ការតវ៉ាប្រឆាំងពីរត្រូវបានបានគ្រោងធ្វើឡើងនៅក្នុងទីក្រុងហុងកុង មុនពេលការអំពាវនាវឲ្យមានកូដកម្មមួយនៅថ្ងៃចន្ទស្អែកនេះ។ ទីក្រុងនោះ បានជួបប្រទះការធ្វើបាតុកម្មជារៀងរាល់ចុងសប្តាហ៍អស់រយៈពេល២ខែ។
បាតុករក្រុងហុងកុង បានក្លាយជាទីដៅនៃការវាយប្រហារដោយឧស្ម័នបង្ហូរទឹកភ្នែករបស់ប៉ូលិសកាលពីយប់ថ្ងៃសៅរ៍ បន្ទាប់ពីពួកគេបានប្រមូលផ្តុំគ្នានៅឯស្ថានីយប៉ូលិសក្នុងសង្កាត់ Tsim Sha Tsuiហើយជាថ្មីម្តងទៀត មនុស្សប្រហែលរាប់ម៉ឺននាក់ បានចេញមកតាមផ្លូវនានាដើម្បីតវ៉ាប្រឆាំងនឹងចំណាត់ការរបស់រដ្ឋាភិបាលអំពីវិបត្តិនយោបាយដែលភាគច្រើន កើតចេញពីការប្រឆាំងលោកស្រី Carrie Lamមេដឹកនាំរបស់ក្រុងហុងកុង។
បាតុកម្មភាគច្រើនធ្វើឡើងដោយសន្តិវិធី ទោះបីបាតុករមានការប៉ះទង្គិចកាន់តែច្រើនឡើងជាមួយប៉ូលិសក៏ដោយ បន្ទាប់ពីបាតុករខ្លះបានបដិសេធពុំព្រមរំសាយទៅតាមពេលវេលាដែលបានកំណត់ក៏ដោយ។ ពួកបាតុករបានបំផ្លាញអាគារ ដុតភ្លើងនិងចោលដុំថ្ម ខណៈដែលប៉ូលិសបានបាញ់ឧស្ម័នបង្ហូរទឹកភ្នែកនិងគ្រាប់កាំភ្លើងជ័រហើយស្ថានភាពកាលពីថ្ងៃសៅរ៍ មានលក្ខណៈដូចគ្នា។
ការតវ៉ាប្រឆាំង ជាបាតុកម្មនៅពេលថ្មីៗបំផុតនេះក្នុងរយៈពេលជិត៩សប្តាហ៍ប្រឆាំងនឹងរដ្ឋាភិបាល ដែលកាលពីដើមរដូវក្តៅនេះ បានធ្វើឲ្យសេចក្តីព្រាងច្បាប់បត្យាប័នមួយដែលនឹងអនុញ្ញាតឲ្យឧក្រិដ្ឋជនត្រូវធ្វើបត្យាប័នទៅកាន់ប្រទេសចិនដីគោក បានទទួលបរាជ័យ។
សេចក្តីព្រាងច្បាប់នេះ បានបណ្តាលឲ្យមានការខឹងសម្បារនិងការមិនទុកចិត្តដែលមិនធ្លាប់មានកាលពីពេលមុនដល់រដ្ឋាភិបាលក្រុងហុងកុងដែលមនុស្សជាច្រើនជឿថា បានទទួលឥទ្ធិពលយ៉ាងខ្លាំងពីរដ្ឋាភិបាលក្រុងប៉េកាំង។ ថ្វីបើ អតីអាណានិគមអង់គ្លេសបានសន្យាផ្តល់ស្វ័យភាពរហូតឆ្នាំ២០៤៧ក៏ដោយ៕
