ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មេធាវី​រដ្ឋាភិបាល​ថា​មាន​ភស្តុតាង​ច្រើន ក្រោយ​លោក កឹម សុខា​បដិសេធ​បទ​ចោទ


លោក គី តិច មេធាវីតំណាងរដ្ឋាភិបាល ផ្តល់បទសម្ភាសន៍ដល់អ្នកសារព័ត៌មាននៅខាងមុខសាលាដំបូងរាជធានីភ្នំពេញ ក្រោយចេញពីសវនាការជំនុំ​ជម្រះ​លោក កឹម សុខា នៅថ្ងៃទី១៥ ខែមករា ឆ្នាំ២០២០។ (កាន់ វិច្ឆិកា/VOA)

ការ​ថ្លែង​នេះ​ ធ្វើ​ឡើង ក្រោយ​ពី​​មេធាវី​ការ​ពារ​ក្ដី​ឱ្យ​លោក កឹម សុខា លើកឡើង​ថា​ភស្តុតាង​ដាក់​បន្ទុក​លើ​កូន​ក្ដី​របស់​ខ្លួន គឺ​មាន​តែ​វីដេអូ​កាត់​ត​មួយ​ប៉ុណ្ណោះ។​

មេធាវី​របស់​រដ្ឋាភិបាល​គឺ​លោក គី តិច បាន​ថ្លែង​ភ្លាមៗ​ប្រាប់​ក្រុម​អ្នកយកព័ត៌មាន​នៅ​ក្រៅ​តុលាការ​នៅ​ថ្ងៃ​ពុធ​នេះ​ថា លោក​មាន​ភស្តុតាង​ច្រើន​ដើម្បី​ដាក់​បន្ទុក​លើ​លោក កឹម សុខា ក្នុង​ពេល​ដែល​លោក​ កឹម សុខា បង្ហោះ​សារ​តាម​ហ្វេសប៊ុក បដិសេធ​ការ​ជាប់​ពាក់ព័ន្ធ​នឹង​បទ​សន្ទិដ្ឋិភាព​ឬ​រួមគំនិត​ជាមួយ​បរទេស​ដើម្បី​ផ្ដួល​រំលំ​រដ្ឋាភិបាល​លោក​នាយក​រដ្ឋមន្ត្រី ហ៊ុន សែន។

លោក​បញ្ជាក់​ថា៖ «ជា​ធម្មតា​ទេ​ ជន​ជាប់​ចោទ​គ្រប់​រូប​តែងតែ​បដិសេធ អះអាង​ថា​ខ្លួន​គ្មាន​កំហុស ប៉ុន្តែ​ខាង​យើង​ខ្ញុំ​ក៏ដូចជា​តំណាង​អយ្យការ​មាន​ភស្តុតាង​ច្រើន​សន្ធឹកសន្ធាប់​ដើម្បី​បញ្ជាក់​ជូន​ក្រុមប្រឹក្សា​ជំនុំជម្រះ​ឲ្យ​បាន​ដឹង​ថា​កំហុស​និង​អំពើ​ប្រព្រឹត្ត​របស់ កឹម សុខា​ត្រូវ​ទទួល​ខុសត្រូវ​នៅ​ក្នុង​ផ្លូវ​ច្បាប់​កម្រិត​ណា‍»។

ការ​ថ្លែង​នេះ​ ធ្វើ​ឡើង ក្រោយ​ពីមេធាវី​ការ​ពារ​ក្ដី​ឱ្យ​លោក កឹម សុខា លើកឡើង​ថា​ភស្តុតាង​ដាក់​បន្ទុក​លើ​កូន​ក្ដី​របស់​ខ្លួន គឺ​មាន​តែ​វីដេអូ​កាត់​ត​មួយ​ប៉ុណ្ណោះ។​

លោក​ គី តិច បាន​បន្ថែម​ថា៖ «ព្រឹកមិញ​ខ្ញុំ​សូម​បញ្ជាក់​ថា ​គ្រាន់តែ​ភស្តុតាង​ដើម្បី​បញ្ជាក់​អំពី​បញ្ហា​ហ្នឹង មាន​ពីរ​វ៉ាលី​ធំៗ និង​មាន​កាតាប​ឬ​ប្រហែល​ជា​ម្នាក់​ពីរ គឺថា​បើ​និយាយ​អំពី​ភស្តុតាង​នេះ​គឺ​ថា​ដឹក​គូថ​ឡាន​តែ​ម្តង។ ភស្តុតាង​នេះ​គឺ​ថា​យើង​នឹង​តតាំង បង្ហាញ​ជូន​ក្រុមប្រឹក្សា​ជំនុំជម្រះ​នៅ​សាលា​ដំបូង​រាជធានី​ភ្នំពេញ​នេះ​ ដើម្បី​ឲ្យ​ការសម្រេច​ផ្ដល់​យុត្តិធម៌​ដល់​គូ​ភាគី‍»។

លោក​មិន​បាន​បញ្ជាក់​ថា​តើ​ភស្តុតាង​ទាំង​នោះ​ជា​អ្វី​ខ្លះ​ទេ ដោយ​អះអាង​ថា ​នេះ​ជា​ការសម្ងាត់​របស់​មេធាវី។ ប៉ុន្តែ​នៅ​ក្នុង​សវនាការ​ព្រឹក​ថ្ងៃ​ពុធ​នេះ​ មាន​ការ​ចាប់ផ្ដើម​បង្ហាញ​ភស្តុតាង​ដំបូង​ដែល​ជា​វីដេអូ​ជាង​២នាទី ដែល​លោក កឹម សុខា​បដិសេធ​ថា​មិនមែន​ជា​វីដេអូ​របស់​លោក ដោយសារ​តែ​ជា​វីដេអូ«កាត់ត‍»។

លោក កឹម សុខា បាន​ស្នើ​សុំ​ឲ្យ​បង្ហាញ​ភស្តុតាង​ដែល​ជា​វីដេអូ​រយៈពេល​ជាង​១ម៉ោង​របស់​លោក ដែល​ត្រូវ​ពិនិត្យ​សម្រេច​និង​ត្រួតពិនិត្យ​មើល​នៅ​សប្ដាហ៍​ក្រោយ។ ក្រៅពីនោះ​ មាន​ការ​បង្ហាញ​សាក្សី​ចំនួន​១២​នាក់​ដែល​មាន​វត្តមាន​ផងដែរ ក្នុង​ចំណោម​សាក្សី​ជិត​៣០​នាក់​ដែល​តុលាការ​បាន​កោះហៅ។

សាក្សី​ខ្លះ​ បាន​បញ្ជាក់​ថា​ពួកគេ​មិន​ពាក់ព័ន្ធ​នឹង​រឿង​ក្តី​នេះ ហើយ​បដិសេធ​មិន​ចូលរួម​ផង​ដែរ។

បន្ថែម​ពី​លើ​នេះ​ទៀត លោក​មេធាវី គី​ តិច បាន​បញ្ជាក់​ពី​ការ​ពាក់ព័ន្ធ​នឹង​អង្គការ​និង​ប្រទេស​ចំនួន​៩ ដែល​លោក បាន​ស្នើ​សុំ​ឲ្យ​តុលាការ​តាំង​ជា​អក្សរ​ដោយ​មិន​ប្រើ​ឈ្មោះ​ប្រទេស​ទាំង​នោះ ក្នុង​គោលបំណង​រក្សា​ទំនាក់ទំនង​ល្អ​ជាមួយ​បរទេស។

ប្រទេស​ទាំង​៩​នោះ​រួម​មាន​ឥណ្ឌូនេស៊ី យូហ្គោស្លាវី ស៊ែប៊ី អូស្ត្រាលី សហរដ្ឋអាមេរិក កាណាដា សហភាព​អឺរ៉ុប តៃវ៉ាន់ និង​ឥណ្ឌា។

ដំណាល​គ្នា​ពេលកំពុង​ចូលរួម​សវនាការ​ជំនុំ​ជម្រះ​ក្ដី​នេះ ហ្វេសប៊ុក​របស់​លោក កឹម សុខា មាន​ការ​បង្ហោះ​សារ​ថា៖ «ខ្ញុំ​បដិសេធ​ទាំង​ស្រុង​នូវ​ការ​ចោទ​ប្រកាន់​មក​លើ​រូប​ខ្ញុំ​ពី​បទ​សន្ទិដ្ឋិភាព​ជាមួយ​បរទេស។ ខ្ញុំ​មិន​បាន​នាំ​រដ្ឋ​បរទេស ឬ​ភ្នាក់​ងារ​បរទេស​ណា​មក​ប្រទូសរ៉ាយ ឬ​ឈ្លាន​ពាន​ព្រះរាជាណាចក្រ​កម្ពុជា​ឡើយ»។

លោក​អះអាង​ថា​រាល់​សកម្មភាព​របស់​លោក​មិន​បាន​នាំ​ឲ្យ​ប៉ះពាល់​ដល់​ផលប្រយោជន៍​ប្រទេស​ជាតិ​ឡើយ តែ​ផ្ដោត​លើ​សិទ្ធិ​មនុស្ស និង​លទ្ធិប្រជាធិបតេយ្យ ដោយ​អហិង្សា និង​សន្តិវិធី ស្រប​តាម​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា។

លោក ​កឹម សុខា​ ប្រធាន​គណបក្ស​សង្គ្រោះ​ជាតិ ​ដែល​ត្រូវ​តុលាការ​រំលាយ​មុន​ការ​បោះឆ្នោត​ឆ្នាំ​២០១៨ ត្រូវ​បាន​ចោទ​ប្រកាន់​ពី​បទ​រួម​គំនិត​ជាមួយ​បរទេស​ ក្នុង​គម្រោង​មួយ​ដែល​រដ្ឋាភិបាល​របស់​លោក ហ៊ុន សែន ហៅ​ថា«ការ​ប៉ុនប៉ង​ផ្ដួល​រំលំ​រដ្ឋាភិបាល» ដោយ​មាន​សហរដ្ឋអាមេរិក​នៅ​ពីក្រោយ។ ទាំង​លោក កឹម សុខា និង​សហរដ្ឋ​អាមេរិក បាន​បដិសេធ​ការ​ចោទ​ប្រកាន់​នេះ។

ក្រុម​មេធាវី​ការពារ​ក្ដី​ឱ្យ​លោក កឹម សុខា រួម​ទាំង​លោក ចាន់ ចេន​ នៅ​តែ​ទទូច​ថា​សំណុំ​រឿង​លោក កឹម សុខា ជា​រឿង​នយោបាយ ដែល​គួរ​ត្រូវ​ដោះស្រាយ​តាមរយៈ​នយោបាយ​ផង​ដែរ។

​តែ​មេធាវី​រដ្ឋាភិបាល​លើក​ហេតុ​ផល​ថា​នេះ​ជា​រឿង​ព្រហ្មទណ្ឌ​ដែល​តុលាការ​កំពុង​ដំណើរការ​នីតិវិធី។

សវនាការ​ថ្ងៃ​ទី​១លើ​សំណុំ​រឿង​លោក ​កឹម សុខា ​ដើម្បី​សម្រេច​ថា​លោក​មានទោស​ឬ​អត់​នោះ ​គឺ​កើត​ឡើង​ក្រោយ​រយៈពេល​ជាង​២ឆ្នាំ​នៃ​ការ​ឃុំខ្លួន​លោក។ សវនាការ​នេះ​ត្រូវ​គេ​រំពឹង​ថា​នឹង​មានការ​ចូលរួម​ពី​អ្នក​ឃ្លាំមើល​ជាច្រើន​រួម​ទាំង​អ្នក​ការ​ទូត​បរទេស​នានា​ដូចជា​មន្ត្រី​ទូត​អាមេរិក និង​អង្គការ​សង្គម​ស៊ីវិល​ផង​ដែរ​ក្នុង​បន្ទប់​សវនាការ​ដែល​មន្ត្រី​តុលាការ​អះអាង​ថា​អាច​ដាក់​មនុស្ស​បាន​តែ​៣០នាក់​នោះ​ ក្នុង​ពេល​អាជ្ញាធរ​រៀបចំ​ការពារ​សន្តិសុខ​តឹងរ៉ឹង​សម្រាប់​ការ​ជំនុំជម្រះក្ដី​នេះ។

សវនាការ​ដំបូង​ដែល​លោក កូយ សៅ ជា​ប្រធាន​អង្គ​ជំនុំជម្រះ​នេះ​ មាន​រយៈពេល​២​ថ្ងៃ​គឺ​នៅ​ថ្ងៃ​ទី​១៥ និង​ទី​១៦​ខែ​មករា។​ មន្ត្រី​តុលាការ​អះអាង​ថា សវនាការ​នេះ គ្រោង​ធ្វើ​ឡើង​ពីរ​ថ្ងៃ​ក្នុង​១សប្តាហ៍​ និង​អាច​បន្ត​រហូត​ដល់​៣​ខែ​ទៅ​មុខ​ទៀត៕

តួលេខនៃករណីឆ្លងជំងឺកូវីដ១៩

XS
SM
MD
LG