ក្រុមអ្នកបរិស្ថាន International Rivers បានអំពាវនាវឲ្យប្រទេសឡាវផ្អាកការសាងសង់ទំនប់វារីអគ្គិសនីដ៏ធំនៅលើដងទន្លេមេគង្គ និងឲ្យប្រទេសនេះ បន្តការចរចាជាមួយនឹងប្រទេសជិតខាងនៅតាមដងទន្លេមេគង្គផ្នែកខាងក្រោមដែលមានការព្រួយបារម្ភពីផលអវិជ្ជមានដោយសារការសាងសង់ទំនប់វារីអគ្គិសនីដ៏ចម្រូងចម្រាសនេះ។
ទំនប់ ដន សាហុង ដែលនឹងកាត់ទន្លេមេគង្គនៅផ្នែកខាងលើនៅចម្ងាយប្រមាណជាពីរគីឡូម៉ែត្រពីព្រំប្រទល់ប្រទេសកម្ពុជា អាចនឹងផ្តល់ថាមពល២៦០មេហ្គាវ៉ាត់។ គម្រោងដែលសាងសង់ដោយក្រុមហ៊ុន Megafirst ដែលជាក្រុមហ៊ុនមួយរបស់ម៉ាឡេស៊ី បានធ្វើឲ្យមានការជំទាស់និងការព្រួយបារម្ភពីសំណាក់មន្ត្រីរដ្ឋាភិបាល ក្រុមអង្គការសង្គមស៊ីវិល និងសហគមន៍នេសាទនៅក្នងប្រទេសដែលជាសមាជិករបស់គណៈកម្មការទន្លេមេគង្គ។
ក្រុមការពារបរិស្ថានបាននិយាយថា ការប៉ះពាល់ពីការសាងសង់ទំនប់នេះមិនត្រូវបានគេសិក្សាវាយតម្លៃឲ្យបានច្បាស់លាស់នោះទេ។ ក្រុមនេះបានបន្ថែមថា ការសាងសង់ទំនប់នេះ អាចជះឥទ្ធិពលអវិជ្ជមានដល់ជីវិតអ្នកនេសាទរាប់លាននាក់ ដែលរស់នៅអាស្រ័យលើផលនេសាទនៅតាមដងទន្លេមេគង្គនេះ។ ទំនប់នេះក៏នឹងអាចធ្វើអោយប៉ះពាល់ដល់គុណភាពទឹក និងផ្លាស់ទីកន្លែងរបស់ត្រីជាច្រើនប្រភេទ។
មន្ត្រីនៃប្រទេសឡាវបាននិយាយថា ខ្លួននឹងបន្តការសាងសង់ទំនប់នេះ បើទោះជាមានការជំទាស់ពីប្រទេសជាសមាជិកគណៈកម្មការទន្លេមេគង្គក៏ដោយ។
លោកស្រី Ame Trandem នាយិកាកម្មវិធីអាស៊ីអាគ្នេយ៍របស់អង្គការទន្លេអន្តរជាតិបានមានប្រសាសន៍នៅក្នុងសេចក្តីថ្លែងការណ៍មួយកាលពីប៉ុន្មានថ្ងៃកន្លងទៅថ្មីៗនេះថា៖
«ទំនប់ ដន សាហុង នេះបានបង្កឲ្យមានការគំរាមកំហែងយ៉ាងខ្លាំងដល់ការចិញ្ចឹមជីវិតនិងសន្តិសុខស្បៀងនៅទូទាំងតំបន់នេះ ហើយនឹងអាចធ្វើឲ្យប៉ះពាល់ឱកាសនៃការអភិវឌ្ឍន៍នៅទន្លេមេគង្គនិងតំបន់នេះទៅអនាគត»។
លោកស្រីបានអំពាវនាវដល់បណ្តាប្រទេសនៅតាមដងទន្លេមេគង្គនិងគណៈកម្មការទន្លេមេគង្គឲ្យ «បង្ហាញឲ្យច្បាស់អំពីការពិភាក្សាទៅលើទំនប់ ដន សាហុង និងបន្តការពិភាក្សាដើម្បីធានាថា ដំណើរការនេះមានតម្លាភាព មានការចូលរួម និងការ ផ្តល់មតិរិះគន់ពីប្រជាជននៃទន្លេមេគង្គ»។
សេចក្តីថ្លែងការណ៍ត្រូវបានគេធ្វើឡើង បន្ទាប់ពីមានកិច្ចប្រជុំនៃគណៈកម្មការទន្លេមេគង្គនៅប្រទេសឡាវកាលពីដើមឆ្នាំនេះ។ គណៈកម្មការនេះ គឺជាស្ថាប័នរួមគ្នាមួយដែលត្រូវបានប្រទេសជាសមាជិកទន្លេមេគង្គបង្កើតឡើងដើម្បីសម្របសម្រួលការងារគ្រប់គ្រង អភិវឌ្ឍន៍ទឹក និងធនធានពាក់ព័ន្ធដ៏ទៃៗទៀតប្រកបដោយនិរន្តរភាព ដើម្បីជាផលប្រយាជន៍របស់ប្រទេសជាសមាជិក និងសេចក្តីសុខសាន្តបស់ប្រជាពលរដ្ឋ។
គណៈកម្មការនេះ បានរក្សាភាពស្ងៀមស្ងាត់បន្ទាប់ពីកិច្ចប្រជុំនៅក្នុងខែមករាដែលនៅពេលនោះប្រទេសដែលជាសមាជិកបង្ហាញនូវការយល់ឃើញផ្សេងៗគ្នា។
អ្នកស្រី លុយ រស្មី នាយិកាប្រតិបត្តិនៃសមាគមថែរក្សាបរិស្ថាននិងវប្បធម៌ដែលធ្វើការជាមួយប្រជាសហគមន៍នៅតាមដងទន្លេមេគង្គក្នុងប្រទេសកម្ពុជាបាននិយាយថា មិនមានអ្នកតំណាងគ្រប់គ្រាន់ដើម្បីបង្ហាញការយល់ឃើញ និងការព្រួយបារម្ភរបស់ប្រជាសហគមន៍នៅក្នុងការពិភាក្សាស្តីពីទំនប់វារីអគ្គិសនីនេះទេ។
ក្រុមអ្នករិះគន់ដែលរួមទាំងបណ្តាប្រទេសផ្សេងៗនៅតាមដងទន្លេមេគង្គខាងក្រោមនិងអង្គការក្រៅរដ្ឋាភិបាលបាននិយាយថា ពួកគេចង់បានការសិក្សាវាយតម្លៃអំពីផលប៉ះពាល់នៃបរិស្ថានពីការសាងសង់ទំនប់នេះ។
លោកស្រី Ame Trandem បានហៅដំណើរការនៃការធ្វើការសម្រេចចិត្តនេះថា ជា សារៈសំខាន់របស់តំបន់និងអន្តរជាតិ។
លោក កុល វឌ្ឍនា អគ្គលេខាធិការរងនៃគណៈកម្មាធិការជាតិទន្លេមេគង្គកម្ពុជាបានថ្លែងថា ការខ្វែងគំនិតគ្នានៅតែមានក្នុងចំណោមប្រទេសដែលជាសមាជិកទៅលើគម្រោងនេះ។ លោកបានមានប្រសាសន៍ថា៖
«បើយើងនិយាយអំពីដំណើរការនៃការចរចាកន្លងមក គឺយើងបានធ្វើទៅតាមនិតិវិធី ទៅតាមច្បាប់ទម្លាប់របស់មេគង្គ ហើយវាមានការយល់ខុសគ្នាខ្លះនៅក្នុងចំណោមប្រទេសសមាជិកហ្នឹងនៅត្រឹមកម្រិតបច្ចេកទេសកម្រិតពួកខ្ញុំ។ គឺថាភាគីលាវគេថាការពិគ្រោះយោបល់ជាមុននេះចប់ហើយ។ គេថាអញ្ជឹង។ ហើយយើង យើងថាវាមិនទាន់ចប់ទេ ពីព្រោះវាមិនទាន់មានការឯកភាពគ្នាទាំងស្រុងនៅឡើយ។ ដោយសារគំនិតវានៅខុសគ្នាក្នុងចំណោមប្រទេសជាសមាជិកហ្នឹង។ ប្រទេសបី កម្ពុជា វៀតណាម ថៃថា ការសិក្សាវាអត់ទាន់គ្រប់ជ្រុងជ្រោយចង់ពន្យាពេលដើម្បីជជែកវែកញែកសិក្សាអោយបានល្អិតល្អន់សិន មុនពេលសម្រេចចិត្តថាធ្វើយ៉ាងម៉េច»។
លោកបានបន្ថែមថា លោកមិនអាចឲ្យដឹងមុនអំពីលទ្ធផលនៃកិច្ចប្រជុំថ្នាក់រដ្ឋមន្ត្រីដែលនឹងប្រព្រឹត្តទៅនៅពេលខាងមុខ មុននឹងកិច្ចប្រជំុនេះកើតឡើងបានទេ។ លោកបានមានប្រសាសន៍ថា៖
«ដល់ទៅលើថ្នាក់លើទៀត ខ្ញុំមិនដឹងថាគាត់នឹងមានមូលហេតុអ្វីច្រើនទៀត។ គាត់នឹងជជែកគ្នាយ៉ាងម៉េចទៀត។ យើងវាយតម្លៃអត់បានទេ»។
លោក តឹក វណ្ណារ៉ា នាយកប្រតិបត្តិនៃអង្គការ NGO Forum ដែលមានមូលដ្ឋាននៅប្រទេសកម្ពុជាហើយដែលធ្វើការពាក់ព័ន្ធទៅលើការអភិវឌ្ឍន៍ និងផលប៉ះពាល់បរិស្ថានបាននិយាយថា ការសាងសង់ទំនប់នេះគួរតែត្រូវផ្អាករហូតដល់មានការវាយតម្លៃពីផលប៉ះពាល់បរិស្ថានសិន។ លោកបានបន្ថែមថា កិច្ចប្រជុំថ្នាក់តំបន់នៅពេលខាងមុខនោះក៏មិនអាចនាំឲ្យមានការយល់ព្រមជារួមក្នុងចំណោមប្រទេសដែលជាសមាជិករបស់គណៈកម្មកាទន្លេមេគង្គស្តីពីការសាងសង់ទំនប់នេះឡើយ។លោកបានមានប្រសាសន៍ថា៖
«ទោះបីជាប្រជុំក៏អត់មានការឯកភាពរួមដែរទៅលើគោលជំហររួមព្រោះកន្លងមកភាគីលាវអត់បានគោរពតាមអ្វីដែលជាការព្រួយបារម្ភរបស់អង្គការសង្គមស៊ីវិល ក៏ដូចជាអន្តររដ្ឋាភិបាលនៅក្នុងតំបន់ទន្លេមេគង្គដែលជាសមាជិកគណៈកម្មការទន្លេមេគង្គផង»។
ប្រទេសឡាវ សាងសង់ទំនប់វារីអគ្គិសនីនេះ ដើម្បីអភិវឌ្ឍសេដ្ឋកិច្ចរបស់ខ្លួន៕
