Hello VOA៖ អ្នកជំនាញថា ការដោះលែងបន្ថែមទៀតនឹងមាន តែគ្មានផ្លូវបក្សសង្គ្រោះជាតិរស់ឡើងវិញទេ
អ្នកជំនាញនិងជាអ្នកតានដានដំណើរការនយោបាយម្នាក់ក្នុងប្រទេសកម្ពុជាលើកឡើងថា លោករំពឹងថា សកម្មជននយោបាយច្រើនថែមទៀតដែលកំពុងជាប់ពន្ធនាគារ នឹងត្រូវបានដោះលែងមុនការបោះឆ្នោតក្រុមប្រឹក្សាឃុំសង្កាត់ដែលគ្រោងធ្វើនៅពាក់កណ្តាលឆ្នាំ២០២២។ ប៉ុន្តែលោកថា គ្មានលទ្ធភាពណាមួយដែលគណបក្សសង្គ្រោះជាតិអាចរស់ឡើងវិញ ដើម្បីចូលរួមប្រកួតប្រជែងក្នុងការបោះឆ្នោតមូលដ្ឋាននោះឡើយ។ លោក ឱក សេរីសោភក្តិ៍ អ្នកឯកទេសផ្នែកអភិបាលកិច្ចល្អ មានប្រសាសន៍ដូច្នេះនៅក្នុងកម្មវិធី Hello VOA កាលពីថ្ងៃចន្ទ ទី២២ ខែវិច្ឆិកា ឆ្នាំ២០២១។ លោកថ្លែងទៀតថា៖ «រាជរដ្ឋាភិបាលកម្ពុជា ចាប់ផ្តើមដោះលែងនូវសកម្មជនជាពិសេសគឺសកម្មជនខាងធនធានធម្មជាតិហើយបន្តិចទៀតនឹងឈានទៅដល់ការដោះលែងសកម្មជនខាងវិស័យផ្សព្វផ្សាយព័ត៌មាន និងសកម្មជនគណបក្សនយោបាយ។ រឿងទាំងអស់នេះ ត្រូវធ្វើឡើងមុនការរៀបចំការបោះឆ្នោតក្រុមប្រឹក្សាឃុំសង្កាត់នៅក្នុងពេលតែប៉ុន្មាន៧-៨ខែខាងមុខនេះ»៕ (សាយ មុន្នី, Hello VOA, វ៉ាស៊ីនតោន, ទី២២ ខែវិច្ឆិកា ឆ្នាំ២០២១)