ប្រធានាធិបតីនៃប្រទេសហុងឌូរ៉ាស និងក្វាតេម៉ាឡា គ្រោងជួបគ្នាកាលពីថ្ងៃសៅរ៍ដើម្បីអនុវត្តយុទ្ធសាស្ត្រមួយដើម្បីធ្វើមាតុភូមិនិវត្តន៍ជនទេសន្តរប្រវេសន៍រាប់ពាន់នាក់ដែលបានដើរហែរជាក្បួនទៅកាន់ប្រទេសហុងឌូរ៉ាស ក្រោយពីប្រធានាធិបតីអាមេរិក លោក ដូណាល់ ត្រាំ បានព្រមានថា ក្បួនហ្វូងមនុស្សម្នានោះត្រូវតែបញ្ឈប់មុនពេលក្បួននោះមកដល់ទឹកដីអាមេរិក។
ភាពជាប់គាំងរវាងអ្នកធ្វើដំណើរផ្លាស់ប្ដូរប្រទេសទាំងនោះជាមួយនឹងប៉ូលិសម៉ិកស៊ិក នៅតែបន្តនៅឡើយនៅពេលដែលពួកគេនៅប្រមូលផ្តុំគ្នានៅលើស្ពានមួយ ដែលខណ្ឌចែកប្រទេសក្វាតេម៉ាឡា និងម៉ិកស៊ិក។ ជនទេសន្តរប្រវេសន៍ខ្លះ បានឡើងផ្លោះរបងព្រំដែនដែលគេបិទហើយស្រែកថា «មានក្មេងៗនៅទីនេះ»។
ក្រុមជនទេសន្តរប្រវេសន៍បានទម្លុះរបងនោះកាលពីថ្ងៃសុក្រ ហើយរត់សម្រុកសំដៅទៅក្រុមប៉ូលិសដែលរៀបក្បួនជារបាំងក្នុងប្រទេសម៉ិកស៊ិក។ រដ្ឋាភិបាលម៉ិកស៊ិកបានព្រមានថា សហរដ្ឋអាមេរិកនឹងប្រឈមជាមួយក្បួនមនុស្សម្នាដែលធ្វើដំណើរផ្លាស់ប្ដូរប្រទេសទាំងនេះ។
រូបភាពពីទូរទស្សន៍ម៉ិកស៊ិក បានបង្ហាញជនទេសន្តរប្រវេសន៍រាប់រយនាក់ ដែលបាននាំគ្នាឈរពេញលើស្ពាន ហើយកំពុងប្រឈមមុខជាមួយក្បួនប៉ូលិសម៉ិកស៊ិកដែលបំពាក់ដោយឧបករណ៍ប្រឆាំងបាតុកម្ម។
សាក្សីជាច្រើនដែលឃើញហេតុការណ៍នេះបាននិយាយថា ជនទេសន្តរប្រវេសន៍ខ្លះ បានគប់ដុំថ្មនិងរបស់របរផ្សេងៗទៀតដាក់កងកម្លាំងសន្តិសុខម៉ិកស៊ិក ដែលបានប្រើប្រាស់គ្រាប់បែកផ្សែងដើម្បីបង្ខំឱ្យជនទេសន្តរប្រវេសន៍ទាំងនោះឲ្យស្ដាប់តាមអាជ្ញាធរ។
ប្រធានាធិបតីម៉ិកស៊ិក គឺលោក Enrique Pena Nieto បានមានប្រសាសន៍កាលពីយប់ថ្ងៃសុក្រតាមកញ្ចក់ទូរទស្សន៍ដែលចាក់ផ្សាយទូទាំងប្រទេសថា «ម៉ិកស៊ិកមិនអនុញ្ញាតហើយនឹងមិនអនុញ្ញាតឱ្យមានអ្នកចូលក្នុងទឹកដីរបស់ខ្លួនតាមរបៀបខុសប្រក្រតី ឬដែលមានហិង្សានោះទេ»។
ប្រធានាធិបតីហុងឌូរ៉ាស លោក Juan Orlando Hernandez បានបង្ហោះសារតាមបណ្តាញ Twitter កាលពីយប់ថ្ងៃសុក្រថា រូបលោកនិងសមភាគីក្វាតេម៉ាឡា គឺលោក Jimmy Morales បានស្នើសុំការអនុញ្ញាតឱ្យបុគ្គលិកការពារជនស៊ីវិល ចូលទៅជួយពលរដ្ឋហុងឌូរ៉ាសនៅតាមព្រំដែន និងស្វែងរកវិធីសាស្ត្រនានាដើម្បីធ្វើមាតុភូមិនិវត្តន៍ជនទេសន្តរប្រវេសន៍ទាំងនោះ ទៅកាន់ប្រទេសហុងឌូរ៉ាសវិញ ជាទីដែលពួកគេបានចាប់ផ្តើមក្បួនធ្វើដំណើររបស់ពួកគេ៕
