ក្រសួងសុខាភិបាល នៅថ្ងៃព្រហស្បតិ៍នេះ បានស្នើឱ្យអភិបាលរាជធានីខេត្តទាំងអស់ត្រូវចាត់វិធានការតឹងរ៉ឹងលើកន្លែងបម្រើសេវាសុខាភិបាលទាំងអស់ក្នុងភូមិសាស្រ្តរបស់ខ្លួន ដើម្បីធានាថា ប្រជាពលរដ្ឋទទួលបានសេវាសុខាភិបាលដែលមានគុណភាព។ នេះបើតាមលិខិតរបស់រដ្ឋមន្រ្តីសុខាភិបាល ចុះថ្ងៃទី១ ខែធ្នូ ឆ្នាំ២០២២ ផ្ញើទៅកាន់អភិបាលនៃគណៈអភិបាលរាជធានីខេត្តទាំងអស់។
លិខិតបញ្ជាក់ថា ក្រសួងសង្កេតឃើញថា មូលដ្ឋានសុខាភិបាលមួយចំនួនពុំទាន់បានគោរពឱ្យបានត្រឹមត្រូវតាមច្បាប់ស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាល ច្បាប់ស្តីពីការគ្រប់គ្រងលើការប្រកបវិជ្ជាជីវៈឯកជនក្នុងវិស័យវេជ្ជសាស្ត្រ អមវេជ្ជសាស្រ្ត និងជំនួយវេជ្ជសាស្រ្ត និងក្រមសីលធម៌វិជ្ជាជីវៈនោះទេ។
រដ្ឋមន្រ្តីក្រសួងសុខាភិបាល បានស្នើឱ្យអភិបាលរាជធានីខេត្តទាំងអស់«ណែនាំដល់មន្ទីរសុខាភិបាលឱ្យចុះត្រួតពិនិត្យ តាមដាន និងចាត់វិធានការយ៉ាងម៉ឺងម៉ាត់បំផុតចំពោះអ្នកផ្តល់សេវាសុខាភិបាល និងម្ចាស់មូលដ្ឋានសេវាសុខាភិបាលឯកជនទាំងឡាយណាដែលមិនបានអនុវត្តឱ្យបានត្រឹមត្រូវតាមច្បាប់...»។
ចំណាត់ការរបស់ក្រសួងសុខាភិបាលកើតឡើង ក្រោយមានករណីឆ្មបម្នាក់នៅមន្ទីរសម្រាកព្យាបាល និងសម្ភព ដើមអង្ក្រងក្នុងខេត្តកំពង់ស្ពឺ ដែលបានផ្តល់សេវារំលូតកូនក្នុងផ្ទៃដល់ស្ត្រីម្នាក់រហូតដល់មានគ្រោះថ្នាក់ខ្លាំង។
ក្រសួងសុខាភិបាលបានរកឃើញថា នោះជាការធ្វេសប្រហែស ដោយសារឆ្មបនោះមិនទាន់ទទួលបានការបណ្តុះបណ្តាលបច្ចេកទេស ស្តីពីរំលូតគភ៌នៅឡើយ។ នេះបើតាមសេចក្តីប្រកាសព័ត៌មានមួយរបស់ក្រសួងសុខាភិបាល។
ស្រ្តីម្នាក់នោះបានធ្លាក់ឈាម និងមានអាការៈកាន់តែធ្ងន់ធ្ងរ ក្រោយទទួលសេវារំលូតគភ៌អាយុ១៨សប្តាហ៍ នៅទីនោះ។
ក្រសួងសុខាភិបាលបានបញ្ជាក់ថា ក្រោយពីការសិក្សាស្រាវជ្រាវរួចរាល់មក គណៈវិជ្ជាជីវៈឆ្មបបានរកឃើញកំហុសឆ្មបម្នាក់ នោះនិងបានដាក់ទណ្ឌកម្មខាងវិន័យទៅលើឆ្មបឈ្មោះ អ៊ុង ធារិន ដោយផ្អាកការប្រកបវិជ្ជាជីវៈឆ្មបជាបណ្តោះអាសន្ន រយៈពេល២ឆ្នាំ យោងតាមមាត្រាទី១៥ នៃច្បាប់ស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាល។
រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានសម្តែងការសោកស្តាយយ៉ាងខ្លាំងចំពោះករណីនេះ និងតម្រូវឱ្យមន្ទីរព្យាបាលដើមអង្ក្រង ទទួលខុសត្រូវចំពោះមុខច្បាប់ជាធរមាន លើបាតុភាពដែលបានកើតមានឡើង ដែលបណ្តាលមកពីការធ្វេសប្រហែសនេះ។ នេះបើតាមសេចក្តីប្រកាសព័ត៌មានរបស់ក្រសួង។
ស្វាមីរបស់ស្ត្រីរូបនេះ គឺលោក កេង វឿន ប្រាប់វីអូអេថា មុនថ្ងៃទី១០ ខែវិច្ឆិកា ភរិយារបស់លោកគឺ អ្នកស្រី សឿន ស្រីអូន បានទៅពិនិត្យអេកូនៅមន្ទីរសម្រាកព្យាបាល និងសម្ភពដើមអង្ក្រង ដោយគ្រូពេទ្យបញ្ជាក់ថា សង្វាក់បេះដូងកូនក្នុងផ្ទៃដែលមានអាយុ១៨សប្តាហ៍លែងដើរ ឬហៅថា ស្លាប់ក្នុងផ្ទៃ។ លោកបន្ថែមថា លោកបានទៅពិនិត្យនៅគ្លីនិកមួយកន្លែងផ្សេងទៀត វេជ្ជបណ្ឌិតក៏លើកឡើងដូចគ្នា។
លោក និងភរិយាក៏សម្រេចចិត្តឱ្យសម្ភពដើមអង្ក្រង រំលូតកូនក្នុងផ្ទៃនោះ នៅថ្ងៃទី១០ ខែវិច្ឆិកា ក្នុងតម្លៃ៤០០ដុល្លារ។
បុរសរូបនោះបន្តថា នៅពេលមកដល់ផ្ទះ កាកសំណល់ដែលសម្អាតយកកូនដែលស្លាប់ក្នុងផ្ទៃចេញនោះ គឺនៅមានធ្លាក់ចេញមកក្រៅបន្តិចបន្តួច ទើបលោក និងភរិយាទៅសម្ភពដើមអង្ក្រងម្តងទៀត នៅថ្ងៃទី២២ ខែវិច្ឆិកា ដើម្បីឱ្យសម្អាតស្បូនឡើងវិញ។ លោកបន្តថា នៅថ្ងៃទី២២នោះ ពេទ្យថាស្បូន គឺស្អិតល្មួត ពិបាកលាងសម្អាត ស្រាប់តែមួយសន្ទុះក្រោយមក ក៏ឃើញមានការធ្លាក់ឈាមយ៉ាងច្រើន។
លោក កេង វឿន ប្រាប់វីអូអេនៅថ្ងៃព្រហស្បតិ៍នេះថា ភរិយារបស់លោកនៅមានអាការៈធ្ងន់ធ្ងរនៅឡើយ ដោយនិយាយបានបន្តិចបន្តួច តែមិនទាន់អាចបរិភោគអ្វីបានទេ។ ភរិយារបស់លោកនៅមិនទាន់បានចេញពីបន្ទប់សង្គ្រោះបន្ទាន់នៅឡើយទេ ចាប់តាំងពីមកដល់ពេទ្យកាល់ម៉ែត្រ កាលពីថ្ងៃទី២៦ ខែវិច្ឆិកា មកដល់ថ្ងៃព្រហស្បតិ៍នេះ។
លោកបន្ថែមថា ក្រុមគ្រូពេទ្យបានយកចិត្តទុកដាក់ តាមដានអាការៈប្រពន្ធរបស់លោក និងបានបញ្ចូលឈាមឱ្យ ដោយឥតគិតថ្លៃ បូករួមសេវាពេទ្យផ្សេងៗ ក៏មិនគិតកម្រៃអ្វីនោះដែរ។
លោកបញ្ជាក់ថា៖ «គាត់[ពេទ្យ] នៅតាមដានស្ថានភាពជំងឺរបស់យើងសិន ដោយថា[ប្រពន្ធខ្ញុំ]គាត់ខ្សោយ អ៊ីចឹងហើយគាត់ដាក់ថ្នាំផ្សះ ដាក់អីឱ្យគាត់មានកម្លាំងរឹងមាំអ៊ីចឹងបាន គាត់ធ្វើតាមបច្ចេកទេសរបស់គាត់។ ហើយបើជួយគាត់ដឹងតែជួយអស់ពីកម្លាំងកាយចិត្តរបស់គាត់ហើយ»។
វីអូអេមិនទាន់អាចសុំការបញ្ជាក់ពីម្ចាស់មន្ទីរសម្រាកព្យាបាល និងសម្ភពដើមអង្ក្រងបាននៅឡើយទេ។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី ប្រាប់វីអូអេថា លោកគាំទ្រចំពោះការដាក់ទណ្ឌកម្ម និងចំណាត់ការរបស់ក្រសួងសុខាភិបាលលើករណីនេះ។ លោកថា កូន១៨សប្តាហ៍ គឺត្រូវការបច្ចេកទេសខ្ពស់ ព្រោះបញ្ហានេះអាចឈានទៅធ្វើឱ្យម្តាយ និងទារកក្នុងផ្ទៃអាចស្លាប់បាន។
លោកថ្លែងថា៖ «កូន១៨អាទិត្យមានន័យថា កូនហ្នឹងធំហើយ វាដុះដៃដុះជើង លលាដ៍ក្បាល វាមានសព្វគ្រប់ទាំងអស់ អ៊ីចឹងអ្វីដែលគាត់ចាប់ផ្តើមធ្វើ ដោយគាត់មិនបានគិតថាផលវិបាកនៃម្តាយយ៉ាងម៉េច ព្រោះពេលណាយើងលូកកន្ត្រៃប៉ាំង (កន្ត្រៃពេទ្យ) បើកទ្វារមាស ដើម្បីយកសាច់ កម្ទេចកម្ទី កាត់ដៃកាត់ជើង កាត់ក្បាលឱ្យខ្ទេចតែម្តង បានយកចេញអស់។ ហើយបើសិនជាយើងកាត់មិនស្អាត យកវាមិនថ្នម វាអាចនឹងប៉ះពាល់ទៅម្តាយ អាចមានការហូរឈាមខ្លាំង...ហើយមិនអាចទប់បាន។ កន្លែងហ្នឹងហើយធ្វើឱ្យគ្រោះថ្នាក់បាត់បង់ជីវិតទាំងម្តាយទាំងកូន»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក យង់ គិមអេង ថ្លែងថា ការលើកឡើងអំពីការកែលម្អវិស័យសុខាភិបាលតែងតែឮ ប៉ុន្តែបញ្ហានៅតែកើតមាន ដូចករណីកំពុងកើតមាននេះជាដើម។ លោកបន្ថែមថា ក្រសួងសុខាភិបាលត្រូវទទួលខុសត្រូវខ្ពស់ផងដែរក្នុងករណីនេះ ហើយត្រូវត្រួតពិនិត្យ និងរឹតបន្តឹងបន្ថែមទៀត ព្រោះការព្យាបាលមនុស្សពាក់ព័ន្ធនឹងតម្លៃជីវិត ដែលគួរមានការយកចិត្តទុកដាក់ និងផ្តល់តម្លៃ។
លោកឆ្ងល់ថា បញ្ហាដែលកើតមាននេះ តើជាការខ្វះចន្លោះនៃការត្រួតពិនិត្យ ឬយ៉ាងណា? លោកជំរុញឱ្យមានការស៊ើបអង្កេតឱ្យបានច្បាស់ ជាពិសេសលើម្ចាស់សម្ភព និងត្រូវដាក់ពិន័យទៅតាមច្បាប់ឱ្យបានត្រឹមត្រូវ។
លោកថ្លែងថា៖ «ត្រូវតែមានការដាក់ទោសជាក់លាក់ទៅតាមគតិច្បាប់ដែរ មិនអាចថា មានការបន្ធូរបន្ថយ ការលើកលែងទេ។ បើមិនអ៊ីចឹងទេ គឺបញ្ហានៅតែកើតអ៊ីចឹង»។
នៅក្នុងច្បាប់ស្តីពីការរំលូតកូន មាត្រា៥ចែងថា មានតែវេជ្ជបណ្ឌិត ឬគ្រូពេទ្យមធ្យម ឬឆ្មបមធ្យម ដែលបានទទួលការអនុញ្ញាតពីក្រសួងសុខាភិបាល ទើបអាចធ្វើការរំលូតកូនបាន។ មាត្រា១២ចែងថា ជនទាំងឡាយណាដែលបានប្រព្រឹត្តល្មើសនឹងមាត្រា៥ ឬ៦នៃច្បាប់នេះ ត្រូវទទួលទណ្ឌកម្ម និងទោសទណ្ឌដូចជា បើជាវេជ្ជបណ្ឌិត ឬគ្រូពេទ្យមធ្យម ឬជាឆ្មបមធ្យមគឺត្រូវព្រមាន។
ក្នុងករណីមិនរាងចាល ត្រូវបញ្ឈប់ពីមុខងារ ឬបិទគ្លីនិក ឬមន្ទីរសម្ភពនោះ ដោយមិនទាន់គិតដល់បទល្មើសព្រហ្មទណ្ឌដូចចែងខាងក្រោមនេះ ដែលមានដូចជាបើមិនមែនជាវេជ្ជបណ្ឌិត ឬគ្រូពេទ្យមធ្យម ឬជាឆ្មបមធ្យមត្រូវផ្តន្ទាទោសដាក់ពន្ធនាគារពី១ខែ ទៅ១ឆ្នាំ។ បើការរំលូតកូននោះបណ្តាលឱ្យស្ត្រីដែលមានគភ៌មានជំងឺរ៉ាំរ៉ៃ ឬពិការ ត្រូវផ្តន្ទាទោសពី១ឆ្នាំ ទៅ៥ឆ្នាំ។ បើការរំលូតកូនបណ្តាលឱ្យស្ត្រីដែលមានគភ៌មានគ្រោះថ្នាក់ដល់ស្លាប់ត្រូវផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំ៕
