លោកនាយករដ្ឋមន្ត្រី ហ៊ុន សែន នៅព្រឹកថ្ងៃសុក្រនេះ បានខឹងសម្បារនិងស្តីបន្ទោសធ្ងន់ៗដល់រដ្ឋមន្ត្រីបីរូបចំពោះការចេញរបាយការណ៍ផ្ទុយគ្នា លើករណីពុលស្រា និងទឹកក្នុងខេត្តក្រចេះ ដែលបណ្តាលឱ្យពលរដ្ឋ១៣នាក់ស្លាប់និងជាង២០០នាក់ចូលមន្ទីរពេទ្យ។
ថ្លែងក្នុងកិច្ចប្រជុំប្រចាំសប្តាហ៍របស់ទីស្តីការគណៈរដ្ឋមន្ត្រី កាលពីថ្ងៃសុក្រ លោក ហ៊ុន សែន បានស្តីបន្ទោស និងព្រមានដករដ្ឋមន្ត្រីចេញពីតំណែងចំពោះការចោទដាក់គ្នានៅក្នុងករណីពុលស្លាប់ នៅខេត្តក្រចេះ។ លោកបន្តរថា ការណ៍នេះបានកើតមានឡើង ក្រោយរដ្ឋមន្ត្រីក្រសួងឧស្សាហកម្ម និងសិប្បកម្មចោទថា ការពុលស្លាប់អ្នកភូមិក្នុងខេត្តក្រចេះគឺមកពីកំហាប់ខ្ពស់នៃជាតិស្ស៊ានីដ (Cyanide) ដែលអាចហូរចេញពីកន្លែងធ្វើរ៉ែនៅផ្នែកខាងលើនៃព្រែកទេរ ដែលនាំដល់ការចេញសេចក្តីថ្លែងការណ៍ចោទទាត់ចោល និងចោទដាក់គ្នាទៅវិញទៅមក។ លោកក៏បានបញ្ជាឱ្យរដ្ឋមន្ត្រីទាំងនោះបញ្ឈប់ជាបន្ទាន់នូវការផ្តល់ព័ត៌មានដល់ក្រុមអ្នកសារព័ត៌មានមុនបញ្ជូនរបាយការណ៍ទៅដល់ដៃលោក។
ក្នុងវីដេអូ ដែលថតចេញពីកិច្ចប្រជុំនៅថ្ងៃសុក្រ និងផ្សាយដោយប្រព័ន្ធផ្សព្ធផ្សាយដែលស្និទ្ធនឹងរដ្ឋាភិបាលគឺ Fresh News លោក ហ៊ុន សែន ថ្លែងថា៖
«ទាក់ទងនឹងបញ្ហាពុលនៅខេត្តក្រចេះ យើងបានប្រគល់ភារកិច្ចនេះឱ្យក្រសួងសុខាភិបាលតំាងពីដើមទី ហើយក្រសួងសុខាភិបាលបានបញ្ជាក់ផ្សព្វផ្សាយ ហើយយកជាផ្លូវការរួចស្រេចហើយ។ ហេតុអ្វីចាំបាច់មានអត្ថាធិប្បាយ និងលើបញ្ហានេះបញ្ហានោះបន្ថែមទៀត ដែលបង្កើតឱ្យទៅជាជម្លោះរវាងរដ្ឋមន្ត្រី និងរដ្ឋមន្ត្រី នៅក្នុងស្ថាប័នរាជរដ្ឋាភិបាល ក្នុងពេលដែលប្រមុខរាជរដ្ឋាភិបាលមិនបានដឹង»។
កាលពីដើមខែឧសភាកន្លងទៅ ពលរដ្ឋក្នុងភូមិពីរនៃឃុំកន្ទួត ស្រុកចិត្របុរី ខេត្តក្រចេះ មានរោគសញ្ញាឈឺពោះ ក្អួត ឈឺក អស់កម្លាំង ទន់ដៃទន់ជើង វិលមុខ និងថប់ដង្ហើម រហូតបណ្តាលឲ្យស្លាប់១៣នាក់ និងពលរដ្ឋជាង២០០នាក់ ធ្លាក់ខ្លួនឈឺធ្ងន់ចូលសម្រាកក្នុងពេទ្យ។ ក្រសួងសុខាភិបាលបានចេញសេចក្តីថ្លែងការណ៍មួយជាបន្ទាន់ ដោយចោទការស្លាប់នោះទៅលើករណីពុលស្រា និងជាតិគីមីខ្ពស់ក្នុងទឹក។ យ៉ាងណាក៏ដោយ ករណីនេះត្រូវបានស៊ើបអង្កេត និងចេញសេចក្តីថ្លែងការណ៍ជាបន្តបន្ទាប់ដោយក្រសួងជាច្រើន រួមមានក្រសួងសុខាភិបាល ក្រសួងឧស្សាហកម្ម និងសិប្បកម្ម ក្រសួងរ៉ែ និងថាមពល និងក្រសួងបរិស្ថានផងដែរ។
កាលពីដើមសប្តាហ៍នេះ លោក ចម ប្រសិទ្ធិ រដ្ឋមន្ត្រីឧស្សាហកម្ម និងសិប្បកម្ម បានថ្លែងប្រាប់អ្នកសារព័ត៌មានថា ក្រសួងបានរកឃើញកំហាប់ជាតិស្ស៊ានីដ (Cyanide) ខ្ពស់នៅក្នុងទឹកព្រែកទេរ ដែលហូរចាក់ពីខេត្តមណ្ឌលគិរី។ លោក ចម ប្រសិទ្ធិក៏បានចោទថា ការធ្វើរ៉ែមាស ដោយប្រើជាតិស្ស៊ានីដ និងបង្ហូរចូលព្រែកទេរគឺជាដើមហេតុបណ្តាលឱ្យពលរដ្ឋពុលស្លាប់នៅខេត្តក្រចេះ។ ការលើកឡើងរបស់រដ្ឋមន្ត្រី ចម ប្រសិទ្ធិត្រូវបានច្រានចោលភ្លាមៗ ដោយរដ្ឋមន្ត្រីក្រសួងរ៉ែ និងថាមពល គឺលោក ស៊ុយ សែម។
ទោះយ៉ាងណា នៅថ្ងៃសុក្រនេះ លោក ហ៊ុន សែន បានបញ្ជាឱ្យរដ្ឋមន្ត្រីបីរូបគឺរដ្ឋមន្ត្រីនៃក្រសួងសុខាភិបាល ក្រសួងឧស្សាហកម្ម និងសិប្បកម្ម និងក្រសួងរ៉ែ និងថាមពលបញ្ចប់បញ្ហាប្រឈមគ្នានោះ។
«អស់លោកត្រូវគោរពឋានានុក្រមនៃការធ្វើការផងបានទេ? កុំទទឹងទិសបានទេ? ហើយកុំឱ្យយកឈ្នះខ្លួនឯងបានទេ កុំគិតតែពីឈ្នះ ដោយខ្វះការទទួលខុសត្រូវបានទេ? ខ្ញុំមិនចង់! ខ្ញុំគិតថា វាដូចជាហួសហេតុពេកហើយ ហាក់ដូចជាកូនក្មេងបៀមដៃ សាចទឹកដាក់គ្នា មួយចោទទៅមួយៗ។ ក្នុងពេលដែលមានរបាយការណ៍ នរណាតាមដានសភាព ការណ៍នេះលើសពីខ្ញុំទៅទៀត? ក្រសួងសុខាភិបាលគេបានធ្វើកិច្ចការងារនេះ ហើយមុននឹងចុះផ្សាយការងារនេះ បង ម៉ម ប៊ុនហេងបានស្នើមកខ្ញុំ! ខ្ញុំស្នើឱ្យមានការប្រកាសបន្ទាន់នៅក្នុងពេលដែលមានការទាក់ទងក្នុង Whatsapp»។
បញ្ហាចេញរបាយការណ៍ផ្ទុយគ្នានេះត្រូវបានបញ្ចប់ ដោយការចុះហត្ថលេខារបស់រដ្ឋមន្ត្រីទាំងបីរូបលើសេចក្តីថ្លែងការណ៍រួម ដោយឯកភាពថា ករណីពុលនៅខេត្តក្រចេះនេះគឺករណីពុលស្រា និងការប្រើប្រាស់ជាតិគីមីខ្ពស់បណ្តាលមកពីថ្នាំសម្លាប់សត្វលិ្អត និងស្មៅក្នុងចម្ការនានានៅផ្នែកខាងលើនៃព្រែកទេរ។
យ៉ាងណាក៏ដោយ លោក ឯម សុវណ្ណារ៉ា អ្នកវិភាគ និងឃ្លាំមើលស្ថានការណ៍ក្នុងប្រទេសកម្ពុជា ប្រាប់ VOA ថា វាជារឿងធម្មតាដែលនាយករដ្ឋមន្ត្រីត្រូវចេញមកដើម្បីបំបាត់ការប្រេះឆា និងការមិនចុះសម្រុងគ្នាក្នុងរបាយណ៍របស់រដ្ឋមន្ត្រីរបស់លោក។ លោកលើកឡើងថា កិច្ចអន្តរាគមន៍របស់លោក ហ៊ុន សែន គឺអាចកាត់បន្ថយបញ្ហាមួយចំណែក ក៏ប៉ុន្តែភាពមន្ទិលសង្ស័យរបស់ពលរដ្ឋខ្មែរ និងការប្រេះឆារបស់រដ្ឋមន្ត្រីនៅតែមាន។
«វាអាចជួយកាត់បន្ថយភាពមិនច្បាស់លាស់ពីមុនៗ ក៏ប៉ុន្តែវាមិនអាចបំបាត់ហ្អាការដែលមានភាពសង្ស័យ និងភាពមន្ទិលសង្ស័យនានា ដែលភស្តុតាងមុន ដែលរដ្ឋមន្ត្រីមុនឱ្យទៅវាខុសទៅហើយ។ អីចឹងវាអត់អាចលុបបាត់ទាំងស្រុងនោះទេ តែវាអាចជួយបានខ្លះ។ ទោះវាអត់បានជួយឱ្យបាត់ទាំងស្រុង តែវាអាចជួយកាត់បន្ថយហានីភ័យមួយចំនួន ដែលពាក់ព័ន្ធការបាត់ជំនឿទុកចិត្តពីប្រជាពលរដ្ឋ មើលទៅវាបាត់នូវរូបភាពប្រេះស្រាំ នៅក្នុងជួរគណៈរដ្ឋមន្ត្រី នៅក្នុងភាពទំនាក់ទំនងរដ្ឋមន្ត្រី និងរដ្ឋមន្ត្រី វាអត់បានកសាងជំនឿទុកចិត្តនិងគ្នាទេ! អីចឹងបានមានការចេញខ្លឹមសារគោលការណ៍វាផ្សេងគ្នារហូតហ្នឹងហ្អា»។
គួរបញ្ជាក់ផងដែរថា ក្រសួងឧស្សាហកម្ម និងសិប្បកម្ម ដែលបច្ចុប្បន្នគ្រប់គ្រងដោយលោក ចម ប្រសិទ្ធិ ត្រូវបានបំបែកចេញពីក្រសួងឧស្សាហកម្ម រ៉ែនិងថាមពលនៅក្នុងឆ្នាំ២០១៣ ដែលស្ថិតក្រោមការគ្រប់គ្រងដោយលោក ស៊ុយ សែម អស់ជាច្រើនឆ្នាំ។
យ៉ាងណាក៏ដោយ លោក ហ៊ុន សែនបានបញ្ជាក់នៅក្នុងកិច្ចប្រជុំគណៈរដ្ឋមន្ត្រីផងដែរថា កំហុសឆ្គងរបស់រដ្ឋមន្ត្រីខ្លួនគឺជាការទទួលខុសត្រូវរបស់លោក ក៏ប៉ុន្តែបានព្រមានរដ្ឋមន្ត្រីទាំងនោះ ជាលើកចុងក្រោយថា មិនឱ្យចេញព័ត៌មានទៅដល់អ្នកសារព័ត៌មាន នៅមុនការរាយណ៍មករូបលោក ប្រសិនបើរដ្ឋមន្ត្រីទាំងនោះចង់ស្ថិតក្នុងអំណាចរបស់ខ្លួន៕
