មេដឹកនាំរដ្ឋាភិបាលទីក្រុងភ្នំពេញលោក ហ៊ុន សែន បានប្រតិកម្មខ្លាំងៗទៅនឹងអ្នកវិភាគមួយចំនួនដែលថាប្រធានសមាគមប្រជាជាតិអាស៊ីអាគ្នេយ៍ហៅកាត់ថា (អាស៊ាន)ក្រោមការដឹកនាំដោយកម្ពុជាមិនចង់ចូលរួមប្រជុំជាមួយសហរដ្ឋអាមេរិកបន្ទាប់ពីការប្រជុំកំពូលអាស៊ាន-អាមេរិកដែលគ្រោងធ្វើនៅចុងខែមីនានេះត្រូវបានសម្រេចលើកពេល។
លោក ហ៊ុន សែន បានផ្តល់ការពន្យល់ថាប្រធានអាស៊ានគ្មានសិទ្ធិផ្តាច់មុខក្នុងការកំណត់កាលបរិច្ឆេទសម្រាប់ការប្រជុំជាមួយដៃគូអាស៊ាននិងបានចំអកទៅអ្នកវិភាគដែលលោកមិនបានបញ្ចេញឈ្មោះចំៗនោះថាជាបុគ្គលគ្មានការយល់ដឹងអំពីទំនាក់ទំនងការទូតនិងកិច្ចការអាស៊ាន ហើយពួកគេគួរតែមករៀនសូត្រពីចៅៗរបស់លោកក្នុងជំនាញការទូតនេះ។
នៅឯពិធីសម្ពោធដាក់ឱ្យប្រើប្រាស់ «ភូមិកុមារ SOS ព្រៃវែង» ក្នុងខេត្តព្រៃវែង កាលពីព្រឹកថ្ងៃព្រហស្បតិ៍ទី១៧ខែមីនា លោកហ៊ុន សែន លើកឡើងយ៉ាងដូច្នេះ៖ «កម្ពុជាជាសមាជិកម្នាក់ ប៉ុន្តែជាប្រធានអាស៊ាន។ប្រធានអាស៊ាននេះគ្មានសិទ្ធិក្នុងការកំណត់កាលបរិច្ឆេទទេ។ ប្រធានអាស៊ានមានសិទ្ធិត្រឹមតែបញ្ចេញយោបល់លើការសម្របសម្រួលអំពីពេលវេលាដើម្បីមានកុងសង់ស៊ីសជាមួយអាស៊ាន១០ ឯអ្នកត្រូវសម្របសម្រួលគឺឥណ្ឌូណេស៊ីទេ។ សូមកុំភាន់ច្រឡំហើយសូមអ្នកដែលមិនយល់សូមទៅរៀនពីការងារអាស៊ានឡើងវិញ។សង្ឃឹមថាអស់លោកបណ្ឌិតឬអស់លោកសាស្ត្រាចារ្យកិច្ចការអន្តរជាតិជាដើម...រៀនសូត្រឱ្យចេះដឹងច្រើនជាងនេះ កុំឱ្យគេហៅថា អាល្ងង់ទូ»។
លោកហ៊ុន សែន បន្ថែមថា៖ «កាលពីប៉ុន្មានខែមុន [លោក ហ៊ុន សែន]សួរចៅ[ដែល]ចៅកំពុងសសេរសារណាសួរថាចៅសរសេរពីអី ចៅសរសេរពីការខុសគ្នារវាងអាស៊ាន និងEU[សហភាពអឺរ៉ុប]។អើ បើអ៊ីចឹងចៅកំពុងរៀនតាមដានកិច្ចការរបស់អាស៊ានហើយតើ!បើអ៊ីចឹងទេ ប្រហែលជាចៅខ្ញុំអាចបង្រៀនសាស្ត្រាចារ្យនិងបណ្ឌិតមួយចំនួនដែលកំពុងធ្វើការវិភាគបែបឆ្កុយមក [ដែលថា] ប្រធានអាស៊ានអត់ចង់ប្រជុំជាមួយអាមេរិក»។
ការអត្ថាធិប្បាយរបស់លោក ហ៊ុន សែន ជុំវិញការលើកពេលប្រជុំកំពូលអាស៊ាន អាមេរិកកើតមានឡើងបន្ទាប់ពីអ្នកធ្វើអត្ថាធិប្បាយអំពីនយោបាយកម្ពុជាមួយរូបគឺលោកសូ ណារ៉ូ បានរិះគន់តាមវិទ្យុអាស៊ីសេរីថាការលើកពេលប្រជុំនោះអាចបណ្តាលមកពីកម្ពុជារងឥទ្ធិពលរបស់ប្រទេសចិន។ដំណាលគ្នានឹងការអធិប្បាយរបស់លោកនាយករដ្ឋមន្ត្រីគេហទំព័ររបស់គណបក្សកាន់អំណាចក៏បានដកស្រង់ឈ្មោះលោកសូ ណារ៉ូ នៅក្នុងការចេញផ្សាយព័ត៌មានរបស់ខ្លួនពាក់ព័ន្ធនឹងកិច្ចប្រជុំកំពូលនោះដែរ។
បើតាមសេចក្តីរាយការណ៍របស់វិទ្យុអាសេរីចេញផ្សាយកាលពីថ្ងៃទី១០ខែមីនា លោកសូ ណារ៉ូ ថាការលើកពេលប្រជុំនោះមិនពាក់ព័ន្ធនឹងរឿងបច្ចេកទេសទេតែអាចជារឿងនយោបាយពោលគឺចិនឡប់ប៊ី[បញ្ចុះបញ្ជូល]លោកហ៊ុន សែន និងរដ្ឋមន្ត្រីការបរទេសកម្ពុជាលោកប្រាក់ សុខុនឱ្យពន្យារពេលកិច្ចប្រជុំនោះដើម្បីទុកឱ្យចិនមានពេលទំនេរសម្រាប់ធ្វើកិច្ចការយុទ្ធសាស្ត្រទប់ស្កាត់ឬវាយបកជួយរុស្ស៊ីដែលជាសម្ពន្ធមិត្តរបស់ចិនក្នុងការទប់កុំឱ្យសេដ្ឋកិច្ចរុស្ស៊ីដួលរលំក្នុងជម្លោះរុស្ស៊ីរវាងអ៊ុយក្រែន។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា បានកត់សម្គាល់ថាកម្ពុជាហាក់មិនមានរងសម្ពាធនយោបាយពីប្រទេសណាមួយនោះទេ និងថាកម្ពុជាក៏ចង់ជួបប្រជុំជាមួយសហរដ្ឋអាមេរិកផងដែរដើម្បីអាចបង្កើនកិច្ចសហប្រត្តិការទំនាក់ទំនងទាំងក្របខណ្ឌអាស៊ាន និងទ្វេភាគីជាពិសេសកាត់បន្ថយការរើសអើងនិងទទួលបានការរាប់អានដោយមុខមាត់រវាងរដ្ឋ និងរដ្ឋ។
លោកថ្លែងថា៖ «រឿងប្រជុំជាមួយអាមេរិកនេះ គឺកម្ពុជាចង់ ដើម្បីទី១បង្កើនទំនាក់ទំនងអង្គការតំបន់អាស៊ានជាមួយសហរដ្ឋអារមរិក ទី២ក្នុងក្របខណ្ឌកម្ពុជាជាមួយអាមេរិកពីព្រោះក្នុងជំនួបដោយផ្ទាល់ក្រៅពីកិច្ចប្រជុំផ្លូវការក្របខណ្ឌអាស៊ានខ្ញុំគិតថាប្រហែលជាអាចមានកិច្ចប្រជុំក្រៅផ្លូវការរវាងប្រទេសទាំង២ រវាងមន្ត្រីថ្នាក់ក្រោមដើម្បីលាងជម្រះភាពមិនចុះសម្រុងគ្នានៃទំនាក់ទំនងទ្វេភាគី កម្ពុជា-អាមេរិកកន្លងមក។ ឧទាហរណ៍ ពាក់ព័ន្ធនឹងការចោទប្រកាន់ថា អាមេរិកនៅពីក្រោយនៃការផ្តួលរលំរដ្ឋាភិបាលជាមួយលោក កឹម សុខា រហូតដល់មានលោក Donald Trump សរសេរលិខិត ឆ្លើយឆ្លងជាមួយលោកនាយករដ្ឋមន្ត្រី»។
លោកបន្ថែមថាជំហររបស់កម្ពុជាដែលបានគាំទ្រលើសេចក្តីសម្រេចរបស់មហាសន្និបាតរបស់អង្គការសហប្រជាជាតិក្នុងនាមកម្ពុជាជាសមាជិក និងសហស្ថាបនិកដើម្បីជំទាស់នឹងការវាយប្រហាររបស់រុស្ស៊ីលើអ៊ុយក្រែនកាលពីកន្លងមកនោះ ក៏បង្ហាញថាកម្ពុជាចង់រក្សាបន្ទាត់នយោបាយការបរទេសមិនលម្អៀងទៅរកភាគីណាមួយនៅក្នុងវិបត្តិអ៊ុយក្រែន។
ងាកមកកាលកំណត់ពេលប្រជុំកំពូលអាស៊ាន-អាមេរិក លោក ហ៊ុន សែន ថ្លែងនៅថ្ងៃព្រហស្បតិ៍ដដែលនេះថាការប្រជុំមិនទាន់ដឹងថាកើតឡើងនៅពេលណានោះទេ ខណៈទុកលទ្ធភាពឱ្យឥណ្ឌូណេស៊ីដែលជាអ្នកទទួលបន្ទុកកិច្ចការនេះធ្វើការសម្របសម្រួលហើយនៅពេលមានកុងសង់ស៊ីសឬការស្រុះស្រួលគ្នារួមមួយរបស់ប្រទេសសមាជិកអាស៊ានទើបរៀបចំដាក់ពេលវេលាជាក់លាក់ប្រជុំនេះសារជាថ្មីម្តងទៀត។
ក៏ប៉ុន្តែលោក ហ៊ុន សែន អះអាងថាប្រសិនបើការប្រជុំនេះលើកពេលចំចុងខែឧសភានិងខែមិថុនាលោកមិនអាចចេញពីប្រទេសចូលរួមបានទេ ដោយសារចំពេលបោះឆ្នោតឃុំសង្កាត់ដែលតម្រូវឱ្យលោកត្រូវស្ថិតក្នុងប្រទេសកម្ពុជា៕
