាពចាស់។
លោក ហ៊ុន សែន ក៏បានអះអាងថាលោកមិនខ្វល់នឹងការរិះគន់ពីក្រុមសិទ្ធិមនុស្សឬអង្គទូតណាឡើយចំពោះការបញ្ជារបស់លោក។
លោកបន្ថែមថា៖ «អ្នកណាចង់និយាយជាមួយខ្ញុំ សូមអញ្ជើញមក។ អង្គការសិទ្ធិមនុស្ស ឬអង្គទូតនានា ចង់និយាយ មក។ អ្នកឯងទទួលយកបានទេនូវព័ត៌មានបំភ័យបែបនេះ!»។
ក្នុងពេលព្រមាននោះ លោក ហ៊ុន សែន ក៏បានអំពាវនាវឱ្យប្រជាពលរដ្ឋទៅទទួលវ៉ាក់សាំងបង្ការជំងឺកូវីដ១៩ផងដែរ។
លោក អំ សំអាត នាយករងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូ លើកទឹកចិត្តឱ្យប្រជាពលរដ្ឋបញ្ចេញមតិប្រកបដោយក្រមសីលធម៌ និងបញ្ចេញនូវព័ត៌មានពិត ដោយមានការស្វែងយល់។ លោកបន្ថែមថាអាជ្ញាធរ និងអង្គការសង្គមស៊ីវិលក៏ត្រូវចូលរួមអប់រំប្រជាពលរដ្ឋឱ្យចេះបែងចែកព័ត៌មានពិត និងព័ត៌មានមិនពិត ហើយមានការប្រុងប្រយ័ត្ននឹងការចែករំលែក។
លោកថ្លែងថា៖ «ជាការកត់សម្គាល់របស់ខ្ញុំទេ បងប្អូនប្រជាពលរដ្ឋយើងចេះប្រើនូវប្រព័ន្ធសង្គមច្រើន ក៏ប៉ុន្តែបងប្អូនប្រជាពលរដ្ឋនៅមិនទាន់ចេះថ្លឹងថ្លែងអំពីថាតើព័ត៌មានណាពិត ព័ត៌មានណាមិនពិត ហើយព័ត៌មានមិនពិតហ្នឹង តើអាចបង្កបញ្ហាដល់ពួកគាត់អីខ្លះ»។
គួរបញ្ជាក់ថាកាលពីខែមីនា ឆ្នាំ២០២១ រដ្ឋាភិបាលកម្ពុជាបានបង្កើតច្បាប់ស្តីពីជំងឺកូវីដ១៩ ដែលមានការដាក់ទោសទណ្ឌអ្នកផ្សព្វផ្សាយព័ត៌មានបំភ្លៃទាក់ទងនឹងកូវីដ១៩។ មនុស្សមួយចំនួនត្រូវបានចាប់ខ្លួនដាក់ពន្ធនាគារ និងអប់រំ តាមច្បាប់ថ្មីមួយនេះ៕
