អង្គការសិទ្ធិមនុស្សមួយបាននិយាយថា ខ្លួនបានរកឃើញទីតាំងជាច្រើនរយកន្លែង ដែលប្រទេសកូរ៉េខាងជើងត្រូវរងការចោទប្រកាន់ថាប្រើដើម្បីអនុវត្តការប្រហារជីវិត ជាសាធារណៈ ដែលនេះជាមធ្យោបាយមួយក្នុងការបំភិតបំភ័យពលរដ្ឋ។
អង្គការក្រុមការងារយុត្តិធម៌អន្តរកាល (Transitional Justice Working Group ) មានមូលដ្ឋាននៅក្នុងទីក្រុងសេអ៊ូល បាននិយាយកាលពីថ្ងៃអង្គាថា ខ្លួនបានរកឃើញទីលានប្រហារជីវិតទាំងនោះ ដោយផ្អែកទៅលើបទសម្ភាសន៍ជាមួយនឹងអ្នកចុះចូលកូរ៉េខាងជើង ៦១០ នាក់ ហើយនឹងប្រើប្រាស់រូបភាពផ្កាយរណប។
អង្គការសិទ្ធិមនុស្សនេះ បានដាក់បញ្ចូលរបាយការណ៍នានាអំពីការប្រហារជីវិត មនុស្សជាង១០នាក់ នៅក្នុងពេលតែមួយ ហើយនិយាយថា ការប្រហារជីវិតភាគច្រើន បំផុតត្រូវគេកត់ត្រាទុកនោះ គឺជាការចងបាញ់សម្លាប់។
អង្គការនេះបាននិយាយថា មនុស្សរាប់រយនាក់ប្រមូលផ្តុំគ្នាមើលការប្រហារជីវិតនោះ ហើយហេតុផលមួយគឺថាការប្រហារជីវិតជាសាធារណៈនេះគឺដើម្បីបំបាក់ស្មារតីឲ្យសាធារណជនភ័យខ្លាច។
អ្នកនិពន្ធរបាយការណ៍ម្នាក់ គឺលោក ហ៊ីសឹក ស្ស៊ីម (Heeseok Shim) និយាយថាកិច្ចសម្ភាសន៍ជាមួយអ្នកចុះចូលកូរ៉េខាងជើងបានប្រាប់ថា ការប្រហារជីវិតនជាសាធារណៈក្នុងប្រទេសកូរ៉េខាងជើងនេះមិនបានកើតឡើងញឹកញាប់ទេ បើទោះជាវាមិនច្បាស់លាស់ថាតើមានមនុស្សជាច្រើនត្រូវគេសម្លាប់ដោយស្ងាត់ឬក៏យ៉ាងណា៕
