Hello VOA៖ មេដឹកនាំសង្គមស៊ីវិលថា សំឡេងពលរដ្ឋរួមគ្នា នឹងជំរុញមេដឹកនាំពិភពលោកផ្តល់វ៉ាក់សាំងកូវីដ១៩ឥតគិតថ្លៃ
ខណៈដែលអ្នកវិទ្យាសាស្ត្រនៅជុំវិញពិភពលោកកំពុងព្យាយាមបង្កើតវ៉ាក់សាំងឬថ្នាំបង្ការជំងឺកូវីដ១៩ មេដឹកនាំអង្គការក្រៅរដ្ឋាភិបាលមួយចំនួនក្នុងប្រទេសកម្ពុជា បានលើកឡើងថា មានតែពលរដ្ឋនាំគ្នាចូលរួមបំពងសំឡេងឲ្យកាន់តែខ្លាំងទេ ទើបអាចជំរុញឲ្យមេដឹកនាំពិភពលោកចែកចាយវ៉ាក់សាំងកូវីដ១៩ ដោយឥតគិតថ្លៃដល់ពលរដ្ឋទូទៅក្នុងសកលលោកបាន។ លោកស្រី លឹម សូលីន នាយិកាអង្គការ Oxfam ប្រចាំកម្ពុជា មានប្រសាសន៍នៅក្នុងកម្មវិធី Hello VOA កាលពីថ្ងៃច័ន្ទទី៨ ខែមិថុនា ឆ្នាំ២០២០ថា៖ «យើងទាំងអស់គ្នាជាមនុស្សម្នាក់ៗ ជាបុគ្គល យើងមិនមានកម្លាំងអីក្លាំងទេ តែបើយើងធ្វើការជាមួយគ្នា ធ្វើការទាំងអស់គ្នា យើងនឹងជោគជ័យ បើប្រជាជនទាំងអស់ចូលរួមទាំងអស់គ្នា»៕ (សាយ មុន្នី, Hello VOA, វ៉ាស៊ីនតោន, ទី៨ ខែមិថុនា ឆ្នាំ២០២០)
