ភ្ជាប់​ទៅ​គេហទំព័រ​ទាក់ទង

ឯក​អគ្គរដ្ឋ​ទូត​សហរដ្ឋ​អាមេរិក​ប្រចាំ ​អ.ស.ប.​​ថាការ​បាញ់​​​មីស៊ីល​របស់​កូរ៉េខាង​ជើង​បាន​នាំ​ពិភពលោក​ខិត​ជិត​សង្គ្រាម​


អ្នក​ស្រី Nikki Haley ឯកអគ្គរដ្ឋទូត​សហរដ្ឋអាមេរិក​ប្រចាំ​នូវ​អង្គការសហប្រជាជាតិ​ថ្លែង​នៅ​ក្នុង​កិច្ច​ប្រជុំ​ក្រុម​ប្រឹក្សា​សន្តិសុខអំពី​ស្ថានភាព​ប្រទេស​កូរ៉េ​ខាងជើង​កាលពី​ថ្ងៃទី​២៩ វិច្ឆិកា ២០១៧នៅ​ទីស្នាក់ការកណ្តាល​របស់​អ.ស.ប.។

កូរ៉េខាង​ជើងបាន​បញ្ចេញ​វីដេអូ​កាល​ពី​ថ្ងៃ​ព្រហស្បតិ៍​ដែល​មេដឹកនាំ​កូរ៉េខាង​ជើង គីម ​ជុង​អ៊ីលបាន​ពិនិត្យ​មើល​ការ​បាញ់​បង្ហោះកាំ​ជ្រួច​បាល់​លីស្ទិក​អន្តរទ្វីប​ថ្មី​របស់​របប​នោះ។

កាំជ្រួច​ធុន Hwasong-15បាន​ហោះចេញ​កាល​ពី​ព្រឹក​ថ្ងៃ​ពុធ​ពី​កន្លែង​សាក​ល្បង​នៅ​ភាគ​ខាង​ជើង​រដ្ឋធានី​ព្យូងយ៉ាង។កាំជ្រួច​មីស៊ីល​ថ្មី​បានហោះដល់​កម្ពស់​៤ ពាន់​៥រយ​គីឡូម៉ែត្រ​ដែល​មាន​កម្ពស់​១០​ដង​ខ្ពស់​ជាង​ស្ថានីយ​អវកាស​អន្តរជាតិ​នៅ​ក្នុង​គន្លង​ផែនដី ​ហើយ​បាន​ធ្វើ​ដំណើរ​ចម្ងាយ​ប្រហែល​១ពាន់​គីឡូម៉ែត្រ​មុន​ពេល​ធ្លាក់​ចូល​ក្នុង​តំបន់​សេដ្ឋ​កិច្ច​ផ្តាច់​មុខ​របស់​ជប៉ុន​នៅ​ភាគ​ខាង​កើត​នៃ​ឧបទ្វីប​កូរ៉េ។

គីម ជុង​អ៊ុន​បាន​ប្រកាស​ថា ​ការ​បាញ់​បង្ហោះ​កាំជ្រួច​មីស៊ីល​នេះ​បាន​ទទួល​ជោគ​ជ័យ​ដោយ​បាន​ជំរុញ​ឲ្យ​របបនេះ​នៅទីបញ្ចប់​បាន​ក្លាយ​ទៅជា​រដ្ឋ​ដែល​មាន​អាវុធ​នុយក្លែអ៊ែរ​ដ៏​ខ្លាំង​បំផុត​នៅ​ក្នុង​ប្រវត្តិសាស្រ្ត។ អ្នក​វិទ្យា​សាស្រ្ត​និយាយ​ថា កាំជ្រួច​មីស៊ីល​ធុន Hwasong-15 មាន​សមត្ថភាព​គ្រប់​គ្រាន់​ដើម្បី​វាយ​ប្រហារ​ទៅលើ​សហរដ្ឋ​អាមេរិក ​ក៏ប៉ុន្តែ និយាយ​ថា ​កាំជ្រួច​បែប​នេះ​មិន​អាច​ផ្ទុក​ក្បាល​អាវុធ​នុយក្លែអ៊ែរ​បាន​ទេ​ពីព្រោះ​វា​ធ្ងន់ខ្លាំង​ណាស់។

​អ្នក​វិភាគ​មិនជឿ​ថា ​កូរ៉េខាង​ជើង​បានម្ចាស់​ការខាង​បច្ចេក​វិទ្យា​ដើម្បីធ្វើ​ឲ្យ​ប្រាកដថា កាំជ្រួច​មីស៊ីល​នោះ​អាច​ហោះ​ចូល​ក្នុង​បរិយាកាស​របស់​ផែនដី​នោះ​ទេ។

​លោកស្រី Nikki Haley ឯកអគ្គរដ្ឋទូត​សហរដ្ឋ​អាមេរិកប្រចាំ​នៅ​អង្គការ​សហប្រ​ជាជាតិ​បាន​ព្រមាន​កាល​ពី​ថ្ងៃ​ពុធ​ថា ​ការ​បាញ់​បង្ហោះ​កាំជ្រួច​បាល់លីស្ទិក​អន្តរទ្វីប របស់​កូរ៉េខាង​ជើង​បាន​ធ្វើ​ឲ្យ​ពិភពលោក​ខិត​កាន់​តែ​ជិតទៅការ​ធ្វើ​សង្គ្រាម។

លោកស្រីឯកអគ្គរដ្ឋទូតសហរដ្ឋ​អាមេរិកបាន​ប្រាប់​ជំនួប​គ្រា​អាសន្ន​មួយ​របស់​ក្រុម​ប្រឹក្សា​សន្តិសុខ​អង្គការ​សហប្រជាជាតិ​ថា «​យើង​មិនដែល​បាន​ស្វះស្វែង​ធ្វើ​សង្គ្រាម​ជាមួយ​កូរ៉េខាង​ជើង​ទេ ​ហើយទោះបី​សព្វថ្ងៃ​នេះក៏ដោយ ​យើងក៏​មិន​ស្វះ​ស្វែង​រកការ​ធ្វើ​សង្គ្រាម​ដែរ‍»។

លោក​ស្រី​បាន​ព្រមាន​ថា ​បើ​សង្គ្រាម​កើតមាន​ឡើង ​របបកូរ៉េខាង​ជើង​នឹង​ត្រូវ​កម្ទេច​ចោល​ទាំង​ស្រុង៕

XS
SM
MD
LG