បាតុករក្រុងហុងកុង បានបំផ្លាញស្ថានីយរថភ្លើងរត់ក្រោមដីនិងទង់ជាតិចិនកាលពីថ្ងៃអាទិត្យម្សិលមិញក្នុងអំឡុងនៃបាតុកម្មគាំទ្រលទ្ធិប្រជាធិបតេយ្យមួយទៀតនៅចុងសប្តាហ៍។
បាតុកររាប់ម៉ឺននាក់ ក៏បានប្រមូលផ្តុំគ្នានៅខាងក្នុងហាងលក់ទំនិញនៅក្នុងសង្កាត់ Sha Tin។ ក្រោយមក ពួកបាតុករបានធ្វើរបាំងបិទផ្លូវហើយបានដុតភ្លើង។
ក្នុងខណៈនោះដែរ ទីក្រុងហុងកុង បានកាត់បន្ថយការដឹកជញ្ជូនតាមរថភ្លើង ហើយរថយន្តក្រុង បានចេញចូលចំណតអាកាសយន្តហោះទីក្រុងហុងកុងជាចំណាត់ការដែលធ្វើឡើងដើម្បីបញ្ចៀសការតវ៉ាប្រឆាំងរដ្ឋាភិបាលនៅឯចំណតអាកាសយន្ត ហោះដ៏មមាញឹកបំផុតមួយរបស់ពិភពលោក។
ពួកអាជ្ញាធរ បាននិយាយនៅក្នុងសេចក្តីថ្លែងការណ៍ដែលព្រមានពួកបាតុករឲ្យស្ថិតនៅឲ្យឆ្ងាយពីចំណតយន្តហោះថា «មានការអំពាវនាវនៅលើអ៊ីនធឺណិតឲ្យប្រើសំបុត្រយន្តហោះក្លែងក្លាយដើម្បីចូលទៅកន្លែងចាំជិះយន្តហោះ។ ពួកអាជ្ញាធរចំណតអាកាសយាន្ត បានដាស់តឿនថា ឥរិយាបទបែបនេះ អាចបង្កើនការក្លែងបន្លំ»។
កាលពីថ្ងៃសៅរ៍សប្តាហ៍មុន ប៉ូលិស បានបាញ់ឧស្ម័នបង្ហូរទឹកភ្នែកលើពួកបាតុករដែលបានបំផ្លាញភ្លើងស្ថានីយរថភ្លើង។
សេចក្តីព្រាងច្បាប់ដែលបានស្នើឡើងដែលនឹងអនុញ្ញាតឲ្យពួកជនសង្ស័យជាឧក្រិដ្ឋជនក្នុងទីក្រុងហុងកុងត្រូវបញ្ជូនទៅកាន់ប្រទេសចិនដីគោកដើម្បីកាត់ទោស បានបណ្តាលឲ្យមានបាតុកម្មប្រឆាំងនឹងរដ្ឋាភិបាលអស់រយៈពេលជាច្រើនខែ។
សេចក្តីព្រាងច្បាប់បត្យាប័ននោះត្រូវបានដកចេញ ក៏ប៉ុន្តែបាតុកម្មនៅបន្ត។
ចាប់តាំងពីនោះមក ពួកបាតុករ បានពង្រីកការទាមទាររបស់ខ្លួនឲ្យមានការបោះឆ្នោតជ្រើសរើសមេដឹកនាំរបស់ពួកគេដោយផ្ទាល់ហើយនិងការទទួលខុសត្រូវលើអំពើព្រៃផ្សៃរបស់ប៉ូលិស៕
