ប៉ូលិសនៅក្រុងហុងកុងកាលពីថ្ងៃចន្ទបានប្រកាសហាមឃាត់ជាផ្លូវការមិនឲ្យមានការប្រារព្វពិធីអុជទៀនរឭកដល់ជនរងគ្រោះនៃការបង្ក្រាបរបស់អាជ្ញាធរចិនទៅលើបាតុកម្មគាំទ្រលទ្ធិប្រជាធិបតេយ្យកាលពីថ្ងៃទី៤ ខែមិថុនា ឆ្នាំ១៩៨៩នៅទីលានធានអានមេន ក្នុងទីក្រុងប៉េកាំង ដែលពិធីរំឭកនេះបានធ្វើជារៀងរាល់ឆ្នាំអស់៣០ឆ្នាំមកហើយ ដោយប៉ូលិសហុងកុងថាការហាមនេះគឺដោយសារពិធីនេះនឹងជា «ការគំរាមកំហែងដល់សុខភាពសាធារណៈ» នេះបើតាមក្រុមអ្នករៀបចំពិធីនេះ។
ជាការឆ្លើយតប ក្រុមអ្នករៀបចំពិធី បានអំពាវនាវឲ្យសាធារណជនរៀបចំពិធីរំឭកជាក្រុមតូចៗ អុជទៀននៅតាមផ្ទះ ឬប្រជុំតាមអនឡាញនៅយប់ថ្ងៃព្រហស្បតិ៍សប្តាហ៍នេះ ដើម្បីរំព្ញកខួបទី៣១នៃការបង្ក្រាបដោយយោធាចិននេះ។
ប៉ូលិសហុងកុងបានហាមឃាត់រួចហើយនូវគម្រោងបាតុកម្ម៣កន្លែងកាលពីថ្ងៃអាទិត្យ ដោយសារការបារម្ភពីការឆ្លងរាតត្បាតនៃជំងឺកូវីដ១៩៕
