រយៈពេលប៉ុន្មានថ្ងៃបន្ទាប់រដ្ឋាភិបាលទីក្រុងហុងកុងដកចេញបម្រាមឱ្យប្រជាជនពាក់ម៉ាស អ្នករស់នៅក្នុងទីក្រុងហុងកុងភាគច្រើននៅតែបន្ដពាក់ម៉ាសដើម្បីការពារពីជំងឺកូវីដ១៩។ នេះគឺជាការសម្រេចចិត្តមួយដែលបង្ហាញការព្រួយបារម្ភបន្ត សម្រាប់មនុស្សមួយចំនួនអំពីសុខភាព ហើយសម្រាប់មនុស្សមួយចំនួនទៀតគឺជាការបង្ហាញអំពីការមិនជឿជាក់លើរដ្ឋាភិបាល។
លោក Tam Mei Tak ដែលជាអ្នកសម្របសម្រួលកម្មវិធីជជែកកម្សាន្ដមួយតាមវិទ្យុ និងជាអ្នកធ្វើអត្ថាធិប្បាយអំពីនយោបាយ បានថ្លែងប្រាប់ VOA ផ្សាយជាភាសាចិនកាតាំងថា អ្នករស់នៅក្នុងទីក្រុងហុងកុងជាច្រើននាក់បានដឹងថា «ការជឿទុកចិត្តលើរដ្ឋាភិបាលគឺមានភាពអាក្រក់ជាងពឹងផ្អែកលើខ្លួនឯងទៅទៀត»នៅក្នុងការប្រយុទ្ធប្រឆាំងនឹងការរាតត្បាតជំងឺកូវីដ១៩។
រដ្ឋាភិបាលទីក្រុងហុងកុងបានដកចេញជាផ្លូវការនូវបម្រាមពាក់ម៉ាសកាលពីថ្ងៃពុធ ទី ១ ខែមីនា។ ការតម្រូវឱ្យពាក់ម៉ាសនេះត្រូវបានធ្វើឡើងនៅរយៈពេល ៣ ឆ្នាំចុងក្រោយនេះ ដែលធ្វើឱ្យទីក្រុងដែលធ្លាប់ស្ថិតក្រោមអាណានិគមអង់គ្លេសមួយក្លាយជាទីក្រុងចុងក្រោយបង្អស់នៅក្នុងពិភពលោកដែលលែងតម្រូវឱ្យពលរដ្ឋពាក់ម៉ាស។ ចាប់តាំងពីដើមខែធ្នូមក ភ្លាមៗបន្ទាប់ពីចិនបន្ធូរបន្ថយគោលនយោបាយ«សូន្យកូវីដ»របស់ខ្លួន ទីក្រុងហុងកុងបានដកចេញនូវការរឹតត្បិតភាគច្រើនរបស់ខ្លួន ដោយរួមមានទាំងការដាក់កម្រិតលើការប្រមូលផ្ដុំគ្នា និងការតម្រូវឱ្យមានភស្តុតាងអំពីការចាក់វ៉ាក់សាំងបង្ការដើម្បីអាចចូលក្នុងភោជនីយដ្ឋាន រង្គសាល និងកន្លែងផ្សេងៗទៀត។
អ្នករស់នៅក្នុងទីក្រុងហុងកុងមួយចំនួនថ្លែងប្រាប់ VOA ផ្សាយជាភាសាចិនកាតាំងថា ពួកគេនៅតែបន្ដពាក់ម៉ាសដើម្បីបង្ការជំងឺ ដែលម្នាក់ក្នុងចំណោមនោះគឺអ្នកស្រី Ah San។
អ្នកស្រីថ្លែងប្រាប់ VOA ផ្សាយជាភាសាចិនកាតាំងថា អ្នកស្រីនៅតែបន្ដពាក់ម៉ាសទោះជាគេលែងតម្រូវ «ដោយសារតែខ្ញុំមិនដែលឈឺទេតាំងពីពាក់ម៉ាសមក ហើយក៏មិនដែលទៅពេទ្យដែរ។ ខ្ញុំមិនដែលមានជំងឺផ្ដាសាយទេក្នុងរយៈពេល ៣ ឆ្នាំមកនេះ ដូច្នេះខ្ញុំគិតថា ការពាក់ម៉ាសគឺល្អជាងក្នុងការពារសុខភាពរបស់ខ្ញុំ»។
អ្នកស្រីបានបន្ថែមទៀតថា «ខណៈដែលរដ្ឋាភិបាលមិនចេញផ្សាយទិន្នន័យជាសាធារណៈ យើងមិនដឹងទេថាតើមានមនុស្សឆ្លងជំងឺនេះកំពុងដើរតាមផ្លូវដែរឬទេ។ ដូច្នេះ ខ្ញុំគិតថា វាសំខាន់ជាងក្នុងការការពារខ្លួនខ្ញុំ»។
អ្នកស្រី Alice ជាអ្នករស់នៅក្នុងទីក្រុងហុងកុងម្នាក់ដែលបើកភោជនីយដ្ឋានបែបជប៉ុន និងស្នើសុំមិនបញ្ចេញឈ្មោះពេញដើម្បីកុំឱ្យទាក់ទាញចំណាប់អារម្មណ៍របស់ក្រុមមន្ត្រី បានប្រាប់ VOA ផ្សាយជាភាសាចិនកាតាំងថា នៅពេល«ការតម្រូវឱ្យពាក់ម៉ាស»ត្រូវបានដកចេញ អ្នកស្រីបង្ហោះរូបថតរបស់អ្នកស្រីគ្មានពាក់ម៉ាសភ្លាមៗលើបណ្ដាញសង្គម។ អ្នកស្រីនិយាយថា អ្នកស្រីមានអារម្មណ៍សប្បាយរីករាយយ៉ាងខ្លាំងក្នុងការទៅដើរទិញឥវ៉ាន់ដោយមិនចាំបាច់ពាក់ម៉ាសនៅរសៀលថ្ងៃដដែលនោះ ដោយគិតថា ជីវិតវិលត្រឡប់ទៅរកស្ថានភាពមុនពេលមានកូវីដ១៩វិញ ហើយ។ ប៉ុន្តែនៅពេលដែលអ្នកស្រីឃើញមនុស្សជាច្រើននៅតែបន្ដពាក់ម៉ាសនៅតាមផ្លូវ អ្នកស្រីនិយាយថា អ្នកស្រីមានអារម្មណ៍ថាខុស។
លោក Simon Lee អ្នកធ្វើអត្ថាធិប្បាយអំពីនយោបាយនៅទីក្រុងហុងកុង ដែលបច្ចុប្បន្នរស់នៅក្នុងរដ្ឋ Virginia ថ្លែងថា ប្រតិកម្មរបស់អ្នករស់នៅក្នុងទីក្រុងហុងកុងដែលនៅតែបន្ដពាក់ម៉ាសក៏ឆ្លុះបញ្ចាំងអំពីការមិនជឿទុកចិត្តរបស់សាធារណជនទៅលើរដ្ឋាភិបាលហុងកុងផងដែរ។ លោកនិយាយថា អ្នករស់នៅក្នុងទីក្រុងហុងកុងជាច្រើនជឿថា វិធានការទប់ស្កាត់ការឆ្លងរាតត្បាតជំងឺកូវីដ១៩របស់រដ្ឋាភិបាលទីក្រុងហុងកុងគ្មានមូលដ្ឋានវិទ្យាសាស្ត្រ។
លោកនិយាយថា វាច្បាស់ណាស់ថាក្នុងរយៈពេល៣ឆ្នាំមកនេះ «សាធារណជនបានដឹងច្បាស់ថារដ្ឋាភិបាលគ្មានមូលដ្ឋានវិទ្យាសាស្ត្រច្បាស់លាស់នោះទេក្នុងការទប់ស្កាត់ជំងឺឆ្លងរាតត្បាត ហើយផ្ទុយទៅវិញ គ្រប់គ្នាធ្វើទៅតាមការយល់ឃើញរបស់ខ្លួន»៕
ប្រែសម្រួលដោយអ្នកស្រី ហុង ចិន្ដា
