សេរីភាពខាងការនិយាយស្តីបញ្ចេញមតិនៅក្នុងក្រុងហុងកុងមានដំណើរថយក្រោយនៅក្រោយបណ្តាញវិទ្យុនិងទូរទស្សន៍សាធារណៈមួយនៅក្នុងក្រុងហុងកុងឈ្មោះ RTHK បានត្រូវរដ្ឋាភិបាលស្តីបន្ទោសហើយបានត្រូវបង្ខំឱ្យផ្អាកកម្មវិធីនិយាយចំអកមួយហើយសុំទោសអំពីការនិយាយប្រមាថពួកប៉ូលិស។
កម្មវិធីឈ្មោះ Headliner ដែលបានត្រូវផ្សាយដំបូងក្នុងឆ្នាំ១៩៨៩ជាញឹកញយបាននិយាយកំប្លែងអំពីពួកមន្ត្រីរដ្ឋាភិបាល។ កាលពីពេលថ្មីៗនេះកម្មវិធីរបស់វិទ្យុនិងទូរទស្សន៍សាធារណៈនេះបាននិយាយចំអកដល់ពួកប៉ូលិសដែលបានប្រើមធ្យោបាយតឹងរ៉ឹងក្នុងការទប់ទល់នឹងបាតុកម្មរយៈពេលច្រើនខែដែលជួនកាលមានអំពើហិង្សានៅក្នុងចលនាប្រឆាំងនឹងរដ្ឋាភិបាលនៅក្នុងទីក្រុងគ្រប់គ្រងពាក់កណ្តាលស្វយ័នេះ។ បណ្តាញវិទ្យុនិងទូរទស្សន៍ RTHK ដែលទទួលប្រាក់ផ្គត់ផ្គង់ពីសាធារណជននិងមានការគោរពច្រើនបានត្រូវវាយប្រហារច្រើនដងដោយក្រុមលម្អៀងទៅខាងប្រទេសចិនដោយសារការរាយការណ៍ឯករាជ្យនិងកម្មវិធីកិច្ចការបច្ចុប្បន្នហើយបានទទួលរង្វាន់ជាច្រើនក្នុងពេលច្រើនឆ្នាំមកហើយ។
ការផ្អាកកម្មវិធីនិយាយចំអកនេះដែលបានត្រូវឃើញថាជាការបញ្ជាក់អំពីស្ថានភាពចុះថយនៃសេរីភាពខាងការនិយាយស្តីបញ្ចេញមតិនៅក្នុងក្រុងហុងកុងនិងបង្ហាញអំពីការត្រួតពិនិត្យបណ្តាញវិទ្យុនិងទូរទស្សន៍ RTHK នោះបានត្រូវរិះគន់ជាទូទៅដោយក្រុមអ្នករិះគន់ថា ជាវិធានការមួយទៀតដើម្បីបង្ក្រាបសេរីភាពពលរដ្ឋនៅក្នុងក្រុងនេះនិងជាការបន្តឹងការត្រួតត្រារបស់ប្រទេសចិនលើក្រុងហុងកុង។
រដ្ឋាភិបាលបានបញ្ជូនទៅឱ្យបណ្តាញវិទ្យុនិងទូរទស្សន៍ RTHK នូវបញ្ជីនៃការទាមទារមួយចំនួនកាលពីយប់ថ្ងៃអង្គារទី១៩ខែឧសភាដែលមានរួមបញ្ចូលការពិនិត្យសើរើជាថ្មីការផលិតកម្មវិធីនិងវិចារណកថារបស់បណ្តាញវិទ្យុនិងទូរទស្សន៍នេះ ការសុំអភ័យទោសនិងការដាក់ទណ្ឌកម្មលើបុគ្គលិកទាំងឡាយណាដែលបានត្រូវរកឃើញថា ប្រព្រឹត្តកំហុសឬ«មានការធ្វេសប្រហែស»។
ការិយាល័យអភិវឌ្ឍន៍ពាណិជ្ជកម្មនិងសេដ្ឋកិច្ចហៅកាត់ថា CEDB ដែលមើលការខុសត្រូវលើវិទ្យុនិងទូរទស្សន៍សាធារណៈនេះបានចេញសេចក្តីថ្លែងការណ៍មួយនៅក្រោយអាជ្ញាធរខាងគមនាគមន៍បានព្រមានថា ស្ថានីយ៍វិទ្យុនិងទូរទស្សន៍នេះធ្វើ«ការរិះគន់ដោយអយុត្តិធ៌មនិងការប្រមាថមាក់ងាយ»ពួកប៉ូលិសនៅក្នុងកម្មវិធីមួយជាភាសាចិនកាលពីខែកុម្ភៈ។
កម្មវិធីនេះបាននិយាយលេងសើចអំពីពួកប៉ូលិសដោយមានរួមបញ្ចូលគំនូរមួយបង្ហាញប៉ូលិសម្នាក់ស្លៀកពាក់ឯកសណ្ឋានបានលោតចេញពីធុងសម្រាមមួយហើយនិយាយកំប្លែងថា នៅពេលដែលពួកពេទ្យកំពុងប្រឈមនឹងការខ្វះប្រដាប់ប្រដាការពារខ្លួននៅពេលមានការរាតត្បាតនៃវីរុសកូរ៉ូណា ពួកប៉ូលិសមានប្រដាប់ប្រដាការពារច្រើន។ អាជ្ញាធរខាងគមនាគមន៍បាននិយាយថា គំនូរនេះជា«ការរិះគន់គ្មានសុភនិច្ឆ័យ»ទៅលើពួកប៉ូលិសទាំងអស់។
ការិយាល័យ CEDB បាននិយាយថា ស្ថានភាពនេះ«ធ្ងន់ធ្ងរណាស់» ដោយសារបណ្តាញវិទ្យុនិងទូរទស្សន៍ RTHK បានរំលោភលើមាត្រាមួយចំនួននៃក្រមប្រតិបត្តិស្តីពីស្តង់ដារកម្មវិធីទូរទស្សន៍នៅក្នុងក្រុងនេះដោយមានរួមបញ្ចូលការផ្សាយដែល«បានត្រូវចាត់ទុកថាជាការនិយាយនាំឱ្យមានសម្អប់»និង«ការរិះគន់ដោយអយុត្តិធ៌មនិងការប្រមាថមើលងាយពួកប៉ូលិស»។
ជាការឆ្លើយតប បណ្តាញ RTHK បាននិយាយថា ខ្លួនទទួលយកការសម្រេចរបស់អាជ្ញាធរខាងគមនាគមន៍។ បណ្តាញវិទ្យុនិងទូរទស្សន៍នេះបាននិយាយថា ការផលិតកម្មវិធីនេះនឹងត្រូវផ្អាកនៅដំណាច់អាណត្តិផ្សាយបច្ចុប្បន្នហើយការពិនិត្យសើរើជាថ្មីមួយនឹងមានធ្វើនៅពេលក្រោយ។បណ្តាញ RTHK ក៏បានសុំអភ័យទោសដល់ពួកប៉ូលិសនិងពួកជនឯទៀតៗដែលបានត្រូវធ្វើឱ្យអាក់អន់ចិត្ត។ គេដឹងមិនច្បាស់លាស់ទេថា តើកម្មវិធីនេះនឹងមានផ្សាយតទៅទៀតឬបែបណាទេ។
កាលពីថ្ងៃពុធទី២០ខែឧសភា លោក Edward Yau អគ្គលេខាធិការនៃការិយាល័យអភិវឌ្ឍន៍ពាណិជ្ជកម្មនិងសេដ្ឋកិច្ចហៅកាត់ថា CEDB បាននិយាយថា បណ្តាញវិទ្យុនិងទូរទស្សន៍ RTHK ត្រូវតែពិនិត្យមើលដែរអំពីការចាត់ចែងកិច្ចការនិងតម្លាភាពរបស់ខ្លួន។
ការព្រមានពីអាជ្ញាធរខាងគមនាគមន៍នេះគឺជាការព្រមានលើកទីពីរដល់បណ្តាញវិទ្យុនិងទូរទស្សន៍ RTHK ក្នុងរយៈពេលមួយខែនៅក្រោយស្ថានីយនេះបានត្រូវចោទប្រកាន់ថា បានរំលោភលើក្រមនៃកម្មវិធីទូរទស្សន៍បន្ទាប់ពីភ្ញៀវម្នាក់នៅក្នុងកម្មវិធីមួយទៀតបានបញ្ចេញមតិអំពីការប៉ះទង្គិចហិង្សារវាងពួកប៉ូលិសនិងក្រុមបាតុករ។
កាលពីខែមុនការិយាល័យនេះក៏បាននិយាយដែរថា បណ្តាញវិទ្យុនិងទូរទស្សន៍ RTHK បានរំលោភលើគោលការណ៍«ប្រទេសចិនតែមួយ»ដោយបានសុំឲ្យអង្គការសុខភាពពិភពលោកពិចារណាជាថ្មីអំពីសមាជិកភាពរបស់កោះតៃវ៉ាន់នៅពេលមានការរាតត្បាតជាសាកលនៃជំងឺកូវីដ១៩។
បណ្តាញវិទ្យុនិងទូរទស្សន៍ហុងកុងដែលបានត្រូវចោទប្រកាន់ថា មានសមានចិត្តខ្លាំងពេកដល់ក្រុមបាតុករលម្អៀងទៅខាងលទ្ធិប្រជាធិបតេយ្យចាប់តាំងពីមានចលាចលខាងសង្គមនៅក្នុងក្រុងហុងកុងកាលពីខែមិថុនានោះបានរងការគាបសង្កត់ឱ្យបន្ថយគោលជំហរខាងវិចារណកថារបស់ខ្លួនដើម្បីឆ្លុះបញ្ចាំងគោលជំហររបស់ក្រុងហុងកុងនិងរដ្ឋាភិបាលចិន។
លោក Kong Tsung-gan ជាអ្នកធ្វើអត្ថាធិប្បាយនយោបាយ។លោកបាននិយាយថាអាជ្ញាធរចិនកំពុង«ខិតខំព្យាយាមបង្ក្រាបស្ថានីយវិទ្យុនិងទូរទស្សន៍សាធារណៈមួយដែលមានឯករាជ្យភាព»។
លោក Kong Tsung-gan បាននិយាយតាម Twitter ថា៖« និយាយជារួម សញ្ញានេះបង្ហាញថា ការរិះគន់ឬការនិយាយចំអកឱ្យពួកប៉ូលិសមិនអាចធ្វើបានទៀតទេនៅក្នុងកាសែតធំៗនៅក្នុងក្រុងហុងកុង។ ប្រសិនបើមានការគាបសង្កត់ដូច្នេះតទៅទៀត សេរីភាពសារព័ត៌មាននិងសេរីភាពខាងការនិយាយស្តីបញ្ចេញមតិនឹងចុះថមថយឆាប់រហ័សនៅក្នុងក្រុងហុងកុង»។
លោក Kong Tsung-gan ដែលជាអ្នកធ្វើអត្ថាធិប្បាយខាងនយោបាយបាននិយាយបន្ថែមថា កម្មវិធី Headliners ជាផ្នែកមួយនៃជីវភាពរបស់ប្រជារាស្ត្រហុងកុងជាច្រើននាក់។ការបិទកម្មវិធីនេះប្រៀបដូចការបិទកម្មវិធី Saturday Night Live ឬកម្មវិធីThe Late Show របស់លោក Stephen Colbert អ៊ីចឹងដែរ៕
ប្រែសម្រួលដោយ លោកឈឹម សុមេធ
