ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រុម​ជន​ម៉ូស្លីម​និយម​ជ្រុល​ប្រមូល​ផ្តុំគ្នា​តវ៉ា​​នៅ​ខាង​ក្រៅ​ទីស្នាក់​ការ​ក្រុមហ៊ុនហ្វេសប៊ុកក្នុង​ប្រទេស​ឥណ្ឌូនេស៊ី


ក្រុម​ជនអ្នកកាន់​សាសនា​ឥស្លាម​ធ្វើ​បាតុកម្ម​នៅ​ខាង​ក្រៅ​ក្រុមហ៊ុន​ហ្វេសប៊ុក​ នៅ​ទីក្រុង​ហ្សាការតា ប្រទេស​ឥណ្ឌូនេស៊ី កាល​ពី​ថ្ងៃទី​១២ ខែ​មករា ២០១៨។

ជន​អ្នក​កាន់​សាសនា​ប្រហែល​២០០​នាក់​ បាន​ប្រមូល​ផ្តុំ​គ្នា​នៅ​ខាង​មុខ​ទីស្នាក់​ការ​កណ្តាល​របស់​ក្រុម​ Facebook​ នៅក្នុង​រដ្ឋធានី​ហ្សាការតា​ ប្រទេស​ឥណ្ឌូនេស៊ី​ ដើម្បី​តវ៉ា​ដោយ​ចោទ​ក្រុម ​Facebook​ បាន​បិទ​គេហទំព័រ​របស់​ក្រុមជនជាតិ​ម៉ូស្លីម​និយមជ្រុល​ក្នុង​ប្រទេស​ឥណ្ឌូនេស៊ី​ ពី​ការ​ចោទ​ថា​ជា​ការ​បំផុស​ឲ្យ​មាន​ការ​ស្អប់ខ្ពើម។

ក្រុម​អ្នកតវ៉ា​ដែល​បាន​រៀបចំឡើង​ដោយ​ក្រុម​ជនអ្នក​កាន់​សាសនា​ឥស្លាមនិយម​ជ្រុល​ ហៅ​កាត់​ថា​ (FPI) ដោយ​ពួក​គេ​បាន​ដើរ​ក្បួន​បាតុកម្ម​ចេញ​ពី​វិហារ​ឥស្លាម​មួយ​កន្លែង​ក្នុង​រដ្ឋធានី​ហ្សាការតា​ ឆ្ពោះ​ទៅ​ទីស្នាក់​ការ​កណ្តាល​របស់​ក្រុមហ៊ុន​ Facebook​ ដែល​មាន​ការ​ការពារ​ដោយ​ប៉ូលិស​រាប់រយ​នាក់។ អ្នក​តវ៉ា​ជា​ច្រើន​បាន​កាន់​បដា​ដែល​សរសេរ​ថា «កុំ​ធ្វើ​ទុក្ខបុកម្មេញ​ជន​ម៉ូស្លីម»​ និង​«កុំ​វាយ​តម្លៃ​ពួក​យើង​តាម​រយៈ​ Facebook»។

លោក ​Samet Maarif ​អ្នក​នាំ​ពាក្យ​ក្រុម ​FPI ​បាន​និយាយ​ថា​ អ្នក​តវ៉ា​ចង់​ដឹង​ពី​មូល ហេតុ​ ដែល​ក្រុមហ៊ុន​ Facebook​ បិទ​គណនី ​Facebook​ របស់​ក្រុម​ FPI​ ប៉ុន្តែ​នៅ​អនុញ្ញាត​ឲ្យ​គណនី​ផ្សេង​ទៀត​ ដែល​ប្រឆាំង​នឹង​មេដឹក​នាំ​របស់​ខ្លួន​ និង​ក្រុម​ឥស្លាម នៅ​តែ​បន្ត​ប្រើប្រាស់​បាន​នោះ។ ​លោក Maarif បាន​និយាយ​ថា៖ «យើង​ចង់​បាន​ភាពយុត្តិធម៌​ និង​កុំ​ឲ្យ​រើសអើង​គណនី Facebook​ របស់​ជន​ម៉ូស្លីម​ត​ទៅ​ទៀត»។

អ្នក​នាំ​ពាក្យ​ក្រុមហ៊ុន​ Facebook ​លោកស្រី ​Putri Ariani ​បាន​ថ្លែង​ថា​ ក្រុមហ៊ុន​អនុញ្ញាត​ឲ្យ​ម្ចាស់​គណនី​ប្រើប្រាស់​បណ្តាញ​សង្គម​នេះ​ ដើម្បី​ចែកចាញ​ទស្សនៈ​របស់​ខ្លួន​ និង​ផ្សព្វផ្សាយ​ពី​ចំណេះដឹង។ ក្រុមហ៊ុន​នឹង​លុបចោល​គណនី​ណា​ដែល​ផ្សព្វផ្សាយ​បំផុស​ឲ្យ​មាន​ការស្អប់ខ្ពើម​ និង​អំពើ​ហិង្សា។

ក្រុម FPI​ ស្នើ​ឲ្យ​បង្កើត​ច្បាប់​សម្រាប់​សាសនា​ឥស្លាម​នៅក្នុង​ប្រទេស​ឥណ្ឌូនេស៊ី​ ដែល​ជា​ប្រទេស​មាន​ពលរដ្ឋ​កាន់​សាសនា​ឥស្លាម​ច្រើន​ជាងគេ​នៅ​ក្នុង​ពិភពលោក។

ឥណ្ឌូនេស៊ី​ជា​ប្រទេស​ស្ថិត​ក្នុង​តំបន់​អាស៊ីអាគ្នេយ៍​ ជា​ប្រទេស​មួយ​ដែល​គេ​ស្គាល់​ថា​ជា​ប្រទេស​មាន​ភាព​អត់​អោន​ និង​ជា​សង្គមមាន​ភាព​ចម្រុះ​ ដែល​មាន​ការគោរព​សេរីភាព​ក្នុង​ការបញ្ចេញ​មតិ៕

XS
SM
MD
LG