ខណៈមានការអំពាវនាវឱ្យប្រជាពលរដ្ឋគូសសន្លឹកឆ្នោតចោលពីមេដឹកនាំគណបក្សជំទាស់នៅក្នុងការបោះឆ្នោតនាថ្ងៃទី២៣ ខែកក្កដាខាងមុខ លោកនាយករដ្ឋមន្ត្រី ហ៊ុន សែន បានអំពាវនាវឱ្យប្រជាពលរដ្ឋគូសសន្លឹកឆ្នោតឱ្យបានត្រឹមត្រូវដែលអាចយកជាការបាន។
នៅព្រឹកថ្ងៃពុធនេះ លោកនាយករដ្ឋមន្ត្រី ហ៊ុន សែន បានថ្លែងសារជាសំឡេងក្នុងប្រព័ន្ធទំនាក់ទំនងតេឡេក្រាមរបស់លោកទាក់ទងនឹងការគូសសន្លឹកឆ្នោតថា៖ «ដូច្នេះខ្ញុំអំពាវនាវទាំងសមាជិកសមាជិកាគណបក្សប្រជាជន ទាំងបណ្តាគណបក្សនយោបាយផ្សេងៗរួមគ្នា ដើម្បីពន្យល់ដល់ប្រជាពលរដ្ឋឱ្យគូសសន្លឹកឆ្នោតឱ្យបានត្រឹមត្រូវ ព្រោះនេះគឺជាកិច្ចដែលយើងត្រូវធ្វើរួមគ្នា ដើម្បីឱ្យការបោះឆ្នោតមួយធានានូវភាពរលូន និងជោគជ័យសម្រាប់ជាតិយើងទាំងមូល»។
លោក ហ៊ុន សែន ថ្លែងបែបនេះ បន្ទាប់ពីលោកអះអាងថា មានជនក្លែងបន្លំជាថ្នាក់ដឹកនាំគណបក្សប្រជាជន បានទៅណែនាំអ្នកបោះឆ្នោតឱ្យគូសសន្លឹកឆ្នោតនោះចោល ដោយប្រើសញ្ញាផ្សេង ខុសពីការណែនាំរបស់គណៈកម្មាធិការជាតិរៀបចំការបោះឆ្នោត។
លោក ហ៊ុន សែន ក៏បានបញ្ជាឱ្យចាប់ខ្លួនអ្នកទាំងនោះ ដោយពុំមានការលើកលែងឡើយ។
លោកថ្លែងថា៖ «សូមចាប់ឱ្យបានចំពោះជនប្រព្រឹត្តបទល្មើស ជាពិសេសគណបក្សប្រជាជនត្រូវតែទទួលខុសត្រូវទៅលើការចាប់ អ្នកណាដែលបន្លំខ្លួនជាមនុស្សគណបក្សប្រជាជន ហើយទៅណែនាំប្រជាជនឱ្យគូសសន្លឹកឆ្នោតខុស ជនទុច្ចរិតនេះ មិនត្រូវបានទទួលការអត់ឱននោះឡើយ»។
ខណៈអវត្តមានគណបក្សភ្លើងទៀនដែលជាគណបក្សប្រឆាំងដ៏ធំមួយក្នុងការបោះឆ្នោតជ្រើសតាំងតំណាងរាស្រ្តនីតិកាលទី៧ខាងមុខនេះ អតីតមេដឹកនាំគណបក្សសង្រ្គោះជាតិ លោក សម រង្ស៊ី ដែលកំពុងនិរទេសខ្លួននៅក្រៅប្រទេស តែងតែណែនាំឱ្យប្រជាពលរដ្ឋគូសសន្លឹកឆ្នោតចោល ដោយសារមិនមានគណបក្សដែលពួកគេពេញចិត្ត។
លោក សម រង្ស៊ី បានបង្ហោះសារនៅលើហ្វេសប៊ុករបស់លោក កាលពីថ្ងៃអង្គារថា៖ «...ការបោះឆ្នោតនៅកម្ពុជា ថ្ងៃ២៣ កក្កដា ខាងមុខនេះ នឹងនាំមកនូវការភ្ញាក់ផ្អើលមួយដ៏ធំ គឺចំនួនសន្លឹកឆ្នោតដ៏ច្រើនលើសលប់ ដែលអ្នកបោះឆ្នោតនឹងគូសចោល ដើម្បីច្រានចោលរបប ហ៊ុន សែន»។
កាលព្រឹកថ្ងៃពុធ លោកនាយករដ្ឋមន្រ្តី ហ៊ុន សែន ក៏បានបញ្ជាឱ្យក្រសួងប្រៃសណីយ៍ និងទូរគមនាគមន៍ស្រាវជ្រាវជាបន្ទាន់ ដើម្បីកំណត់មុខសញ្ញាអ្នកដែលបង្រៀនប្រជាពលរដ្ឋតាមអនឡាញឱ្យគូសសន្លឹកឆ្នោតចោល។
នៅក្នុងពេលយុទ្ធនាការឃោសនារកសំឡេងឆ្នោតដែលចាប់ផ្តើមតាំងពីថ្ងៃទី១ ដល់ថ្ងៃទី២១ ខែកក្កដា មន្រ្តីគណបក្សប្រជាជនកម្ពុជាកំពុងតែសកម្មចុះណែនាំនិងបង្រៀនប្រជាពលរដ្ឋឱ្យចេះគូសសន្លឹកឆ្នោតឱ្យបានត្រឹមត្រូវ ដែលយកជាការបាន។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត ហៅកាត់ថាគ.ជ.ប លើកឡើងថាគ.ជ.ប នឹងចាត់វិធានការ ដោយអនុវត្តតាមច្បាប់ស្តីអំពីការបោះឆ្នោត ប្រសិនបើរកឃើញអ្នកដែលបង្រៀនប្រជាពលរដ្ឋឱ្យគូសសន្លឹកឆ្នោតខុស។
លោកថ្លែងថា៖ «រឿងបន្លំខ្លួនធ្វើជាតំណាងឱ្យគណបក្សនយោបាយណាមួយ គឺជាទោសទណ្ឌផ្សេងដែលសាមីខ្លួនទទួលខុសត្រូវទៅតាមច្បាប់ក្នុងរឿងដោយឡែកមួយ។ ប៉ុន្តែពាក់ព័ន្ធនឹងការបោះឆ្នោតនេះ ការដែលធ្វើឱ្យមានការភ័ន្តច្រឡំ មានការបាត់ទំនុកចិត្តទៅលើការបោះឆ្នោត បង្រៀនប្រជាពលរដ្ឋឱ្យគូសសញ្ញាដែលធ្វើឱ្យសន្លឹកឆ្នោតខូចជាដើមគឺត្រូវទទួលការផាកពិន័យក្នុងច្បាប់ចែងពី៥លានទៅ២០លានរៀល ដោយគណៈកម្មាធិការជាតិរៀបចំការបោះឆ្នោត ដោយទាន់គិតដល់ទោសទណ្ឌផ្សេងៗដែលសាមីខ្លួនបានប្រព្រឹត្ត»។
អ្នកនាំពាក្យរូបនេះក៏បានណែនាំពីការគូសសន្លឹកឆ្នោតដែលត្រឹមត្រូវ និងយកជាការបាន ដោយលើកឡើងថា៖ «ក្នុងបទបញ្ជា និងនីតិវិធីនៃការបោះឆ្នោត គ.ជ.ប បានណែនាំឱ្យប្រជាពលរដ្ឋធ្វើការថេច[✓] ទៅលើសន្លឹកឆ្នោតដែលសាមីជនអ្នកបោះឆ្នោតចង់គាំទ្រដល់គណបក្សនយោបាយណាមួយ។ ប៉ុន្តែបើប្រជាពលរដ្ឋពិបាកក្នុងការគូសសញ្ញាថេច[✓] បងប្អូនអាចនឹងប្រើប្រាស់សញ្ញាអ្វីក៏បាន លើកលែងតែសញ្ញាដែលអាចឱ្យគេដឹងបានអំពីអត្តសញ្ញាណអ្នកគូសខ្លួនឯង»។
លោកបន្ថែមថាក្រៅពីគូសសញ្ញាថេច(✓) ប្រជាពលរដ្ឋអាចគូសសញ្ញាផ្សេងទៀតបាន ដែលមាននៅក្នុងខិត្តប័ណ្ណដែល គ.ជ.ប បានណែនាំ។
គួរបញ្ជាក់ថាកាលពីការបោះឆ្នោតថ្នាក់ជាតិឆ្នាំ២០១៨ ដែលអវត្តមានគណបក្សប្រឆាំងដ៏ធំ គឺអតីតគណបក្សសង្គ្រោះជាតិ សន្លឹកឆ្នោតមិនបានការមានប្រមាណ៦០ម៉ឺនសន្លឹក។ នេះបើយោងតាមទិន្នន័យរបស់គណៈកម្មាធិការជាតិរៀបចំការបោះឆ្នោត ហៅកាត់ថាគ.ជ.ប។
អ្នកតាមដានមើលឃើញថា ប្រជាពលរដ្ឋខ្លះត្រូវបានបង្ខំឱ្យទៅបោះឆ្នោត ដោយសារបារម្ភការធ្វើទុក្ខបុកម្នេញពីសំណាក់អាជ្ញាធរមូលដ្ឋានរបស់គណបក្សប្រជាជនកម្ពុជា ពាក់ព័ន្ធនឹងការរើសអើងនយោបាយ និងមិនធ្វើឯកសារសម្រាប់ប្រជាពលរដ្ឋ នៅពេលពួកគេត្រូវការ។ សម្រាប់មន្រ្តីរាជការ កម្លាំងប្រដាប់អាវុធ និងទាហាន ពួកគេត្រូវតែទៅបោះឆ្នោត ដើម្បីមានចង្អុលដៃជ្រលក់ថ្នាំ និងបង្ហាញថាពួកគេមិនប្រឆាំងនឹងគណបក្សកាន់អំណាចដែលចង់ឱ្យប្រជាពលរដ្ឋទៅបោះឆ្នោតឱ្យបានច្រើន ក្នុងគ្រាអវត្តមានគណបក្សភ្លើងទៀន៕
