Hello VOA សុខភាព៖ សារនៃក្តីសង្ឃឹមចំពោះជំងឺកូវីដ១៩
អ្នកជំនាញវេជ្ជសាស្ត្រគឺ លោក តាំង តេកហុងវេជ្ជបណ្ឌិតខ្មែរនៅសហរដ្ឋអាមេរិក បានថ្លែងថា ការរាតត្បាតជំងឺកូវីដ១៩ បានបង្កឲ្យមានការភ័យខ្លាច និងការព្រួយកង្វល់យ៉ាងខ្លាំង ក្នុងចំណោមប្រជាពលរដ្ឋនៅជុំវិញពិភពលោក។ ទោះបីជាយ៉ាងនេះក៏ដោយ ក៏មានក្តីសង្ឃឹមជាច្រើនដែលថា ពិភពលោកនឹងអាចទប់ទល់នឹងវីរុសដ៏កាចសាហាវនេះបាន។ ក្តីសង្ឃឹមទាំងនោះរួមមាន៖ ករណីឆ្លងភាគច្រើនគឺជាករណីកម្រិតស្រាល ហើយអាចជាសះស្បើយដោយខ្លួនឯង។ ការរក្សាគម្លាតពីគ្នាដែលត្រូវបានចាប់ផ្តើមអនុវត្តភ្លាមៗ នៅពេលមានការផ្ទុះឆ្លងរាលដាលនៃវីរុសនេះ បានជួយពន្យឺតការឆ្លងរាលដាលគួរឲ្យកត់សម្គាល់។ ការព្យាបាលដោយប្រើប្រាស់ថ្នាំ នៅតាមមន្ទីពេទ្យមួយចំនួនបង្ហាញលទ្ធផលវិជ្ជមាន។ ដំណើរការនៃការពិសោធន៍ផលិតវ៉ាក់សាំងរបស់ក្រុមអ្នកជំនាញ មានការវិវត្តឆាប់រហ័ស ហើយឧបករណ៍ធ្វើតេស្តក៏ត្រូវបានបង្កើតយ៉ាងឆាប់រហ័សផងដែរ៕ (អ្នកស្រី ស៊ូ ពេជ្រចិន្តា, Hello VOA សុខភាព, វ៉ាស៊ីនតោន, ២០ ឧសភា ២០២០)
