រដ្ឋាភិបាលវៀតណាមបានសន្យាបង្ក្រាបលើក្រុមហ៊ុនផលិតកម្មណាដែលបានដាក់ស្លាក «ផលិតក្នុងប្រទេសវៀតណាម» ដោយខុសច្បាប់ លើទំនិញដែលនាំចេញទៅកាន់សហរដ្ឋអាមេរិក ដើម្បីគេចពីទណ្ឌកម្មពន្ធគយរបស់សហរដ្ឋអាមេរិកដែលដាក់លើទំនិញចិន។
ក្រុមហ៊ុននាំចេញទំនិញនានាបានចាប់ផ្ដើមបង្វែរផលិតកម្មរបស់ខ្លួនពីប្រទេសចិនទៅប្រទេសវៀតណាម ដើម្បីគេចពីការយកពន្ធគយចំនួន ២៥ ភាគរយ ដែលប្រធានាធិបតីសហរដ្ឋអាមេរិកលោក Donald Trump ដាក់លើទំនិញចិន ដែលមានទឹកប្រាក់ ២០០ ពាន់លានដុល្លារ។
ប៉ុន្តែ រដ្ឋាភិបាលក្រុងហាណូយបាននិយាយថា ក្រុមហ៊ុនផលិតកម្មមួយចំនួនបានអះអាងដោយខុសច្បាប់ថា ទំនិញរបស់ពួកគេដូចជាវាយនភណ្ឌ គ្រឿងសមុទ្រ និងផលិតផលកសិកម្មជាដើម គឺធ្វើនៅប្រទេសវៀតណាម ដែលតាមពិតទំនិញទាំងនោះគឺធ្វើនៅប្រទេសចិន។
លោកឧបនាយករដ្ឋមន្ត្រី Pham Binh Minh បានបញ្ជាក់នៅក្នុងរបាយការណ៍ផ្លូវការមួយដែលបានចេញផ្សាយនៅលើវេបសាយរបស់រដ្ឋាភិបាលវៀតណាមកាលពីថ្ងៃអាទិត្យម្សិលមិញថា ទំនោរនេះ «បានប៉ះពាល់ដល់កិត្តិយសរបស់ក្រុមហ៊ុនអាជីវកម្មវៀតណាម និងទំនិញរបស់ប្រទេសវៀតណាម»។
របាយការណ៍នោះបានបញ្ជាក់ថា មន្ត្រីគយវៀតណាមបានរកឃើញករណីរាប់សិបដងពាក់ព័ន្ធនឹងទំនិញដែលដាក់ស្លាកប្រទេសផលិតមិនត្រឹមត្រូវ ដែលមានគោលបំណងនាំចេញទៅកាន់សហរដ្ឋអាមេរិក ទ្វីបអឺរ៉ុប និងប្រទេសជប៉ុន។
របាយការណ៍នោះបន្ថែមថា រដ្ឋាភិបាលវៀតណាមអំពាវនាវឲ្យមានការត្រួតពិនិត្យតឹងតែងលើការនាំចេញទំនិញទៅកាន់ប្រទេសទាំងនោះ និងបានបញ្ជាក់ថា ប្រទេសវៀតណាមអាចត្រូវសហរដ្ឋអាមេរិក ដែលជាដៃគូពាណិជ្ជកម្មដ៏ចម្បងមួយរបស់ខ្លួន ដាក់ទណ្ឌកម្ម ប្រសិនបើវៀតណាមមិនអាចដោះស្រាយបញ្ហានេះបាន៕
