មន្ត្រីនៅក្នុងក្រុងអាថែននិយាយថាពួកគេបញ្ជូនទាហាននិងប៉ូលិសជាង៤០០នាក់ដែលបានត្រូវហ្វឹកហ្វឺនជាពិសេសដោយមានរួមបញ្ចូលទាំងពួកប៉ូលិសទប់ទល់នឹងកុបកម្មផងទៅកាន់តំបន់Evros ក្នុងភាគឦសានប្រទេស។
ការបញ្ជូនកងកម្លាំងទាំងនេះកាលពីថ្ងៃពុធទី២៧ខែឧសភាមានបន្ថែមលើពួកទាហាននិងប៉ូលិស១ពាន់១រយនាក់ដែលមានរួចស្រេចហើយនៅនឹងកន្លែងនោះ។កងកម្លាំងបន្ថែម៨០០នាក់ទៀតត្រូវគេរំពឹងថានឹងទៅដល់ទីនោះក្នុងពេលប៉ុន្មានសប្តាហ៍ខាងមុខនេះនៅពេលដែលប្រទេសក្រិកបង្កើនផែនការដូចដែលលោករដ្ឋមន្ត្រីការពារប្រទេសក្រិក Nikos Papagiotopoulos និយាយថាដើម្បីការពារខ្លួនឯងប្រឆាំងនឹងសកម្មភាពរបស់ប្រទេសតួកគី ដោយពង្រីករបងព្រំដែនដែលមានរួចស្រេចហើយ។
លោកនិយាយថាពួកទាហាននិងប៉ូលិសនៅក្នុងតំបន់នោះកំពុងឋិតក្នុងការប្រុងប្រយ័ត្នខ្ពស់។
ពួកមន្ត្រីក្រិកបាននិយាយថាប្រទេសក្រិកពង្រឹងកិច្ចការពាររបស់ផងខ្លួនដោយពង្រីករបងនេះពីព្រោះក្រិកមិនចង់ភ្ញាក់ផ្អើលប្រសិនបើប្រទេសតួកគី ធ្វើសកម្មភាពជាបន្ទាន់ណាមួយ។
ទោះណាជាប្រទេសទាំងពីរនេះជាសម្ព័ន្ធមិត្តក្នុងអង្គការអូតង់ក៏ដោយក៏ទំនាក់ទំនងរវាងរដ្ឋជិតខាងគ្នាទាំងពីរនេះបានធ្លាក់ចុះដល់ចំណុចទាបមួយចាប់តាំងពីប្រធានាធិបតី Recep Tayyip Erdogan នៃប្រទេសតួកគី បានបើកព្រំដែនហើយអនុញ្ញាតឱ្យជនភៀសខ្លួនរាប់លាននាក់ដែលជាប់គាំងនៅក្នុងប្រទេសលោកចេញទៅកាន់ទ្វីបអឺរ៉ុបដោយឆ្លងកាត់ប្រទេសក្រិក។
ចំណាត់ការនេះបានប្រែក្លាយតំបន់ Evros ឱ្យទៅជាកន្លែងមានគ្រោះថ្នាក់មួយពីព្រោះប្រទេសក្រិកដែលមានជនភៀសខ្លួនជាង១សែននាក់ហើយនោះបានរុញថយក្រោយអ្វីដែលពួកមេដឹកនាំក្រិកហៅថាការលុកលុយធំមួយដោយពួកជនចំណាកស្រុកកាលពីខែកុម្ភៈ។
ដោយសារមានការរាតត្បាតជាសាកលនៃជំងឺកូវីដ១៩ប្រទេសតួកគីបានបិទព្រំដែនខ្លួនហើយបានបញ្ជាពួកជនចំណាកស្រុកឱ្យចូលទៅក្នុងមជ្ឈមណ្ឌលទទួលពួកជនចំណាកស្រុកដែលបិទមិនឱ្យមនុស្សចេញចូលទេ។
ក៏ប៉ុន្តែនៅពេលនេះដែលវិធានការបិទប្រទេសបានត្រូវបន្ធូរបន្ថយនៅទូទាំងទ្វីបអឺរ៉ុបនិងនៅកន្លែងផ្សេងទៀតរដ្ឋមន្ត្រីការបរទេសនៃប្រទេសតួកគីបាននិយាយកាលពីថ្ងៃទី២៦ឧសភាថាពួកជនចំណាកស្រុកនិងជនភៀសខ្លួននៅក្នុងប្រទេសលោកគួរប្រុងប្រៀបខ្លួនដើម្បីធ្វើដំណើរជាថ្មីទៅកាន់អឺរ៉ុបហើយការថ្លែងនេះបាននាំឱ្យពួកមន្ត្រីនៅក្នុងក្រុងអាថែនភ្ញាក់ផ្អើល។
នៅពេលនេះប្រទេសក្រិកប្រញាប់ប្រញាល់បិទព្រំដែនគោករបស់ខ្លួនក្នុងតំបន់ Evros ដោយបង្កើនបីដងទំហំរបងខ្លួនដែលមានរួចហើយចម្ងាយ១២គ.ម.ដែលជាចំណាត់ការមួយនាំឱ្យរំខានដល់រដ្ឋាភិបាលក្រុងអង់ការ៉ា។
លោក Tassos Hadjivassiliou ដែលជាសមាជិកសភាអភិរក្សនិយមពន្យល់ថាហេតុដូចម្តេចបានជាវិធានការនេះរបស់ក្រិកនាំឱ្យមានការរំខាន។
លោកនិយាយថាការណ៍នេះជាការងាយយល់ណាស់។លោកថ្លែងថានៅពេលណារបងនេះត្រូវស្ថាបនាហើយ ប្រទេសតួកគីនឹងមិនមានលទ្ធភាពក្នុងការរុញច្រានពួកជនចំណាកស្រុកបានទេ។ហើយប្រសិនបើការណ៍នេះកើតមានឡើងរដ្ឋាភិបាលក្រុងអង់ការ៉ានឹងបាត់បង់ឥទ្ធិពលខ្លាំងបំផុតរបស់ខ្លួនប្រឆាំងនឹងអឺរ៉ុប...និងឱកាសខ្លួនក្នុងការធ្វើឱ្យមានកិច្ចព្រមព្រៀងមួយជាមួយសហភាពអឺរ៉ុបហើយក៏នឹងគ្មានការគាំទ្រខាងហិរញ្ញវត្ថុថែមទៀតផង។
សេដ្ឋកិច្ចចុះថមថយនៅក្នុងប្រទេសតួកគី និងសម្ពាធខាងនយោបាយលើភាពដឹកនាំរបស់លោក Erdogan បង្កើនការព្រួយបារម្ភអំពីវិបត្តិនេះថែមទៀត។
កាលពីពេលថ្មីៗនេះអារិភាពរវាងប្រទេសក្រិកនិងប្រទេសតួកគី បានកើនឡើងនៅក្នុងតំបន់ Aegean។
កាលពីដំណាច់សប្តាហ៍ទីបីនៃខែឧសភាទាហានតួកគីរាប់សិបនាក់បានរារាំងពួកទាហានក្រិកមិនឱ្យពិនិត្យមើលតំបន់វាលភក់នៅតាមបណ្តោយទន្លេ Evros ដើម្បីពង្រីករបងព្រំដែន។
បណ្តាញផ្សាយព័ត៌មានក្នុងមូលដ្ឋាននិងពួកអ្នកស្រុកបាននិយាយថាពួកគេបានឃើញពួកទាហានចូលទៅក្នុងដែនដីក្រិកនិងបោះជំរំនៅលើដីក្រិកដែលជាវីធានការមួយនាំឱ្យរដ្ឋាភិបាលក្រុងអាថែន ខឹងសម្បារហើយបានដាក់ពាក្យតវ៉ាជាមួយរដ្ឋាភិបាលក្រុងអង់ការ៉ាក៏ប៉ុន្តែបន្ទាប់មកបានបដិសេធថាគ្មានទាហានតួកគីចូលក្នុងដែនដីក្រិកទេ។
លោករដ្ឋមន្ត្រីការពារប្រទេសក្រិក Nikos Papagiotopoulos បាននិយាយប្រាប់វិទ្យុនិងទូរទស្សន៍ក្នុងស្រុកមួយកាលពីយប់ថ្ងៃពុធទី២៧ឧសភាថាមានចលនានាំឱ្យសង្ស័យជាច្រើននៅពេលនោះ។
លោកបានប្រកែកមិនព្រមថ្លែងឱ្យបានក្បោះក្បាយទេ។
ពួកអ្នកជំនាញខាងសិទ្ធិមនុស្សនៅក្នុងប្រទេសក្រិកបានព្រមានថាជនចំណាកស្រុកជាអ្នករងគ្រោះនៅក្នុងជម្លោះថ្មីៗបំផុតរវាងប្រទេសក្រិកនិងប្រទេសតួកគី។ជនទាំងនេះនៅតែជាប់គាំងនៅក្នុងជំរំមានមនុស្សណែនក្តន់និងនៅក្នុងស្ថានការណ៍បិទប្រទេសដែលមានតទៅទៀត៕
ប្រែសម្រួលដោយ ឈឹម សុមេធ
