ភ្ជាប់​ទៅ​គេហទំព័រ​ទាក់ទង

អង្គការ​សិទ្ធិ​មនុស្ស​ Human Rights Watch ​គាប​សង្កត់​ឲ្យ​ធ្វើ​កំណែ​ទម្រង់​ក្នុង​ប្រទេស​វៀត​ណាម

  • Ron Corben

ប៉ូលិស (ជួរកណ្តាល) អង្គុយ​យាម គ្រាដែល​អ្នកទោស​រង់ចាំ​ការដោះលែង​ពី​ពន្ធនាគារ Hoang Tien ដែល​ស្ថិត​នៅ​ចម្ងាយ​ប្រមាណជា ១០០គីឡូម៉ែត្រ ពី​ទីក្រុង​ហាណូយ នៅ​ថ្ងៃ​ទី៣០ ខែសីហា ឆ្នាំ២០១៤។

អង្គការ​សិទ្ធិ​មនុស្ស ​Human Rights Watch ​ដែល​មាន​ទី​តាំង​ក្នុង​ទីក្រុង​ញូយ៉កកំពុង​បង្កើនការ​ភ្ញាក់​ផ្អើលលើ​ការ​រំលោភ​ធ្វើ​បាប​របស់​ប៉ូលិសនៅ​ក្នុង​ប្រទេស​វៀត​ណាម។ អង្គការ​សិទ្ធិ​មនុស្ស​នោះ​បាន​ប្រាប់​ឲ្យ​ដឹង​ទៀត​ថា​ ​មាន​ការ​កើន​ឡើង​នូវ​របាយការណ៍ស្តីពី​ការ​ធ្វើ​ទារុណ​កម្ម​ និង​ការ​ស្លាប់​របស់​ពួក​អ្នក​ទោសនៅ​ក្នុង​ការ​ឃុំឃាំង​របស់​ប៉ូលិស ​ជា​ពិសេស​នៅ​ក្នុង​តំបន់​ដាច់​ស្រយាល។ ​ក្នុងប៉ុន្មាន​សប្តាហ៍​ថ្មីៗ​នេះ ​ពួក​រដ្ឋ​អំណាច​វៀត​ណាម ​បាន​ប្រកាសពី​វិធានការ​ដើម្បី​ដោះស្រាយ​ស្ថាន​ភាព​នេះ។​

កាល​ពី​ជិត​២​ឆ្នាំ​មុន ​Nguyen Tuan Thanh ​និង​មិត្ត​ភ័ក្រ្ត​ឈ្មោះ ​Pham Quoc Nhat​ ​បាន​ត្រូវ​ប៉ូលិសនៅខេត្ត ​Dong Thap​ ចាប់​ខ្លួន​ពី​បទ​សង្ស័យ​ថា​ ជា​ចោរ។​

Pham Quoc Nhat ​និយាយ​ថា ​នៅពេល​ដែល​ពួកគេ​បាន​មក​ដល់​ប៉ុស្តិ៍ប៉ូលិសមូលដ្ឋាន​ ​ពួកគេ​បាន​ត្រូវរង​ការ​វាយដំយ៉ាង​ខ្លាំងនៅ​លើ​ករដៃ ​ជើង​និង​កន្លែង​ផ្សេងៗ​ទៀត។​

Pham Quoc Nhat ​និយាយ​ទៀត​ថា ​នៅ​ថ្ងៃ​បន្ទាប់​ ប្រហែល​ពេល​ថ្ងៃ​ត្រង់​ ​គេ ​លែង​ឮ​សូរ​សម្រែក​របស់ ​Thanh ​នៅ​ក្នុង​បន្ទប់​ឃុំឃាំង​ទៀត​ហើយ។​

Thanh ​បាន​ស្លាប់​នៅ​ក្នុង​ការ​ឃុំឃាំង​ មុនពេល​ប៉ូលិសដឹក​គាត់ទៅ​កាន់​មន្ទីរពេទ្យ។​

ករណី​របស់​ Thanh​ ​ជាករណី​មួយ​នៃ​ករណី​រាប់​សិប ដែល​ត្រូវ​បាន​ធ្វើ​ជា​ភស្តុតាង ដែលអង្គការ​សិទ្ធិ​មនុស្ស​Human Rights Watch ​លើក​នៅ​ក្នុង​របាយ​ការណ៍​កាលពេល​ថ្មីៗ​បំផុត​នេះរបស់​ខ្លួន​ថា ជា​ឧទាហរណ៍​នៃ​អ្វី​ដែល​អង្គការ​សិទ្ធិ​មនុស្ស​នោះហៅ​ថា ​ការ​រំលោភ​និង​ការ​រងរ​បួស​យ៉ាង​ខ្លាំងរបស់ពលរដ្ឋ​សាមញ្ញ​វៀត​ណាម ខណៈ​ដែល​ស្ថិតនៅ​ក្នុង​ការ​ឃុំ​ឃាំង​របស់​ប៉ូលិស។​

អង្គការ​សិទ្ធិ​មនុស្ស​នោះ​និយាយ​យោង​ដល់​ករណី​របស់​មនុស្ស​២៨​នាក់​ដែល​បាន​ស្លាប់​នៅ​ក្នុង​ការ​ឃុំ​ឃាំង​ដោយ​មាន​ ឬ​គ្មាន​ការ​ពន្យល់​ឲ្យ​បាន​គ្រប់​គ្រាន់​ ​ចាប់​តាំង​ពី​ការ​ចោទ​ប្រកាន់​ពី​ការ​ធ្វើ​អត្ត​ឃាតុ​រហូតដល់​ការ​ស្លាប់​ដោយ​ជំងឺ ​ហើយ​២២​ករណី​ទៀត​មាន​ការ​វាយ​ដំយ៉ាង​ខ្លាំង ​រួម​មានក្មេង​ប្រុស​អាយុ​១១​ឆ្នាំ​ម្នាក់​ផង។​

លោក ​Phil Robertson ​អនុប្រធាន​ទទួល​បន្ទុក​តំបន់​អាស៊ី​របស់​អង្គការ​សិទ្ធិ​មនុស្ស​ Human Rights Watch ​និយាយ​ថា ​ការ​ចោទ​ប្រកាន់ពី​ការ​រំលោភ​ធ្វើ​បាប​ដោយប៉ូលិស​ដល់​អ្នក​ដែល​ស្ថិត​ក្នុង​ការ​ឃុំ​ឃាំង​ប៉ូលិស ​បាន​រីកកាន់​តែ​ធំ។ របាយ​ការណ៍​នោះ​បាន​តាម​ដាន​ករណី​រំលោភ​សិទ្ធិ​មនុស្ស​នៅ​ក្នុង​ខេត្ត​ចំនួន៤៤​នៃ​ខេត្ត​ចំនួន​៥៨​របស់​វៀត​ណាម។

«របាយ​ការណ៍​នេះក៏និយាយពី​កសិករ ​និង​ពាណិជ្ជករ ​អ្នក​រកស៊ី​ក្នុង​មូលដ្ឋាន​ ​និស្សិត ​ហើយ​នឹង​មនុស្ស​ផ្សេង​ទៀតដែល​បាន​ស្ថិត​នៅ​ក្នុង​ការ​ឃុំ​ឃាំង​របស់​ប៉ូលិសចំពោះ​សកម្មភាពដែល​អ្នក​ ឬ​ខ្ញុំ​ចាត់​ទុក​ថា ​ជា​រឿង​ធម្មតា​ ​ហើយ​ដែល​នៅទី​នោះ​ ​ច្បាប់​បាន​ត្រូវ​រំលោភ​ដោយ​សារ​ការ​ប្រព្រឹត្ត​បទ​ល្មើស​តិច​តួច ប៉ុន្តែ​មនុស្ស​ទាំង​នោះ​បាន​ស្លាប់​ ឬ​រង​របួស​ដោយ​សារ​ប៉ូលិស​វាយ​ដំ​លើ​ពួកគេ​ ​ខណៈ​ដែល​ពួកគេ​ស្ថិត​នៅ​ក្នុង​ការ​ឃុំ​ឃាំង​របស់​ប៉ូលិស»។​

របាយ​ការណ៍​នោះ​បាន​លើក​យក​ករណី​ទាំង​នេះ​ពី​ការ​ចុះ​ផ្សាយនៅ​ក្នុង​កាសែត​ផ្សាយ​ជា​ភាសា​វៀត​ណាមដែល​ត្រួតត្រា​ដោយ​រដ្ឋាភិបាល ​ពី​អ្នក​សរសេរ​ប្លុក​ឯករាជ្យ ​ពីអ្នក​កាសែត​ជា​ពលរដ្ឋ និង​បណ្តាញ​ផ្សាយ​ព័ត៌មាន​បរទេស។​

អង្គការ​សិទ្ធិ​មនុស្ស ​Human Rights Watch ​ប្រាប់​ឲ្យ​ដឹង​ទៀត​ថា ​ការ​ស្លាប់​ ​ជា​រឿយៗ ​បាន​កើត​មាន​ឡើង​នៅពេល​ដែល​ប៉ូលិស​ប្រើ​ប្រាស់អំពើ​ហិង្សា​និងធ្វើ​ទារុណកម្មដើម្បី​បង្ខំ​ឲ្យ​សារភាព។ ​អង្គការ​សិទ្ធិ​មនុស្ស​ប្រាប់​ឲ្យ​ដឹង​ទៀត​ថា ​ខណៈ​ដែល​ប៉ូលិស​មាន​ជាប់ការ​ទាក់​ទង​នោះ​ ​ជា​រឿយៗពួកគេ មិន​បាន​ប្រឈមនឹង​ការដាក់​ពិន័យ​ ឬ​ទណ្ឌកម្ម​ស្រាលៗ​ ថ្វីបើអំពើ​របស់​គេ​ជាឧក្រិដ្ឋ​កម្ម​ដ៏​ធ្ងន់​ធ្ងក៏ដោយ។​

លោក​ Robertson ​និយាយ​បន្ត​ទៀត​ថា ​សកម្មភាព​ទាំង​នេះទំនង​ជាវិបត្តិ​ដ៏​ធ្ងន់​ធ្ងរ​ឡើង​នៅ​ក្នុង​កង​កម្លាំង​ប៉ូលិស​វៀត​ណាម​ ​ជាពិសេសនៅ​ថ្នាក់​ខេត្តដែល​ប៉ូលិស ជា​រឿយៗ​ ​បាន​ទទួល​ការ​ហ្វឹក​ហាត់ និងការ​ជួយ​ឧបត្ថម្ភ​តិចតួច។​

«អ្វី​ដែល​យើង​បាន​រក​ឃើញ​គឺ​វិបត្តិសិទ្ធិ​មនុស្សនៅ​ក្នុង​កិច្ច​ប្រតិបត្តិការ​ប្រចាំ​ថ្ងៃ​របស់​ប៉ូលិស​វៀតណាម។ ​យើង​ជឿ​ជាក់​ថា ​អ្វី​ដែល​យើង​កំពុង​ឃើញ​សព្វ​ថ្ងៃ​នេះ ​ជា​តម្រុយ​តូច​មួយ​នៃ​ការ​រំលោភ​ដ៏​ធំ»។​

អង្គការ​សិទ្ធិ​មនុស្ស​នោះ​បាន​ប្រាប់​ឲ្យ​ដឹង​ទៀត​ថា ​ត្រូវមាន​កំណែ​ទម្រង់​កាន់​តែ​ខ្លាំង​ ​ត្រូវ​មាន​តម្លាភាព​កាន់​តែ​ធំ​ឡើង ​ហើយ​នឹង​ការ​ទទួល​ខុស​ត្រូវ​សម្រាប់អ្នកដែល​ស្ថិត​នៅ​ក្នុង​ការ​ឃុំឃាំង​របស់​ប៉ូលិស​ ​និង​ត្រូវមាន​ការ​ស៊ើប​អង្កេត​មិន​លម្អៀងពាក់​ព័ន្ធ​នឹង​ភាព​ព្រៃផ្សៃ​របស់​ប៉ូលិស។​

លោក​Robertson ​និយាយ​ទៀត​ថា ​ក្រុម​គ្រួសារ​របស់​ជន​រងគ្រោះ​ក៏​ប្រឈម​ការ​លំបាកដែរ ​នៅពេល​ដែល​ត្រូវ​គេ​គាប​សង្កត់​ឲ្យ​ការ​ឆ្លើយ​តប​ជា​ផ្លូវការអំពី​ឧក្រិដ្ឋ​កម្ម​ប្រឆាំង​នឹង​សាច់​ញាតិ​របស់​ខ្លួន​នោះ។​

«ក្រុម​គ្រួសារវៀតណាម​សាមញ្ញ​ទាំង​នោះ​គឺ​ក្រុម​គ្រួសារ​របស់ជន​រងគ្រោះ​ ត្រូវ​ប្រឈម​បញ្ហាដែលត្រូវ​បង្កើន​សំឡេង​ល្មម​គ្រប់​គ្រាន់អំពីករណី​នៃ​ការ​ស្លាប់​ ឬ​រងរបួស​របស់​សាច់​ញាតិ​របស់​ខ្លួន​ ដើម្បីជំរុញឲ្យ​ពួក​មន្រ្តី​ជាន់​ខ្ពស់​ ឬ​បណ្តាញ​ផ្សាយ​ព័ត៌មានធ្វើ​អន្តរាគមន៍​ ​និង​ធ្វើ​ឲ្យ​ប្រាកដថា ​មាន​ការ​ស៊ើប​អង្កេតកាន់​តែខ្លាំង​ឡើង»។​

ពួក​រដ្ឋ​អំណាច​ក្នុង​ប្រទេស​វៀត​ណាម​កំពុង​ចាត់​វិធានការ​ខ្លះ​ដើម្បី​ដោះ​ស្រាយបញ្ហា​នេះ។​

កាល​ពី​ថ្ងៃ​ទី១១ ​ខែ​កញ្ញា ​Tran Dai Quang ​រដ្ឋ​មន្រ្តី​សន្តិសុខសាធារណៈ​របស់​វៀតណាមបាន​សារភាព​នៅ​មុខ​គណៈកម្មាធិការ​សភា​ជាតិ​វៀតណាមថា ​មានមន្រ្តី​ប៉ូលិស​១៩​នាក់​បាន​ត្រូវ​ដក​បុណ្យ​ស័ក្តិ​ ​ហើយ​អាច​ប្រឈមការ​ចោទ​ប្រកាន់​ពីបទ​ឧក្រិដ្ឋ​កម្ម​ ដោយ​ការ​ប្រើប្រាស់​អ្វី​ដែល​លោក​បាន​ហៅ​ថា ​ ការ​ធ្វើ​ទារុណ​កម្ម​លើ​រាងកាយ។​

ក្រសួង​សន្តិសុខ​សាធារណៈ​ក៏​បាន​ប្រាប់​ឲ្យ​ដឹង​ដែរ​ថា ​ជាង​៣​ឆ្នាំ​កន្លង​មក​នេះ ​ខ្លួន​បាន​ស៊ើប​អង្កេត​១៨៣​ករណី​ផ្សេង​ទៀត​ដែល​ទាក់​ទិន​នឹង​ប៉ូលិសដែល​បាន​ប្រឈម​ទណ្ឌកម្ម​ខាង​រដ្ឋ​បាល​ ​ដូច​ជា​ត្រូវ​បណ្តេញ​ចេញ​ពី​តំណែង​ បញ្ចុះ​ស័ក្តិ ឬផ្ទេរ​ការងារ៕​

ប្រែ​សម្រួល​ដោយ​លោក​ ជឹង ​ប៉ូជីន

XS
SM
MD
LG