ចាប់ពីថ្ងៃទី ១៥ ខែកញ្ញា ក្រុមហ៊ុនទូរគមនាគមន៍យក្សរបស់ចិន Huawei ដែលធ្លាប់ជានិមិត្តរូបនៃបច្ចេកវិទ្យាជាន់ខ្ពស់របស់ចិន ត្រូវបានកាត់ផ្តាច់ លែងទទួលបានការផ្គត់ផ្គង់បន្ទះអេឡិចត្រូនិក ឬ semiconductor ចាំបាច់ទៀតហើយ។ ប្រសិនបើជាគ្មានបន្ទះ chip ទាំងនោះ ក្រុមហ៊ុន Huaweiមិនអាចបង្កើតទូរស័ព្ទទំនើប smartphone ឬឧបករណ៍ 5G ដែលក្រុមហ៊ុននេះ ពឹងផ្អែកបានទេ។ នេះបើយោងតាមអ្នកវិភាគផ្នែកពាណិជ្ជកម្ម។
ទណ្ឌកម្មប្រឆាំងនឹងក្រុមហ៊ុនបច្ចេកវិទ្យាដ៏ជោគជ័យបំផុតរបស់ចិន ត្រូវបានប្រកាស កាលពីខែសីហា នៅពេលដែលសហរដ្ឋអាមេរិកណែនាំច្បាប់វិន័យថ្មី ដែលហាមឃាត់ក្រុមហ៊ុននេះដែលបង្កើតបន្ទះអេឡិចត្រូនិកពីបណ្តាប្រទេសនានាដែលពឹងលើបច្ចេកវិទ្យាអាមេរិក មិនឲ្យលក់បន្ទះ chip ទៅឲ្យក្រុមហ៊ុន Huawei បើមិនមានអាជ្ញាប័ណ្ណពិសេសជាមុន។
ប៉ុន្មានសប្តាហ៍ថ្មីៗនេះ ក្រុមហ៊ុនផ្គត់ផ្គង់មកពីកូរ៉េខាងត្បូងនិងតៃវ៉ាន់ បានបង្ហាញថា ពួកគេគោរពតាមការដាក់ទណ្ឌកម្មនោះ ហើយឈប់ផ្គត់ផ្គង់បន្ទះអេឡិចត្រូនិកឲ្យក្រុមហ៊ុន Huawei ចាប់ពីថ្ងៃទី ១៥ ខែកញ្ញា ជាថ្ងៃដែលវិធានការថ្មីប្រឆាំងនឹងក្រុមហ៊ុនចិនត្រូវបានអនុវត្ត។
លោក Richard Yu នាយកប្រតិបត្តិផ្នែកអាជីវកម្មរបស់ក្រុមហ៊ុន Huawei បាននិយាយកាលពីខែសីហាថា៖ «ជាអកុសលនៅក្នុងទណ្ឌកម្មលើកទីពីររបស់សហរដ្ឋអាមេរិក ក្រុមហ៊ុនផលិតបន្ទះ chip ឲ្យយើងទទួលបញ្ជាទិញត្រឹមតែថ្ងៃទី ១៥ ខែឧសភា។ ផលិតកម្មបន្ទះ chip បានឈប់កាលពីថ្ងៃទី ១៥ ខែកញ្ញា។ ដោយសារមិនមានក្រុមហ៊ុនផលិតបន្ទះ chip នៅប្រទេសចិន ក្រុមហ៊ុន Huawei ប្រឈមនឹងបញ្ហាគ្មានបន្ទះ chip»។
ក្នុងកិច្ចខិតខំប្រឹងប្រែងរបស់ចិន ដើម្បីក្លាយជាប្រទេសនាំមុខគេផ្នែកបច្ចេកវិទ្យាទំនើបលើសាកលលោក រោងចក្រនានាក្នុងពិភពលោក មិនទាន់អាចផលិតបន្ទះអេឡិចត្រូនិកកំពូល ក្នុងផ្នែកសំខាន់មួយគឺបន្ទះមីក្រូ chip ដែលជាប្រព័ន្ធប្រសាទដំណើរការស្ទើតែគ្រប់ឧបករណ៍បច្ចេកវិទ្យា។
សញ្ញាសម្គាល់សំខាន់នៃកម្រិតស្មុគស្មាញរបស់បន្ទះមីក្រូ Chip គឺថាតើមានត្រង់ស៊ីស្ទ័រប៉ុន្មានអាចដាក់លើផ្ទៃរបស់វាបាន។ បើបន្ទះមីក្រូ chip មានទំហំកាន់តែតូច ដែលប្រើរង្វាស់ណាណូម៉ែត្រនោះបន្ទះមីក្រូ chip នោះនឹងកាន់តែទំនើប។
ដំណើរការផលិតកម្មរបស់ចិនដ៏ល្អបំផុតត្រូវបានជឿថា អាចផលិតបន្ទះមីក្រូ chip ទំហំត្រឹម ១៤ ណាណូម៉ែត្រ ដែលយឺតជាងក្រុមហ៊ុន Samsung និងក្រុមហ៊ុនផលិតបន្ទះអេឡិចត្រូនិកតៃវ៉ាន់ (TSMC) ជាច្រើនជំនាន់។ ក្រុមហ៊ុន Samsung បានឈានដល់ស្តង់ដារនេះ កាលពីឆ្នាំ ២០១៤។ ក្រុមហ៊ុន TSMC ដែលជាក្រុមហ៊ុនដ៏ធំបំផុតក្នុងពិភពលោកក្នុងការបង្កើតបន្ទះ chip កំពុងផលិតបន្ទះ chip ដែលមានទំហំ ៥ ណាណូម៉ែត្រ។
ខណៈដែលក្រុមហ៊ុនផលិតបន្ទះអេឡិចត្រូនិកទំនើបបំផុតមួយចំនួន មានមូលដ្ឋាននៅខាងក្រៅសហរដ្ឋអាមេរិក ឧស្សាហកម្មនេះពឹងផ្អែកយ៉ាងខ្លាំងលើក្រុមហ៊ុនផ្គត់ផ្គង់ឲ្យសហរដ្ឋអាមេរិក ដើម្បីផ្គត់ផ្គង់គ្រប់យ៉ាង តាំងពីការរចនាកម្មវិធី software ដល់ឧបករណ៍ផលិត។
រដ្ឋាភិបាលក្រុងវ៉ាស៊ីនតោនពីដំបូងបានដាក់ក្រុមហ៊ុន Huawei ក្នុងបញ្ជីពាណិជ្ជកម្មខ្មៅ កាលពីខែឧសភា ឆ្នាំ ២០១៩ ដោយលើកឡើងពីការបារម្ភទៅលើផ្នែកសន្តិសុខជាតិ។ ទោះជាយ៉ាងណា ការហាមឃាត់នេះ មិនបានរួមបញ្ចូលបន្ទះ chip ដែលផលិតដោយប្រទេសដទៃទេ។ កាលពីខែឧសភា សហរដ្ឋអាមេរិកបានបន្ថែមការហាមឃាត់ ដោយកាត់ផ្តាច់ក្រុមហ៊ុន Huawei ពីក្រុមហ៊ុនផ្គត់ផ្គង់ពីប្រទេសផ្សេងៗ ដែលបានធ្វើឲ្យប៉ះពាល់ដល់ក្រុមហ៊ុនផលិតបន្ទះអេឡិចត្រូនិកចិនផ្ទាល់ ដែលមានទីផ្សារក្នុងប្រទេសចិន។
តើក្រុមហ៊ុន Huawei នឹងឆ្លងផុតដំណាក់កាលនេះទេ?
វានៅតែមិនមានភាពច្បាស់លាស់ថា តើក្រុមហ៊ុន Huawei នឹងអាចទិញបន្ទះ chip ពីណាបានទេ។ ក្រុមហ៊ុនផលិតបន្ទះ chip តៃវ៉ាន់ MediaTek បាននិយាយកាលពីខែមុនថា ខ្លួនបានដាក់ពាក្យស្នើសុំទៅរដ្ឋាភិបាលសហរដ្ឋអាមេរិក ដើម្បីសុំការអនុញ្ញាតបន្តផ្គត់ផ្គង់ក្រុមហ៊ុន Huawei បន្ទាប់ពីច្បាប់អាមេរិកថ្មីបានចូលជាធរមាន។ ក្នុងពេលនេះ ក្រុមហ៊ុន Huawei ត្រូវបានគេរាយការណ៍ថា បានស្តុកទុកស៊ីលីខូន ដែលអាចប្រើប្រាស់បានពីរឆ្នាំ ដើម្បីអាចឲ្យអាជីវកម្មខ្លួននៅដំណើរការបាន។
លោក Lee ដែលការស្រាវជ្រាវផ្តោតលើការរីកចម្រើនបច្ចេកវិទ្យាឌីជីថលចិន បាននិយាយថា៖ «ក្នុងរយៈពេលខ្លី វាមានការពិបាកក្នុងការស្វែងរកជម្រើសណា ដែលមានប្រសិទ្ធិភាពសម្រាប់ក្រុមហ៊ុនចិននានា ដែលជាគោលដៅរបស់ការគ្រប់គ្រងការនាំចេញរបស់សហរដ្ឋអាមេរិក លើបន្ទះអេឡិចត្រូនិក»។
តែសម្រាប់អនាគត អ្នកវិភាគនានានិយាយថា សហរដ្ឋអាមេរិកនឹងមិនអាចបញ្ឈប់ចិនពីការផលិតបន្ទះអេឡិចត្រូនិកចាំបាច់បានទេ។ នៅពេលដែលមានពេលវេលាគ្រប់គ្រាន់ ទីផ្សារអ្នកប្រើប្រាស់អេឡិចត្រូនិកដ៏ធំរបស់ប្រទេសនេះ រួមនឹងការវិនិយោគជាច្រើនទសវត្សរ៍នៅទីបំផុត នឹងបង្កើតឲ្យមានក្រុមហ៊ុនផលិតបន្ទះ chip ដោយខ្លួនឯង។
លោក Lee បានសរសេរនៅក្នុងអ៊ីម៉ែលថា៖ «ក្នុងរយៈពេលមធ្យមនិងយូរអង្វែង ប្រទេសចិននឹងអាចជំនួសបច្ចេកវិទ្យាអាមេរិក និងអភិវឌ្ឍខ្សែសង្វាក់ផ្គត់ផ្គង់បន្ទះអេឡិចត្រូនិកក្នុងស្រុកពេញលេញ ប៉ុន្តែថា តើប្រទេសនេះអាចដេញតាមបច្ចេកវិទ្យាដ៏ទំនើបរបស់ក្រុមហ៊ុនបរទេសទាន់ឬយ៉ាងណា អាចជាបញ្ហាមួយផ្សេងទៀត»។
លោក James Lewis នាយកនៃកម្មវិធីគោលនយោបាយបច្ចេកវិទ្យា នៅមជ្ឈមណ្ឌលសម្រាប់ការសិក្សាអន្តរជាតិនិងយុទ្ធសាស្ត្រ (CSIS) បានសរសេរ កាលពីខែឧសភាថា ក្រុមហ៊ុន Huawei បានរងផលប៉ះពាល់ ដោយសារកិច្ចខិតខំប្រឹងប្រែងរបស់សហរដ្ឋអាមេរិក «ប៉ុន្តែរដ្ឋាភិបាលចិននឹងមិនអនុញាតឲ្យក្រុមហ៊ុននេះដួលរលំទេ ព្រោះក្រុមហ៊ុន Huawei មានសារៈសំខាន់ខ្លាំង»៕
ប្រែសម្រួលដោយ កញ្ញា ទុំ ម្លិះ
