ភ្ជាប់​ទៅ​គេហទំព័រ​ទាក់ទង

យុទ្ធនាការ​ការ​ទូត​របស់​បក្ស​ជំទាស់​ ​បាន​រំកិល​មក​ដល់​តំបន់​អាស៊ីអាគ្នេយ៍


អ្នក​​ស្រី ​​មូរ ​​សុខ​ហួរ ​​ក្នុង​​ជំនួប​​ជាមួយ​​ លោក ​Fadli​ Zon ​អនុ​​ប្រធាន​​សភា​​ជាន់​​ទាប​​ឥណ្ឌូ​នេស៊ី ​កាល​ពី​ថ្ងៃទី ​០៧ ​ខែ ធ្នូ ឆ្នាំ​ ២០១៧​ នៅ​ទីក្រុង​ចាកាតា។ ​(រូប​ថត​ផ្ដល់​ឱ្យ)​

«ឥណ្ឌូណេស៊ី​សំខាន់! ​ឥណ្ឌូណេស៊ី​សំខាន់​ពី​ព្រោះ​ជា​សហ​ប្រធាន​សន្និសីទ​ប្រទេស​កម្ពុជា​យើង​នៅ​ទីក្រុង​ប៉ារីស»។​​

ថ្នាក់​ដឹកនាំ​នៃ​គណបក្ស​សង្គ្រោះ​ជាតិ ​ដែល​ត្រូវ​បាន​តុលាការ​កំពូល​កម្ពុជា​រំលាយ​កាល​ពី​ខែ​វិច្ឆិកា​ ​បាន​រំកិល​ការ​ធ្វើយុទ្ធនាការ​ការ​ទូត​ ​មក​ដល់​តំបន់​អាស៊ីអាគ្នេយ៍​ហើយ​នៅ​ប្រទេស​ឥណ្ឌូណេស៊ី ដើម្បី​កៀង​គរ​រក​ការ​គាំទ្រ​ លៃ​យ៉ាងណា​ឱ្យ​មានការ​ធ្វើ​ប្រក្រតី​កម្ម​ឡើង​វិញ​នៃ​បរិយាកាស​នយោបាយ។​ ​នេះ​បើ​តាម​ការ​ឱ្យ​ដឹងរបស់​អនុប្រធាន​នៃ​អតីត​បក្ស​ជំទាស់​នេះ។

បន្ទាប់ពី​បាន​ដឹកនាំ​ការ​ធ្វើ​បាតុកម្ម​ប្រឆាំង​នឹង​ការ​បង្ក្រាប​ផ្នែក​នយោបាយ​នៅ​កម្ពុជា ​នា​ទីក្រុង​កង់បេរ៉ា​ ប្រទេស​អូស្ត្រាលី ទី​ដែល​ខ្លួន​បាន​ជួប​សមាជិក​សភា ​និង​រដ្ឋ​មន្ត្រី​ការ​បរទេស​អូស្ត្រាលី​រួច​មក ​អនុ​ប្រធាន​គណបក្ស​សង្គ្រោះ​ជាតិ​គឺ ​អ្នក​ស្រី​ ​មូរ សុខហួរ​ ​បាន​ឈប់​សំចត​យុទ្ធនាការ​ការ​ទូត​ នៅ​ទី​ក្រុង​ហ្សាកាតា​ ​ប្រទេស​ឥណ្ឌូណេស៊ី ​ក្នុង​សប្ដាហ៍​នេះ។

នៅ​ទីក្រុង​ហ្សាកាតា ​អនុ​ប្រធាន​ចលនា​ជំទាស់​រូប​នេះ បាន​ជួប​នឹង​លោក ​Fadli​ Zon ​អនុ​ប្រធាន​សភា​ជាន់​ទាប​របស់​ឥណ្ឌូនេស៊ី ​ដែល​បាន​បង្ហាញ​ចំណាប់​ចង់​ឃើញ​ ​«ប្រទេស​កម្ពុជា​ដែល​មាន​ចរិត​ប្រជាធិបតេយ្យ​ជាង​មុន»។​ ​នេះ​បើ​យោងតាមការ​ផ្សាយ​របស់​ទំព័រ​ហ្វេសប៊ុក​ផ្លូវ​ការ​នៃ​ អ្នកស្រី ​មូរ​ សុខហួរ។​

ក្នុង​បទ​សម្ភាសន៍​តាម​ទូរស័ព្ទ​មួយ ​កាល​ពី​អាធ្រាត្រ​ថ្ងៃ​ព្រហស្បតិ៍​ អ្នកស្រី​ មូរ​ ​សុខហួរ ​បាន​ប្រាប់​VOA​ថា៖

«ឥណ្ឌូណេស៊ី​សំខាន់! ​ឥណ្ឌូណេស៊ី​សំខាន់​ពី​ព្រោះ​ជា​សហ​ប្រធាន​សន្និសីទ​ប្រទេស​កម្ពុជា​យើង​នៅ​ទីក្រុង​ប៉ារីស»។

អ្នកស្រី មូរ សុខ​ហួរ ក្នុងជំនួបជាមួយ លោក ​Fadli​ Zon ​អនុប្រធានសភាជាន់ទាបឥណ្ឌូ​នេស៊ី ​កាល​ពី​ថ្ងៃទី ​០៧ ​ខែ ធ្នូ ឆ្នាំ​ ២០១៧​ នៅ​ទីក្រុង​ចាកាតា។ ​(រូប​ថត​ផ្ដល់​ឱ្យ)​
អ្នកស្រី មូរ សុខ​ហួរ ក្នុងជំនួបជាមួយ លោក ​Fadli​ Zon ​អនុប្រធានសភាជាន់ទាបឥណ្ឌូ​នេស៊ី ​កាល​ពី​ថ្ងៃទី ​០៧ ​ខែ ធ្នូ ឆ្នាំ​ ២០១៧​ នៅ​ទីក្រុង​ចាកាតា។ ​(រូប​ថត​ផ្ដល់​ឱ្យ)​

បន្ទាប់​ពី​ប្រធាន​គណបក្ស​សង្គ្រោះ​ជាតិ លោក​ ​កឹម សុខា​ ​ត្រូវ​បាន​កង​កម្លាំង​នគរ​បាល​ចូល​ទៅ​ចាប់​ខ្លួន​ទាំង​កណ្ដាល​រាត្រី ​កាល​ពី​ដើម​ខែ​កញ្ញា​ ​គណ​បក្ស​ប្រឆាំង​នេះ ត្រូវ​បាន​រំលាយ​តាម​នីតិន័យ ​ដោយ​អំណាច​សាល​ដីកា​តុលាការ​កំពូល​ ​ក្នុង​ក្រប​ខណ្ឌ​នៃ​ការ​ធ្វើ​វិសោធន​កម្ម​មួយដង​ជា​ពីរ​ដង​ ​ក្នុង​ឆ្នាំ​នេះ​ ​លើ​ច្បាប់​ស្ដីពី​គណ​បក្ស​នយោបាយ​ ​និង​ច្បាប់​បោះ​ឆ្នោត ដែលផ្ដួច​ផ្ដើម​គំនិត​ដោយគណបក្ស​ប្រជាជន​កម្ពុជា ដែល​កំពុង​កាន់​អំណាច។

អ្នក​នយោបាយ​ជា​ ក្បាល​ម៉ាស៊ីន​ដឹកនាំ​របស់​បក្ស​សង្គ្រោះ​ជាតិ​មួយ​ចំនួន​ធំ ​កំពុង​ស្ថិត​នៅ​ក្រៅ​ប្រទេស​គេច​ចេញ​ពី​ការ​ចាប់ចង​ពី​សំណាក់​រដ្ឋ​អំណាច​ ​ហើយ​លោក​នាយក​រដ្ឋ​មន្ត្រី ​ហ៊ុន ​សែន​ ក៏​បាន​ព្រមាន​ផង​ដែរ​ដល់​អ្នក​នយោបាយ ​និងសមាជិក​រចនា​សម្ព័ន្ធ​គណបក្ស​សង្គ្រោះ​ជាតិ​នៅ​ក្រៅ​ប្រទេស​ទាំង​អស់​ថា ​មាន​លទ្ធ​ភាព​ថា​ពួក​គេ​អាច​នឹង​ត្រូវ​បាន​ចាប់​ខ្លួន​បញ្ជូន​មកទទួលទោសទណ្ឌ​នៅ​ប្រទេស​កម្ពុជា ​បើ​សិន​ជា ​ពួក​គេ​មាន​វត្តមាន​នៅ​បណ្ដា​ប្រទេស​ក្នុង​តំបន់​អាស៊ី។​

​អ្នកស្រី​ អនុ​ប្រធាន​គណបក្ស​ជំទាស់​ដែល​តាំង​ទី​ទាំង​ស្រុង​នៅ​ក្រៅ​ប្រទេស​ បាន​និយាយ​ថា ​លោក​អនុ​ប្រធាន​សភា​ជាន់​ទាប​ឥណ្ឌូណេស៊ី ​Fadli​ Zon ​បាន​សន្យា​ចំពោះ​មុខ​អ្នកស្រី​ថា ​នឹង​នាំ​យក​ទុក្ខ​កង្វល់​នៃ​បញ្ហា​លទ្ធិ​ប្រជាធិបតេយ្យ​នៅប្រទេសកម្ពុជាទៅ​ជជែកពិភាក្សាក្នុង​សភា​ពេញ​អង្គ ​នា​សប្ដាហ៍​ក្រោយ ​ហើយ​លោក​នឹង​ព្យាយាម​ធ្វើការ​ជាមួយ​រដ្ឋាភិបាល​ឥណ្ឌូណេស៊ី ​និង​បង្កើត​ទំនាក់​ទំនង​មក​កាន់​លោក​ប្រធាន​រដ្ឋ​សភាកម្ពុជា ហេង​ សំរិន។ ​

ក៏​ប៉ុន្តែ​អ្នកស្រី ​មូរ ​សុខ​ហួរ​ ក៏​បាន​បញ្ជាក់​ផង​ដែរ​ថា ​អ្នក​ស្រី​មិន​មាន​គម្រោង​ធ្វើ​ដំណើរ​ទៅ​ប្រទេសណា​ផ្សេង​ទៀត​នៅ​ក្នុង​តំបន់​អាស៊ីអាគ្នេយ៍ ​ដើម្បី​ធ្វើ​យុទ្ធនា​ការ​ការ​ទូត​នោះ​ទេ។

​អ្នកស្រី ​មូរ ​សុខហួរ ​បាន​ប្រាប់​VOA​ថា៖

​«ស្ថាន​ការណ៍​ដ៏​ធ្ងន់ធ្ងរ​នេះ ​គ្មាន​ប្រទេស​ណា​ដែល​គេ​កាន់​លទ្ធិ​ប្រជាធិបតេយ្យ ​គេ​ទទួល​យក​បាន​ទេ។ ​ដូច្នេះ ​អ្វី​ដែលសម្ដេច​ ហ៊ុន ​សែន ​លោក​ធ្វើ​នេះ ​លោក​ដើរ​ហួស​ពី​ព្រំដែន​ទៅ​ទៀត។ ​បន្ទាត់​ក្រហម​ទាំង​ប៉ុន្មាន​ គឺ​លោក​បាន​ដើរ​ផុត លើសពី​បន្ទាត់​ក្រហម​ ថា​សញ្ញា​នេះ​ជា​សញ្ញា​គ្រោះ​ថ្នាក់​ធ្ងន់​ណាស់​សម្រាប់​លទ្ធិ​ប្រជាធិបតេយ្យ»។​

អ្នកស្រី មូរ សុខ​ហួរ ក្នុងជំនួបជាមួយ លោក ​Fadli​ Zon ​អនុប្រធានសភាជាន់ទាបឥណ្ឌូ​នេស៊ី ​កាល​ពី​ថ្ងៃទី ​០៧ ​ខែ ធ្នូ ឆ្នាំ​ ២០១៧​ នៅ​ទីក្រុង​ចាកាតា។ ​(រូប​ថត​ផ្ដល់​ឱ្យ)​
អ្នកស្រី មូរ សុខ​ហួរ ក្នុងជំនួបជាមួយ លោក ​Fadli​ Zon ​អនុប្រធានសភាជាន់ទាបឥណ្ឌូ​នេស៊ី ​កាល​ពី​ថ្ងៃទី ​០៧ ​ខែ ធ្នូ ឆ្នាំ​ ២០១៧​ នៅ​ទីក្រុង​ចាកាតា។ ​(រូប​ថត​ផ្ដល់​ឱ្យ)​

​បន្ទាប់​ពី​បាន​ផ្ដាច់​គ្រប់​រូបភាព​នៃ​ជំនួយ​ផ្នែក​កំណែ​ទម្រង់​ការ​បោះឆ្នោត​ពី​គណៈកម្មាធិការ​ជាតិ​រៀបចំ​ការ​បោះ​ឆ្នោត ​(គ.ជ.ប.) ​សហរដ្ឋ​អាមេរិក​ក្រោម​រដ្ឋ​បាល​លោក​ប្រធានាធិបតី ​ដូណាល់ ​ត្រាំ ​បាន​សម្រេច​រឹត​បន្តឹង​ការ​ចេញ​ទិដ្ឋាការដល់​រាល់​មន្ត្រី​កម្ពុជា​ណា ​ដែល​មាន​ចំណែក​ទទួល​ខុស​ត្រូវ​ចំពោះ​ «ការ​បំផ្លិច​បំផ្លាញ»​ របប​ប្រជាធិបតេយ្យ​នៃ​ប្រទេស។​

​រដ្ឋាភិបាល​កម្ពុជា នៅ​តែ​រឹង​ត្អឹង​ចំពោះ​ជំហរ ​និង​វោហារស័ព្ទ​របស់​ខ្លួន ​ដែល​ថា​ រាល់​ការ​បង្ក្រាប​លើ​សំឡេង​ជំទាស់ ​គ្រាន់​តែជា​ការ​អនុវត្ត​ច្បាប់​ស្រប​តាម​ស្មារតី​នីតិរដ្ឋ ​និង​រក្សា​ការពារ​សន្តិភាព ​និង​ស្ថិរ​ភាព​របស់​ប្រទេស​តែ​ប៉ុណ្ណោះ។ ​តែ​អ្នក​រិះ​គន់ បាន​បរិហារ​ជា​ហូរហែ​ថា ​នេះ​ជា​ការ​កម្ចាត់​កម្លាំង​នយោបាយ​ប្រឆាំង​ ដែល​អាច​ប្រកួត​ប្រជែង​នឹង​គណបក្ស​កាន់​អំណាចក្នុង​ការ​បោះ​ឆ្នោត​រដ្ឋ​សភា​ឆ្នាំ​២០១៨។

លោក ​ផៃ ​ស៊ីផាន ​អ្នក​នាំ​ពាក្យ​ទី​ស្ដីការ​គណៈ​រដ្ឋ​មន្ត្រី​កម្ពុជា ​បាន​បរិហារ​តប​ទៅ​នឹង​យុទ្ធនា​ការ​ការ​ទូត​របស់​បក្ស​ប្រឆាំង​ក្នុង​បទ​សម្ភាស​ជាមួយ​ VOA ​យ៉ាង​ដូច្នេះ​ថា៖

«ក្រុម​អ្នក​នយោបាយ​ដែល​ទទួល​ទណ្ឌកម្ម​ពី​តុលាការ​កំពូល​ហ្នឹង ​កំពុង​តែ​មាន​យុទ្ធសាស្ត្រ​កៀរគរ​កម្លាំង ​ដើម្បី​ទាញស្រុកខ្មែរ ​ដើម្បី​ឱ្យ​ចូល​ទៅ​ក្នុង​ការ​គ្រប់​គ្រង​របស់​អន្តរជាតិ​ ដូច​កាល​ជំនាន់​ឆ្នាំ ​១៩៩១ ​ដល់​ឆ្នាំ​១៩៩៣។ ​ក៏​ប៉ុន្តែមិនអាចទៅ​រួច​ទេ»។​

​មន្ត្រី​នាំ​ពាក្យ​រាជ​រដ្ឋាភិបាល​កម្ពុជា​ ​ក៏​បាន​បញ្ជាក់​ដែរ​ថា ​ដោយ​ហេតុ​ថា​ ​កម្ពុជា ​និង​ឥណ្ឌូណេស៊ី ​ជា​រដ្ឋ​សមាជិក​នៃសមាគមប្រជាជាតិ​អាស៊ីអាគ្នេយ៍​(អាស៊ាន) ​ដូច​គ្នា ​ម្ល៉ោះ​ហើយ​គោលការណ៍​វិធី​អាស៊ាន ​ដែល​មិន​លូក​លាន់​ជ្រៀតជ្រែកកិច្ច​ការ​ផ្ទៃ​ក្នុង​ប្រទេស​ផង​គ្នា ​នឹង​មិន​អាច​ឱ្យ​ទី​ក្រុង​ហ្សាកាតា ​ធ្វើអ្វី​បាន​ដើម្បី​ដាក់​សម្ពាធ​រដ្ឋាភិបាល​កម្ពុជា​នោះ​ទេ។

ឥណ្ឌូណេស៊ី​ធ្លាប់​មាន​នាទី​សំខាន់​ជា​តួអង្គ​ដ៏​សកម្ម​ក្នុង​ការ​ខ្នះខ្នែង​ឱ្យ​មាន​សន្តិភាព​នៅ​ប្រទេស​កម្ពុជា​ នា​អំឡុង​ចុងទសវត្សរ៍​ទី៨០ ​និង​ដើម​ទសវត្សរ៍​ទី៩០។

ដោយ​ឡែក​អ្នកស្រី​ ​Astrid​ Norén-Nilsson ​អ្នក​ជំនាញ​កិច្ចការ​នយោបាយ​កម្ពុជា ​នៅ​សាកល​វិទ្យាល័យ ​Lund​ ​ប្រទេស​ស៊ុយអែត បាន​ប្រាប់​VOA​តាម​សារ​អេឡិចត្រូនិក​ផង​ដែរ​ថា ​អ្នក​ស្រី​បាន​អង្កេត​ឃើញ​យុទ្ធនាការ​ការ​ទូត​របស់​គណបក្ស​ជំទាស់ ហាក់មាន​ប្រសិទ្ធភាព​មួយ​ដង​មួយ​គ្រា​ ក៏​ប៉ុន្តែ​សម្រាប់​ឥណ្ឌូណេស៊ី ​មាន​លទ្ធភាព​តិច​ណាស់​ ដែល​នឹង​ឃើញ​ផ្លែ​ផ្កា​អ្វីជាដុំកំភួន​ ដ្បិត​អី​កង​ទ័ព​ឥណ្ឌូណេស៊ី​បាន​ផ្ដល់​ការ​ហ្វឹកហ្វឺន​ជា​ទៀង​ទាត់​ ដល់​កង​កម្លាំង​នៃ​បញ្ជា​ការដ្ឋាន​អង្គរក្ស​នៅ​កម្ពុជា​ ដែល​ទទួល​បន្ទុក​ការពារ​សុវត្ថិភាព​លោក​នាយក​រដ្ឋ​មន្ត្រី ​ហ៊ុន ​សែន ​ដោយ​ផ្ទាល់៕​

(កំណែ៖ មួយផ្នែកនៃអត្ថបទនេះត្រូវបានកែសម្រួល​ត្រង់ចំណុច ​«អ្នកស្រី Astrid Norén-Nilsson អ្នកជំនាញកិច្ច​ការនយោបាយកម្ពុជា នៅសាកលវិទ្យាល័យ Cornell ​សហរដ្ឋអាមេរិក» ​មក​ជា ​«អ្នកស្រី Astrid Norén-Nilsson អ្នកជំនាញកិច្ច​ការនយោបាយកម្ពុជា នៅសាកលវិទ្យា​ល័យ ​Lund​ប្រទេសស៊ុយអែត» ​ទើប​ត្រឹម​ត្រូវ៕)

XS
SM
MD
LG