លោកនាយករដ្ឋមន្ត្រី ហ៊ុន សែន នៅថ្ងៃអង្គារនេះ បានបដិសេធការលើកឡើងថា លោក កំពុងស្វះស្វែង«ផ្ទេរតំណែង»ទៅកូនប្រុសរបស់លោក គឺលោក ហ៊ុន ម៉ាណែត ដោយលោកអះអាងថា លោកនឹងបន្តតំណែងជានាយករដ្ឋមន្ត្រីយ៉ាងតិច១០ឆ្នាំទៀត។
លោកបានថ្លែងបែបនេះ នៅក្នុងពិធីជួបជុំជាមួយអ្នកសារព័ត៌មានប្រចាំឆ្នាំ ដែលធ្វើឡើងនៅកោះពេជ្រនៅល្ងាចថ្ងៃអង្គារ និងចំខួប៣៥ឆ្នាំនៃការកាន់អំណាចរបស់លោកជានាយករដ្ឋមន្ត្រី។
លោក ហ៊ុន សែន បានថ្លែងបែបនេះ ជាប្រតិកម្មតបទៅនឹងការលើកឡើងរបស់មតិមួយចំនួនថាលោកមានគម្រោងផ្ទេរតំណែងឲ្យលោក ហ៊ុន ម៉ាណែត ដែលជាកូនប្រុសច្បងរបស់លោក នៅឆ្នាំ២០២១។
នៅចំពោះមុខអ្នកសារព័ត៌មាន និងមន្ត្រីរដ្ឋាភិបាល លោក ហ៊ុន សែន បានថ្លែងថា៖
«ខ្ញុំត្រូវការពេលវេលា១០ឆ្នាំទៀត ដើម្បីកាន់តំណែងជានាយករដ្ឋមន្ត្រីនៃព្រះរាជាណាចក្រកម្ពុជា។ ដូច្នេះ ហ៊ុន ម៉ាណែត បើសិនជាមានលក្ខណៈសម្បត្តិគ្រប់គ្រាន់ គេក៏ត្រូវរង់ចាំ រហូតទៅដល់ក្រោយឆ្នាំ២០២៨ ឬក្រោយឆ្នាំ២០២៩ ឬរហូតទៅដល់ឆ្នាំ២០៣០ ទើបអាចប្រឡូកនៅក្នុងតួនាទីជានាយករដ្ឋមន្ត្រីបាន។ នេះជាការបញ្ជាក់ហើយបញ្ជាក់ទៀត។ បើឪពុកវាកំពុងតែធ្វើ តើកូនមានលទ្ធភាពឯណា ដើម្បីមកដណ្ដើមអំណាចពីឪពុក»។
ទោះជាយ៉ាងណា លោក ហ៊ុន សែន បានលើកឡើងថាប្រទេសកម្ពុជា ជាប្រទេសប្រជាធិបតេយ្យ ដែលមិនអាចផ្ទេរអំណាចពីឪពុកទៅកូនបាននោះទេ។ លោកបញ្ជាក់ថា ការធ្វើជានាយករដ្ឋមន្ត្រី ត្រូវធ្វើឡើងតាមការបោះឆ្នោត។
លោក ហ៊ុន សែន បន្តថា សមត្ថភាពរបស់លោក ហ៊ុន ម៉ាណែត ដែលបច្ចុប្បន្នជាអគ្គមេបញ្ជាការរង និងជាមេបញ្ជាការកងទ័ពជើងគោកនៃកងយោធពលខេមរភូមិន្ទ អាចធ្វើជារដ្ឋមន្ត្រី ឬរដ្ឋលេខាធិការបាន តែលោកមិនដាក់ក្នុងតំណែងរដ្ឋាភិបាលនោះទេ។
លោក ហ៊ុន សែន បានថ្លែងទៀតថា៖
«ឥឡូវនេះ ខ្ញុំដឹងច្បាស់ហើយថា សំណួរកាន់តែច្រើនឡើង ច្រើនឡើងអំពីរបស់ដែលហៅថា តើក្រោយ ហ៊ុន សែន ជានរណា? នេះមិនមែនជាសំណួរតូចតាច ហើយវាត្រូវរកចម្លើយជាក់លាក់នៅពេលក្រោយ មិនមែនពេលនេះទេ។ ពេលនេះ ក្រោយហ៊ុន សែន គឺហ៊ុន សែន តែម្ដង»។
រដ្ឋាភិបាលរបស់លោក ហ៊ុន សែន ត្រូវបានរិះគន់យ៉ាងខ្លាំង ដោយសហគមន៍អន្តរជាតិ ក្នុងការធ្វើឲ្យធ្លាក់ចុះលទ្ធិប្រជាធិបតេយ្យ និងសិទ្ធិមនុស្សនៅកម្ពុជា។
សហភាពអឺរ៉ុប បានរកឃើញថារដ្ឋាភិបាលកម្ពុជារំលោភសិទ្ធិនយោបាយ «ជាប្រព័ន្ធនិងយ៉ាងធ្ងន់ធ្ងរ» ក្នុងនោះមានការចាប់លោក កឹម សុខា ប្រធានគណបក្សសង្គ្រោះជាតិដាក់ឃុំឃាំង ការរំលាយអតីតគណបក្សប្រឆាំងដ៏ធំនេះ និងការហាមឃាត់មន្ត្រីជាន់ខ្ពស់គណបក្សចំនួន១១៨នាក់ មិនឲ្យធ្វើនយោបាយរយៈពេល៥ឆ្នាំ។
ដោយសារបញ្ហានេះ សហភាពអឺរ៉ុបកំពុងពិចារណាដំណើរការនីតិវិធីដកឋានៈអនុគ្រោះពន្ធ«គ្រប់មុខទំនិញលើកលែងសព្វាវុធ» ឬEverything But Arms (EBA) ដែលកម្ពុជាទទួលបានតាំងពីឆ្នាំ២០០១ បើសិនជារដ្ឋាភិបាលរបស់លោកនាយករដ្ឋមន្ត្រី ហ៊ុន សែន មិនស្ដារស្ថានការណ៍មកដូចដើមវិញទេ។ ការសម្រេចជាចុងក្រោយរបស់ EU ថាតើត្រូវដកឬព្យួរ EBA ឬយ៉ាងណានោះ នឹងធ្វើឡើងនៅខែកុម្ភៈ ឆ្នាំ២០២០ ដែលអាចប៉ះពាល់ដល់វិស័យកាត់ដេរសំលៀកបំពាក់នៅកម្ពុជា៕
