ប្រតិកម្មតបទៅនឹងការដាក់ទណ្ឌកម្មរបស់សហរដ្ឋអាមេរិកលើការហាមឃាត់លក់ដូរអាវុធមកឲ្យកម្ពុជា លោកនាយករដ្ឋមន្រ្តី ហ៊ុន សែន នៅថ្ងៃសុក្រនេះ បានបញ្ជាឲ្យយកអាវុធ និងសម្ភារៈយោធារបស់អាមេរិក ដែលកម្ពុជាមាន មករក្សាទុកក្នុងឃ្លាំង ឬបំផ្លាញចោលតែម្តង។ នេះ បើយោងតាមសាររបស់នាយករដ្ឋមន្រ្តីដែលបង្ហោះនៅលើហ្វេសប៊ុករបស់លោក កាលពីរសៀលថ្ងៃទី១០ ខែធ្នូ ឆ្នាំ២០២១។
លោក ហ៊ុន សែន ឲ្យដឹងថា លោកអរគុណសហរដ្ឋអាមេរិកចំពោះបម្រាមការលក់ដូរអាវុធ និងសម្ភារៈយោធាមកកម្ពុជានាពេលនេះ។ លោកបញ្ជាក់ថា ការសម្រេចរបស់អាមេរិក «គឺបានឆ្លុះបញ្ចាំងពីភាពត្រឹមត្រូវនៃការសម្រេចចិត្តរបស់ខ្ញុំ កាលពីឆ្នាំ១៩៩៤ ដែលនៅពេលនោះ ខ្ញុំបានធ្វើការសម្រេចចិត្ត ដោយមិនធ្វើការផ្លាស់ប្តូរប្រព័ន្ធអាវុធកម្ពុជាដែលមានពេលនោះ ទៅទិញប្រព័ន្ធអាវុធអាមេរិក»។
លោក ហ៊ុន សែន បញ្ជាក់ថា៖ «ទន្ទឹមនឹងនេះ ខ្ញុំសូមដាក់ចេញបទបញ្ជាដល់អង្គភាពប្រដាប់អាវុធទាំងអស់ ឲ្យធ្វើការត្រួតពិនិត្យឡើងវិញជាបន្ទាន់អំពីអាវុធ និងសម្ភារៈយោធា ដែលកម្ពុជាមានបច្ចុប្បន្ន ហើយត្រូវប្រមូលអាវុធ និងសម្ភារៈយោធាអាមេរិកទាំងអស់ ប្រសិនបើមាន យកទៅរក្សាទុកក្នុងឃ្លាំង ឬយកទៅកម្ទេចចោលតាមការជាក់ស្តែង»។
លោកបន្ថែមថា៖ «សម្រាប់នយោបាយការពារជាតិរបស់កម្ពុជា ហើយវាក៏ជាសារព្រមានមួយប្រាប់ទៅខ្មែរដែលគ្រប់គ្រងរាជរដ្ឋាភិបាលជំនាន់ក្រោយឲ្យបានជ្រាបថា បើចង់មានឯករាជ្យភាពលើវិស័យការពារជាតិ សូមកុំប្រើប្រាស់អាវុធរបស់អាមេរិក»។
លោក ហ៊ុន សែន បន្ថែមថា តាមការចំណាំរបស់លោក អ្នកដែលធ្លាប់ប្រើប្រព័ន្ធអាវុធអាមេរិកជាច្រើន «បានចាញ់សង្រ្គាម» ដូចជាក្នុងរបបសាធារណរដ្ឋខ្មែររបស់លន់ នល់ និង សង្រ្គាមនៅអាហ្គានីស្ថាន។
វីអូអេ មិនទាន់អាចសុំការឆ្លើយតបភ្លាមៗពីស្ថានទូតអាមេរិកប្រចាំនៅកម្ពុជាតាមសារអ៊ីម៉ែលបាននៅឡើយទេ។
ដោយបារម្ភអំពីកំណើនឥទ្ធិពលចិនក្នុងប្រទេសកម្ពុជា សហរដ្ឋអាមេរិក កាលពីថ្ងៃទី៨ ខែធ្នូ បានសម្រេចដាក់ទណ្ឌកម្ម ដោយហាមមិនឲ្យនាំចេញអាវុធ និងសម្ភារៈយោធាចូលប្រទេសកម្ពុជា។
ទណ្ឌកម្មនេះ ត្រូវបានប្រកាសដោយក្រសួងពាណិជ្ជកម្មអាមេរិក ដោយលើកហេតុផលថា មានអំពើពុករលួយ ការរំលោភសិទ្ធិមនុស្ស និងកំណើនឥទ្ធិពលយោធាចិនក្នុងប្រទេសកម្ពុជា។
វាមិនច្បាស់នៅឡើយទេចំពោះឥទ្ធិពលនៃទណ្ឌកម្មនេះ ដោយសារអាមេរិក មិនមែនជាប្រទេសផ្គត់ផ្គង់គ្រឿងសព្វាវុធ និងសម្ភារៈយោធាដល់កម្ពុជាឡើយ។ នេះ បើតាមរបាយការណ៍ចេញផ្សាយដោយវិទ្យាស្ថានស្រាវជ្រាវសន្តិភាពអន្តរជាតិ (International Peace Research Institute) មានមូលដ្ឋាននៅទីក្រុងស្តុកខុល (Stockholm) ប្រទេសស៊ុយអែត។
ទណ្ឌកម្មរឹតត្បិតការនាំចេញសព្វាវុធមកកម្ពុជានេះ ធ្វើឡើងក្រោយលោកនាយករដ្ឋមន្រ្តី ហ៊ុន សែន កាលពីដើមខែធ្នូ ឆ្នាំ២០២១ បានប្រកាសថា រដ្ឋាភិបាលកម្ពុជាលែងឲ្យមានការចូលទៅមូលដ្ឋានកងទ័ពជើងទឹករាមក្នុងខេត្តព្រះសីហនុ ដែលកន្លងទៅ អាមេរិកបារម្ភថា អាចជាទីតាំងឈរជើងរបស់ទាហានចិន។ សហរដ្ឋអាមេរិក លើកទឹកចិត្តឲ្យរដ្ឋាភិបាលកម្ពុជា «មានតម្លាភាពពេញលេញ»អំពីគម្រោងនៃការអភិវឌ្ឍនៅមូលដ្ឋានកងទ័ពជើងទឹករាម និងតួនាទីរបស់យោធាចិនក្នុងការស្ថាបនាហេដ្ឋារចនាសម្ព័ន្ធ ដើម្បីសារៈប្រយោជន៍សម្រាប់ប្រជាជនកម្ពុជា ប្រទេសជិតខាង និងប្រទេសជាសមាជិកអាស៊ានផងដែរ៕
