លោក Henry Kissinger ដែលបានទទួលមរណភាពកាលពីថ្ងៃពុធក្នុងជន្មាយុ១០០ឆ្នាំ បានតំណាងគោលនយោបាយការបរទេសសហរដ្ឋអាមេរិកក្នុងរដ្ឋបាលលោកប្រធានាធិបតី Nixon និងលោក Ford ដោយបានបម្រើការជារដ្ឋមន្ត្រីការបរទេសនៅក្រោមប្រធានាធិបតីទាំងពីរនាក់នេះ។ លោកបានទទួលការសរសើរដោយសារជោគជ័យខាងការទូតរបស់លោក ហើយលោកក៏នាំឱ្យមានរឿងចម្រូងចម្រាស់ដែរអំពីទស្សនៈនយោបាយរបស់លោកអំពីពិភពលោក។
ក្រុមហ៊ុនពិគ្រោះយោបល់របស់លោកបានប្រកាសអំពីមរណភាពរបស់លោកហើយមិនបាននិយាយអំពីបុព្វហេតុនៃមរណភាពនេះទេ។
ដោយត្រូវបានស្គាល់ថាជាអ្នកប្រាជ្ញ ជាជ័យលាភីរង្វាន់ណូបែលសន្តិភាពនិងជាជនភៀសខ្លួនល្បីឈ្មោះមកកាន់សហរដ្ឋអាមេរិក លោក Kissinger បានក្លាយជាបុគ្គលសំខាន់ម្នាក់ខាងវប្បធម៌ នាំឱ្យមានការសរសេរជីវប្រវត្តិលោកជាច្រើន ទាំងដោយមានទាំងការពេញចិត្តនិងការមិនចូលចិត្ត។
អ្នកគិតគូរអភិរក្សនិយមរូបនេះបានជួយធ្វើឱ្យមានជោគជ័យខាងទូតជាច្រើន មានរួមការចូលជិតគ្នាជាមួយប្រទេសចិននិងការសម្រាលភាពតានតឹងជាមួយសហភាពសូវៀត។ លោកបានទទួលរង្វាន់ណូបែលសន្តិភាពជាមួយលោក Le Duc Tho នៃប្រទេសវៀតណាមខាងជើងដោយសារការប្រឹងប្រែងរបស់លោកទាំងពីរក្នុងកិច្ចចរចាបញ្ចប់សង្គ្រាមវៀតណាម។
ទោះជាមានសមិទ្ធផលរបស់លោកនៅទូទាំងពិភពលោកក៏ដោយ ក៏លោក Kissinger ជាឥស្សរជនចម្រូងចម្រាស់ម្នាក់ ដោយពួកអ្នករិះគន់លោកបាននិយាយថាលោកបានអនុញ្ញាតឱ្យមានការទម្លាក់គ្រាប់បែកយ៉ាងច្រើននៅក្នុងប្រទេសកម្ពុជា បានគាំទ្រការបង្ក្រាបរបស់ប៉ាគីស្ថានលើបង់ក្លាដេសនិងបានធ្វើតែបន្តិចបន្តួចដើម្បីបញ្ឈប់យុទ្ធនាការប្រឆាំងនឹងក្រុមអ្នកប្រឆាំងក្នុងប្រទេសអាហ្សង់ទីន៕
