សាកលវិទ្យាល័យនានានៅប្រទេសចិនកំពុងបញ្ជូននិស្សិតរបស់ខ្លួនទៅកាន់គេហដ្ឋានវិញ ខណៈគណបក្សកុម្មុយនីស្តចិនរឹតបន្តឹងវិធានការបង្ការកូវីដ និងព្យាយាមបង្ការកុំឱ្យមានបាតុកម្មបន្ថែមទៀត បន្ទាប់ពីមានហ្វូងមនុស្សដែលខឹងសម្បានឹងវិធានការតឹងតែងបំបាត់ជំងឺកូវីដឱ្យអស់ទាំងស្រុងឬហៅថា «សូន្យកូវីដ» (Zero Covid) បានអំពាវនាវឱ្យប្រធានាធិបតីចិនលោក Xi Jinping ចុះចេញពីតំណែង នៅក្នុងការបង្ហាញការប្រឆាំងរបស់សាធារណជនដ៏ខ្លាំងបំផុតជាច្រើនទសវត្សរ៍មកនេះ។ នេះបើតាមការរាយការណ៍របស់ទីភ្នាក់ងារព័ត៌មាន AP។
ដោយក្រុមប៉ូលិសបានចេញមកពង្រឹងកម្លាំងយ៉ាងព្រោងព្រាត គេមិនឮមានការប្រកាសពីបាតុកម្មកាលពីថ្ងៃអង្គារ ទី ២៩ ខែវិច្ឆិកា នៅទីក្រុងប៉េកាំង សៀងហៃ ឬទីក្រុងធំៗដទៃទៀតនោះទេ។
វិធានការរឹតបន្តឹងបង្ការជំងឺកូវីដខ្លះត្រូវបានបន្ធូរបន្ថយកាលពីថ្ងៃចន្ទ ដែលអាចជាកិច្ចប្រឹងប្រែងដើម្បីបន្ថយកំហឹងសាធារណជនបន្ទាប់ពីបាតុកម្មកាលពីចុងសប្តាហ៍នៅតាមបណ្ដាទីក្រុងយ៉ាងហោចណាស់ចំនួន៨។ ប៉ុន្តែមន្ត្រីគណបក្សកាន់អំណាចរបស់ចិនបានបញ្ជាក់ថាខ្លួននឹងបន្តយុទ្ធសាស្ត្រ «សូន្យកូវីដ» ដែលតម្រូវឱ្យបិទខ្ទប់មនុស្សរាប់លាននាក់នៅគេហដ្ឋានរបស់ខ្លួន ដើម្បីព្យាយាមបំបែករាល់ករណីឆ្លងនីមួយៗ។
សាកលវិទ្យាល័យ Tsinghua ដែលជាកន្លែងលោកប្រធានាធិបតី Xi ធ្លាប់រៀនហើយនិងមានការតវ៉ារបស់និស្សិតកាលពីថ្ងៃអាទិត្យ ព្រមទាំងសាកលវិទ្យាល័យផ្សេងទៀតនៅរដ្ឋធានីប៉េកាំងនិងនៅខេត្តភាគខាងត្បូងក្វាងទុង (Guangdong) និយាយថា ពួកគេបញ្ជូននិស្សិតទៅគេហដ្ឋានវិញដើម្បីការពារនិស្សិតពីការឆ្លងកូវីដ។ ក៏ប៉ុន្តែការបញ្ជូននិស្សិតទៅស្រុកកំណើតវិញយ៉ាងឆ្ងាយនោះ ក៏បន្ថយលទ្ធភាពដែលពួកគេអាចប្រមូលផ្តុំគ្នាក្នុងបរិវេណសាលាដើម្បីតវ៉ាដូចកាលពីចុងសប្តាហ៍។
សាកលវិទ្យាល័យខ្លះបានរៀបចំរថយន្តក្រុងដើម្បីដឹកជញ្ជូននិស្សិតទៅកាន់ស្ថានីយរថភ្លើង។ ពួកគេថាថ្នាក់រៀននិងការប្រឡងបញ្ចប់នឹងធ្វើតាមអនឡាញជំនួសវិញ។
សាកលវិទ្យាល័យវនវប្បកម្មប៉េកាំង បាននិយាយនៅលើគេហទំព័ររបស់ខ្លួនថា៖ «យើងនឹងរៀបចំឱ្យនិស្សិតដែលចង់ត្រឡប់ទៅស្រុកកំណើតរបស់ពួកគេវិញ»។ សាកលវិទ្យាល័យថាមកដល់ពេលនេះ បុគ្គលិកនិងនិស្សិតទាំងអស់ធ្វើតេស្តឃើញអវិជ្ជមានជំងឺកូវីដ១៩។
បរិវេណសាកលវិទ្យាល័យនានាធ្លាប់ជាប្រភពនៃការតស៊ូមតិកាលពីកិច្ចប្រឹងប្រែងជំរុញកំណែទម្រង់ប្រជាធិបតេយ្យចុងក្រោយបង្អស់នៅចិនដីគោកកាលពីទសវត្សរ៍១៩៨០ ដែលវិវត្តរហូតក្លាយជាចលនាដឹកនាំដោយនិស្សិតនៅឆ្នាំ១៩៨៩ ដែលបានកាន់កាប់ទីលាន Tiananmen (ធានអានមេន) ដែលត្រូវបានបង្ក្រាបយ៉ាងខ្លាំងដោយកងទ័ព។
លោក Dali Yang អ្នកជំនាញខាងនយោបាយចិននៅសាកលវិទ្យាល័យ Chicago នៅក្នុងសហរដ្ឋអាមេរិក ថ្លែងថា អាជ្ញាធរបញ្ជូននិស្សិតទៅស្រុកកំណើតវិញ ដោយសង្ឃឹមថាអាច«បន្ធូរបន្ថយស្ថានភាពបាន»។
លោក Yang ថ្លែងបន្ថែមទៀតថា៖ «សម្រាប់និស្សិតមួយចំនួន ពួកគេត្រូវស្ថិតនៅក្នុងការបិទខ្ទប់អស់ជាច្រើនខែ។ ចំពោះនិស្សិតមួយចំនួនទៀត ក្តីសង្ឃឹមថារកការងារធ្វើត្រូវបានបំផ្លាញ ហើយអាជីវកម្មត្រូវខូចខាត ដែលទាំងនេះរឹតតែបន្ថែមការមិនសប្បាយចិត្ត។ ពួកគេមានក្តីបារម្ភច្រើនក្នុងរយៈពេលកន្លងមកនេះ។»។
អាជ្ញាធរបានបញ្ជាឱ្យមានការធ្វើតេស្តមហាជនជាទ្រង់ទ្រាយធំ និងដាក់វិធានការរឹតត្បិតនៅតំបន់នានាទូទាំងប្រទេសចិនក្រោយពីមានការកើនឡើងនូវករណីឆ្លងជំងឺកូវីដ១៩។ ប៉ុន្តែវិធានការដើម្បីបំបែកនិស្សិតចេញពីគ្នា ជាវិធានការមិនប្រក្រតី ខណៈពេលដែលទីក្រុងជាច្រើនកំពុងប្រាប់សាធារណជនឱ្យចៀសវាងការធ្វើដំណើរនិងរឹតបន្តឹងរាល់ចលនាទាំងនោះ។
នៅក្នុងទីក្រុង ហុងកុង និស្សិតចំនួនប្រហែល ៥០ នាក់មកពីចិនដីគោកកាលពីថ្ងៃចន្ទបានធ្វើបាតុកម្មតវ៉ានៅសាកលវិទ្យាល័យ Chinese University of Hong Kong ដើម្បីបង្ហាញការគាំទ្រដល់ប្រជាជនចិនដីគោក។ ពួកគេបានដុតទៀននិងស្រែកថា «គ្មានការធ្វើតេស្ត PCR ទេ មានតែសេរីភាព!» និងថា «ប្រឆាំងនឹងរបបផ្ដាច់ការ កុំធ្វើជាទាសករ!»។
ការប្រមូលផ្ដុំគ្នានេះនិងការប្រមូលផ្ដុំគ្នាស្រដៀងគ្នានេះដែរនៅក្នុងសង្កាត់ពាណិជ្ជកម្មក្នុងទីក្រុងហុងកុង គឺជាការតវ៉ាធំបំផុតនានានៅក្នុងដែនដីចិនក្នុងរយៈពេលជាងមួយឆ្នាំកន្លងមកនេះ នៅក្រោមបទបញ្ញត្តិដែលត្រូវបានដាក់ឡើងដើម្បីកម្ទេចចលនាគាំទ្រលទ្ធិប្រជាធិបតេយ្យ។
យុទ្ធសាស្ត្រ«សូន្យកូវីដ»បានជួយធ្វើឱ្យចំនួនករណីឆ្លងជំងឺកូវីដ១៩នៅក្នុងប្រទេសចិនទាបជាងសហរដ្ឋអាមេរិក និងប្រទេសធំៗដទៃទៀត។ ប៉ុន្តែ ភាពទទួលយកបានពីសាធារណជនបានថយចុះ ដោយសារតែប្រជាជននៅក្នុងតំបន់មួយចំនួនត្រូវជាប់នៅក្នុងផ្ទះរហូតដល់រយៈពេល ៤ខែ ហើយពួកគេនិយាយថា ពួកគេមិនអាចទទួលបានស្បៀងអាហារនិងថ្នាំពេទ្យជាទៀងទាត់នោះទេ។
គណបក្សកុម្មុយនីស្ដចិនបានសន្យាកាលពីខែមុនថា នឹងកាត់បន្ថយរំខាននេះតាមរយៈការកែប្រែការធ្វើចត្ដាឡីស័កនិងកែប្រែបទបញ្ញត្តិផ្សេងទៀត។ ប៉ុន្តែ ការហក់ឡើងករណីឆ្លងជំងឺកូវីដ១៩ បានធ្វើឱ្យទីក្រុងនានារឹតបន្ដឹងការបង្ការជំងឺកូវីដ១៩។ ការណ៍នេះបានធ្វើឱ្យសាធារណជនមានការខឹងសម្បា។
កាលពីថ្ងៃអង្គារ ទី ២៩ ខែវិច្ឆិកា ចំនួនករណីឆ្លងជំងឺកូវីដ១៩បានធ្លាក់ចុះបន្ដិចនៅត្រឹម ៣៨.៤២១ ករណី បន្ទាប់ពីមានអត្រាឆ្លងខ្ពស់ខ្លាំងថ្មីក្នុងរយៈពេលប៉ុន្មានថ្ងៃនេះ។ ក្នុងចំណោមករណីឆ្លងទាំងអស់ មានករណីឆ្លងចំនួន ៣៤.៨៦០ ករណីមិនមានអាការៈជំងឺនោះទេ។
ខណៈដែលចំនួនករណីឆ្លងជំងឺកូវីដ១៩នៅចិនមានចំនួនទាបបើប្រៀបធៀបជាមួយនឹងសហរដ្ឋអាមេរិកនិងបណ្ដាប្រទេសមួយចំនួន មានប្រជាជនចិនតិចណាស់ដែលបានប្រឈមមុខនឹងការឆ្លងជំងឺនេះ ហើយវ៉ាក់សាំងដែលផលិតក្នុងប្រទេសចិនត្រូវបានគេចាត់ទុកមានប្រសិទ្ធភាពទាបខ្លាំងបើប្រៀបធៀបជាមួយនឹងវ៉ាក់សាំងដទៃទៀតដែលផលិតនៅបរទេស។ គេជឿថា អាជ្ញាធរមានការភ័យខ្លាចថា នឹងមានរលកនៃការឆ្លងជំងឺកូវីដ១៩និងការស្លាប់អាចធ្វើឱ្យប្រព័ន្ធសុខាភិបាលមិនអាចទ្រាំទ្របាន ប្រសិនបើពួកគេដកចេញនូវវិធានការតឹងតែង «សូន្យកូវីដ» នេះ៕
ប្រែសម្រួលដោយ សឹង សុផាត និង ហុង ចិន្តា
