Hello VOA៖ អ្នកដឹកនាំសហគ្រិនវ័យក្មេង ផ្តល់យោបល់ឲ្យធ្វើការស្ទង់មតិអំពីការប្រព្រឹត្តរបស់មន្ត្រីអនុវត្តច្បាប់
អ្នកដឹកនាំយុវជនខាងការជំរុញសុចរិតភាពក្នុងវិស័យសហគ្រិនភាពនៅប្រទេសកម្ពុជា លើកឡើងថា រដ្ឋាភិបាល អាចធ្វើការស្ទង់មតិពីអាជីវករ ឬសហគ្រិន ដែលបានប្រឡូកក្នុងការដាក់ពាក្យស្នើសុំបើកអាជីវកម្ម ឬសហគ្រាសផ្សេងៗ ដើម្បីដឹងឲ្យប្រាកដថាតើដំណើរការនេះ មានជាប់ពាក់ព័ន្ធនឹងការប្រព្រឹត្តអំពើពុករលួយក្នុងចំណោមមន្ត្រីអនុវត្តច្បាប់ក្នុងកម្រិតណា។ អ្នកស្រី ប៉េង ឡូឌី អនុប្រធានគ្រប់គ្រងគម្រោងនៃអង្គការផេកកម្ពុជា ប្រសាសន៍នៅក្នុងកម្មវិធី Hello VOA កាលពីថ្ងៃព្រហស្បតិ៍ទី៨ ខែតុលា ឆ្នាំ២០២០ ថា៖ «ច្បាប់ពិតជាបានចែងអំពីនីតិវិធីអីអញ្ចឹងមែន ប៉ុន្តែការអនុវត្តជាក់ស្តែងមិនទាន់រលូនស្របទៅតាមអ្វីដែលមានចែងទេ។ ជួនកាលអ្នកពីលើថាអញ្ចឹងហើយ តែអ្នកអនុវត្តផ្ទាល់ មិនស៊ីសង្វាក់គ្នា។ បើចង់ដឹងថាតើការធ្វើច្បាប់មកហ្នឹង និងអ្នកអនុវត្តផ្ទាល់យ៉ាងណា គាត់អាចធ្វើការស្ទង់មតិបានជាមួយសហគ្រិន ជាមួយអាជីវករ»៕ (សាយ មុន្នី, Hello VOA, វ៉ាស៊ីនតោន, ទី០៨ ខែតុលា ឆ្នាំ២០២០)
