អង្គការអន្តរជាតិ Human Rights Watch បាននិយាយថា រដ្ឋាភិបាលនៅពាសពេញពិភពលោកមានកំហុសដ៏ធ្ងន់មួយ នៅក្នុងការកាត់បន្ថយសិទ្ធិមនុស្សក្នុងនាមដើម្បីពង្រឹងវិធានការការពារសន្តិសុខ។
នៅក្នុងសេចក្តីរាយការណ៍ប្រចាំឆ្នាំអំពីសិទ្ធិមនុស្សនៅក្នុងពិភពលោក ដែលចេញផ្សាយនៅថ្ងៃព្រហស្បត៍នេះ Human Rights Watch បាននិយាយថាប្រទេសនីហ្សេរីយ៉ា អ៊ីរ៉ាក់ ស៊ីរី អ៊ីស្រាអែល និងស.រ.អា ជាប្រទេសក្នុងចំណោមអ្នកដែលប្រើការព្រួយបារម្ភអំពីសន្តិសុខជាតិ ដើម្បីតម្រូវថាការរំលោភសិទ្ធិមនុស្សជាវិធានការត្រឹមត្រូវ។
នាយកប្រតិបត្តិនៃអង្គការនេះ លោក Kenneth Roth បានថ្លែងថា ការពង្រឹងសន្តិសុខអាចធ្វើឲ្យ«ខូចប្រយោជន៍»ទៅវិញ ដោយធ្វើឲ្យមនុស្សអស់សេចក្តីទុកចិត្ត និងធ្វើឲ្យមានភាពតានតឹងរវាងក្រុមផ្សេងៗ។
សេចក្តីរាយការណ៍បានចោទ អ៊ីរ៉ាក់ និង ស៊ីរី អំពីគោលនយោបាយរំលោភសិទ្ធិសាសនា ដែលបណ្តាលឲ្យមានការកើនឡើងនៃក្រុមជ្រុលនិយមរដ្ឋអ៊ីស្លាម នៅពេលដែលរដ្ឋាភិបាល ស៊ីរីប្រើអំពើហិង្សាទៅលើជនស៊ីវិល៕