ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោកស្រី ​Gina Haspel​ នឹង​ក្លាយ​ជា​ស្រ្តី​ទីមួយ​កាន់​តំណែង​ជា​នាយក​ទីភ្នាក់ងារ​ស៊ើប​ការណ៍​សម្ងាត់​ CIA


លោក​ស្រី Haspel នាយក​ទីភ្នាក់​ងារ​ CIA ថ្មី ចូលរួម​ក្នុង​សវនាការ​នៅ​គណៈ​កម្មការ​ស៊ើប​អង្កេត​របស់​ព្រឹទ្ធសភា ដើម្បី​បញ្ជាក់​ពី​ការ​តែង​តាំង​ នៅ​វិមានកាពីតូល កាល​ពី​ថ្ងៃទី​៩ ឧសភា ២០១៨។

ព្រឹទ្ធសភា​សហ​រដ្ឋ​អាមេរិក​បាន​បោះ​ឆ្នោត​សម្រេច​តែង​តាំង​លោកស្រី Haspel​ ជា​នាយក​ថ្មី​របស់​ទីភ្នាក់ងារ​ CIA​ ដោយ​បាន​ទទួល​សំឡេង​គាំទ្រ​ ៥៤ ទល់ ៤៥ សំឡេង នៅ​ក្នុង​ការ​បោះឆ្នោត​កាល​ពី​ថ្ងៃ​ព្រហស្បតិ៍​ ដែល​ជា​ការ​បោះឆ្នោតបញ្ចប់​ដំណើរការ​តែង​តាំង​ដ៏​ចម្រូង​ចម្រាស​មួយ។

សមាជិក​ព្រឹទ្ធសភា​ខាង​គណបក្ស​ប្រជាធិបតេយ្យ​៦​នាក់​បាន​បោះ​ឆ្នោត​គាំទ្រ​លោកស្រី ​Haspel ​ខណៈ​សមា​ជិកព្រឹទ្ធ​សភា​ខាង​គណបក្ស​សាធារណរដ្ឋ​២​នាក់​បាន​ប្រឆាំង​នឹង​ការ​តែង​តាំង​លោក​ស្រី​ដើម្បី​ជំនួស​តំណែង​លោក ​Mike Pompeo ដែល​ត្រូវ​បាន​តែង​តាំង​ជា​រដ្ឋមន្រ្តី​ការបរទេស​សហរដ្ឋ​អាមេរិក​កាល​ពី​ខែ​មុន។

សមាជិក​ព្រឹទ្ធសភា​លោក​ Tom Cotton​ បាន​ថ្លែង​ថា៖ «លោក​រដ្ឋមន្រ្តី ​Pompeo​ បាន​បាន​ដឹកនាំ​ទីភ្នាក់ងារ​នេះ​បាន​យ៉ាង​ល្អ​មុន​នឹង​លោក​ចាក​ចេញ​ ហើយ​លោកស្រី Haspel​ គឺ​ជា​អនុប្រធាន​ម្នាក់ប្រកប​ដោយ​សមត្ថភាព។ លោកស្រី​មាន​បទពិសោធន៍​ការងារ​រយៈ​ពេល​៣៣ឆ្នាំ​មក​ហើយ»។

នៅ​អំឡុង​សវនាការ​ លោកស្រី ​Haspel​ បាន​បដិសេធ​ម្តង​ហើយ​ម្តងទៀត​មិន​ឆ្លើយ​ទៅ​នឹង​សំណួរ​ថា​ តើ​ការ​សួរ​ចម្លើយ​ដោយ​ប្រើ​វិធីសាស្រ្ត​ព្រៃផ្សៃ​ជា​ការ​ខុស​នឹង​សីលធម៌​ដែល​ឬ​យ៉ាង​ណា​នោះ។ ទោះ​ជា​យ៉ាងណា​ក៍​ដោយ​ កាល​ពី​ដើម​សប្តាហ៍​នេះ​ លោក​ស្រី​បាន​សរសេរ​លិខិត​អះអាង​មួយ​ច្បាប់​នៅ​កាន់​លោក ​Mark Warner​ ប្រធាន​គណៈ​កម្មាធិការ​ខាង​គណបក្ស​ប្រជាធិបតេយ្យ​ថា​ លោកស្រី​មិន​បាន​ប្រើប្រាស់​វិធី​រំលោភ​បំពាន​ទាំង​នោះ​ទេ។

លោក​ Warner​ បាន​និយាយ​នៅក្នុង​សេចក្តីថ្លែងការ​នោះ​ថា​ លោក​ជឿ​ថា​លោកស្រី Haspel​ នឹង​ក្រោកឡើង​ប្រឆាំង​លោកប្រធានាធិបតី​ប្រសិន​បើ​លោក​បញ្ជា​ឲ្យ​លោកស្រី​ធ្វើ​អ្វី​ដែល​ខុស​ច្បាប់​ ឬ​គ្មានសីលធម៌​ដូច​ជា​ការ​ធ្វើទារុណកម្ម​សួរចម្លើយ​នោះ៕

XS
SM
MD
LG