កម្មករចំណាកស្រុករាប់ពាន់នាក់មកពីប្រទេសឡាវ និងមីយ៉ាន់ម៉ាបាននៅប្រមូលផ្តុំគ្នានៅស្ថានីយរថយន្តដឹកអ្នកដំណើរ និងនៅចំណុចឆ្លងកាត់ព្រំដែនក្នុងប្រទេសថៃកាលពីថ្ងៃចន្ទដែលកំពុងបំពានសំណើឲ្យស្ថិតនៅក្នុងផ្ទះដើម្បីរារាំងការឆ្លងមេរោគកូរ៉ូណាដ៏កាចសាហាវ។
ប្រទេសឡាវ និងមីយ៉ាន់ម៉ា ជាប្រទេសក្រីក្រ២នៅតំបន់អាស៊ីអាគ្នេយ៍បានអះអាងថា ពួកគេមិនមានករណីមេរោគកូវីដ១៩ ដែលបានសម្លាប់មនុស្សជាង១ម៉ឺន៤ពាន់នាក់នៅទូទាំងសាកលលោកទេ។
ចំនួនមនុស្សឆ្លងមេរោគក្នុងប្រទេសថៃដែលបានជួលកម្មករចំណាកស្រុករាប់លាននាក់ពីប្រទេសជិតខាងរបស់ខ្លួនបានកើនឡើងទ្វេដងកាលពីចុងសប្តាហ៍ទៅដល់៧២១នាក់ដែលជាចំនួនខ្ពស់ជាងគេនៅក្នុងតំបន់។
នៅពេលដែលរាជធានីបាងកកត្រៀមនឹងបិទទាំងស្រុង កម្មករជាច្រើន មិនមានការងារធ្វើ ថ្វីបើរដ្ឋាភិបាលបានជំរុញឲ្យសាធារណជនមិនធ្វើដំណើរទៅកាន់ផ្ទះសម្បែងវិញក៏ដោយ។ រូបថតដែលចុះផ្សាយកាលពីថ្ងៃចន្ទដោយបណ្តាញ ព័ត៌មានក្នុងស្រុកបានបង្ហាញថា កម្មករមីយ៉ាន់ម៉ារាប់ពាន់នាក់កំពុងរង់ចាំនៅច្រកព្រំដែនខាងត្បូងដើម្បីឆ្លងព្រំដែន។
លោក Unsit Sampuntharat អភិបាលខេត្តតាក់ បានប្រាប់ទីភ្នាក់ងារព័ត៌មានបារាំង AFP ថា កម្មករចំណាកស្រុកជាង៩ពាន់នាក់ ត្រូវគេរំពឹងនឹងវិលត្រឡប់ទៅកាន់ប្រទេសវិញកាលពីថ្ងៃចន្ទ បន្ទាប់ពីស្ពានមិត្តភាពថៃ និងមីយ៉ាន់ម៉ានឹងត្រូវបិទ។
លោក Jirasak Yaowasakul នាយកចាត់ចែងក្រុមហ៊ុនរថយន្តដឹកអ្នកដំណើរដ្ឋ និយាយថា ស្ថានីយរថយន្តដឹកអ្នកដំណើរសំខាន់៣នៅក្រុងបាងកកក៏បានឃើញអ្នកដំណើរជាង៨ម៉ឺន៤ពាន់នាក់ដែរកាលពីចុងសប្តាហ៍។
កម្មករចំណាកស្រុកប្រហែល៤លាននាក់មកពីប្រទេសឡាវ មីយ៉ាន់ម៉ា និងកម្ពុជា បានធ្វើការក្នុងប្រទេសថៃ៕
