Hello VOA៖ អ្នកជំនាញជំរុញឲ្យរដ្ឋាភិបាលធានាប្រព័ន្ធយុត្តិធម៌ឯករាជ្យ ដើម្បីទាក់ទាញវិនិយោគិនធំៗ
អ្នកតស៊ូមតិប្រឆាំងអំពើពុករលួយក្នុងប្រទេសកម្ពុជា លើកឡើងថាកង្វះឯករាជ្យភាពនិងភាពគួរឲ្យជឿជាក់បានក្នុងប្រព័ន្ធយុត្តិធម៌កម្ពុជា បានធ្វើឲ្យក្រុមហ៊ុនវិនិយោគធំៗ ស្ទាក់ស្ទើរក្នុងការបោះទុនវិនិយោគក្នុងប្រទេសឬងាកទៅប្រើប្រាស់ប្រព័ន្ធយុត្តិធម៌ប្រទេសផ្សេងដើម្បីដោះស្រាយវិវាទ។ លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជា មានប្រសាសន៍នៅក្នុងកម្មវិធី Hello VOA កាលពីថ្ងៃព្រហស្បតិ៍ទី១០ ខែកញ្ញាឆ្នាំ២០២០ថា៖ «មកដល់ពេលនេះហើយ ប្រទេសកម្ពុជា គួរតែចាប់ផ្តើមគិតអំពីការធានាបានយុត្តិធម៌សង្គម ដោយកែសម្រួលឲ្យតុលាការយើងឯករាជ្យ។ អញ្ចឹងវាជារឿងចាំបាច់ណាស់ដែលធានាថាប្រព័ន្ធយុត្តិធម៌ហ្នឹងអាចមានការជឿជាក់បានក្នុងការផ្តល់យុត្តិធម៌នៅពេលដែលមានវិវាទផ្សេងៗ»៕ (សាយ មុន្នី, Hello VOA, វ៉ាស៊ីនតោន, ទី១០ខែកញ្ញា ឆ្នាំ២០២០)