ព្រះសង្ឃតាមវត្តអារាមមួយចំនួនបានត្អូញត្អែរអំពីកង្វះខាតចង្ហាន់ និងបច្ច័យ ដោយសារមិនមានពុទ្ធបរិស័ទច្រើននោះទេមកវត្តអារាម ក្នុងពេលដែលប្រទេសកំពុងជួបវិបត្តិជំងឺកូវីដ១៩ ហើយការណ៍ដែលរដ្ឋាភិបាលបានសម្រេចឲ្យប្រជាពលរដ្ឋអាចទៅវត្តជុំគ្នាបានក្នុងឱកាសបុណ្យភ្ជុំបិណ្ឌនាពេលខាងមុខ ដោយអនុវត្តតាមវិធានការសុខាភិបាល ជាក្តីសង្ឃឹមមួយសម្រាប់ព្រះសង្ឃ។
កាលពីថ្ងៃទី៣ ខែកញ្ញា ក្រសួងធម្មការនិងសាសនាបានចេញសេចក្តីណែនាំមួយ ដោយអនុញ្ញាតឲ្យវត្តអារាមទាំងអស់នៅក្នុងប្រទេសប្រារព្ធពិធីបុណ្យកាន់បិណ្ឌ ភ្ជុំបិណ្ឌ និងកឋិនទាន ប៉ុន្តែតម្រូវឲ្យមានការប្រកាន់ខ្ជាប់តឹងរ៉ឹងនូវវិធានការបង្ការការឆ្លងជំងឺកូវីដ១៩។
ព្រះអង្គ ស៊ាង សុភា គង់នៅវត្តទួលឃ្លាំង ក្នុងភូមិទួលឃ្លាំង ឃុំព្រះធាតុ ស្រុកអូររាំងឪ ខេត្តត្បូងឃ្មុំ មានសង្ឃដីកាថាព្រះសង្ឃនៅវត្តរបស់ព្រះអង្គ ក៏កំពុងជួបប្រទះបញ្ហាចង្ហាន់ និងបច្ច័យផងដែរ ដោយសារវិបត្តិជំងឺកូវីដ១៩រាប់ខែមកនេះ។
ព្រះអង្គមានសង្ឃដីកាប្រាប់វីអូអេនៅថ្ងៃអង្គារនេះថា៖ «មែនទែនទៅ វាប៉ះពាល់ខ្លាំងដែរ ព្រោះដំបូងឡើយ វត្តហ្នឹង គឺពឹងផ្អែកលើចង្ហាន់ពុទ្ធបរិស័ទ តាមរយៈការបិណ្ឌបាទ។ ហើយដូចយើងដឹងអញ្ចឹងករណីឆ្លងកាន់តែកើនឡើងពីមួយថ្ងៃទៅមួយថ្ងៃអញ្ចឹងទៅ ព្រះសង្ឃមិនអាចបិណ្ឌបាតតាមផ្លូវបានទេ។ អញ្ចឹងហើយឲ្យពុទ្ធបរិស័ទដាក់បង្ហាន់ជាស្រាក់អញ្ចឹងទៅណា។ ហើយបើរឿងបច្ច័យបួនវិញ អាហ្នឹងពិបាកដែរ និយាយទៅ ប៉ុន្តែដោយសារតែខាងឃុំ ក៏ដូចជាពុទ្ធបរិស័ទ លោកគិតគូរអញ្ចឹងទៅ ក៏បានឧបត្ថម្ភតាមលទ្ធភាពអញ្ចឹងទៅ»។
ព្រះអង្គបន្តថាវត្តទួលឃ្លាំងនឹងប្រារព្ធពិធីបុណ្យភ្ជុំបិណ្ឌដូចសព្វដង ហើយរៀបចំគោរពតាមវិធានការការពាររបស់ក្រសួងសុខាភិបាល ដើម្បីបង្ការការឆ្លងជំងឺកូវីដ១៩។
ព្រះអង្គ ស៊ាង សុភា សង្ឃឹមថានឹងមានការចូលរួមពីពុទ្ធបរិស័ទក្នុងការប្រគេនចង្ហាន់ និងបច្ច័យ ទាំងដោយផ្ទាល់ ឬប្រយោល អំឡុងពេលពិធីបុណ្យភ្ជុំបិណ្ឌខាងមុខនេះ ទោះបីជាមិនមានចំនួនពលរដ្ឋមកចូលរួមច្រើនដូចសព្វដង ដោយសារការរាតត្បាតជំងឺកូវីដ១៩ក៏ដោយ។
ពិធីបុណ្យភ្ជុំបិណ្ឌនឹងត្រូវធ្វើឡើងចាប់ពីថ្ងៃទី២២ ខែកញ្ញា រហូតដល់ថ្ងៃទី៦ ខែតុលា ដែលជាថ្ងៃភ្ជុំធំ។ ហើយបុណ្យកឋិនទាននឹងត្រូវធ្វើឡើងចាប់ពីថ្ងៃ ២២ ខែតុលា រហូតដល់ថ្ងៃទី១៩ ខែវិច្ឆិកា។ នេះបើយោងតាមសេចក្តីណែនាំស្តីពីការរៀបចំបុណ្យកាន់បិណ្ឌ ភ្ជុំបិណ្ឌ និងកឋិនទានរបស់ក្រសួងធម្មការ និងសាសនា។
ព្រះអង្គ រឹម ណាំឈាវ គង់នៅវត្តមហាមន្រ្តីក្នុងរាជធានីភ្នំពេញ មានសង្ឃដីកាប្រាប់វីអូអេនៅថ្ងៃអង្គារនេះថានាពេលបច្ចុប្បន្ននេះ ព្រះសង្ឃនៅក្នុងវត្តកំពុងជួបប្រទះកង្វះខាតបច្ច័យ និងចង្ហាន់ ដោយសារតែផលវិបាកពីវិបត្តិជំងឺកូវីដ១៩។
ព្រះអង្គមានសង្ឃដីកាថា៖ «ហើយសម្រាប់វត្តមហាមន្រ្តី ព្រះសង្ឃដែលគង់នៅទីនេះ ជួបបញ្ហាធំៗមានពីរគឺ បញ្ហាទីមួយគឺ កង្វះថវិកានៅក្នុងការបង់ថ្លៃសិក្សា ព្រោះសង្ឃនៅក្រុងភ្នំពេញ លោកអាស្រ័យនឹងការបិណ្ឌបាត ហើយដែលបានយកបច្ច័យដែលបានតាមផ្ទះនីមួយៗហ្នឹង ដើម្បីបង់ថ្លៃសាលា។ ហើយដោយឡែកនៅក្នុងនេះមួយទៀតដែរ គឺបញ្ហាចង្ហាន់ហ្នឹងឯង រួមទាំងថ្លៃទឹក ថ្លៃភ្លើងផងដែរ»។
ពាក់ព័ន្ធនឹងសេចក្តីណែនាំរបស់ក្រសួងធម្មការនិងសាសនា ព្រះអង្គ ណាំ ឈាវ មិនទាន់អាចបញ្ជាក់ជាក់លាក់ពីវិធានការដែលគណៈកម្មការគ្រប់គ្រងវត្តនឹងដាក់ចេញនៅពេលពិធីបុណ្យភ្ជុំបិណ្ឌខាងមុខនោះទេ ប៉ុន្តែព្រះអង្គបានលើកឡើងថាវត្តនឹងអនុវត្តវិធានការក្រសួងសុខាភិបាលតឹងរ៉ឹង នៅពេលវត្តត្រូវបានបើកទ្វារពីរថ្ងៃមុនពេលពិធីបុណ្យភ្ជុំបិណ្ឌ ដើម្បីទទួលពលរដ្ឋកាន់បិណ្ឌ។
ព្រះអង្គបន្ថែមថារហូតមកទល់ពេលនេះ វត្តមហាមន្រ្តីនៅមិនទាន់អនុញ្ញាតឲ្យមានការចេញចូលជាទូទៅនៅឡើយទេ ដោយសារតែកាលពីពីរខែមុននេះ ព្រះសង្ឃ និងកូនសិស្សលោកក្នុងវត្ត ជាង៥០អង្គនាក់ បានឆ្លងជំងឺកូវីដ១៩ ប៉ុន្តែបានព្យាបាលជាសះស្បើយគ្រប់គ្នាមកទល់ពេលនេះ។
ចំណែកព្រះតេជគុណ ពិន សេម ព្រះចៅអធិការវត្តរាជបូណ៌ ក្នុងខេត្តសៀមរាប មានសង្ឃដីកាប្រាប់វីអូអេថា ព្រះអង្គយល់ឃើញថានឹងមិនមានពុទ្ធបរិស័ទច្រើនចូលរួមក្នុងពីធីបុណ្យកាន់បិណ្ឌ ភ្ជុំបិណ្ឌនាពេលខាងមុខនោះទេ ដោយសារតែវិបត្តិជំងឺកូវីដ១៩។
ព្រះអង្គមានសង្ឃដីកាថា៖ «ចំពោះថ្ងៃកាន់បិណ្ឌភ្ជុំហ្នឹង តាមពិតទៅពិធីបុណ្យផ្សេងៗហ្នឹង អាត្មាទទួលដែរ។ ប៉ុនមិនសូវមានញោមញាតិមកនោះទេ ព្រោះថ្ងៃសីលថ្ងៃអី គាត់យកជ័យវត្ថុ អាហារបិណ្ឌបាតអីមកប្រគេន។ ប៉ុនអាត្មាទទួលក្រោមដើមឈើ ក្រោមដើមជ្រៃ ដែលមានបរិយាកាស វិសាលភាពល្ហល្ហេវ វាមិនអាប់អ៊ួរនៅក្នុងសាលា ក្នុងកុដិ អាត្មាមិនទទួលនោះទេ»។
លោក សេង សុមុនី អ្នកនាំពាក្យក្រសួងធម្មការ និងសាសនា បានថ្លែងប្រាប់វីអូអេនៅថ្ងៃអង្គារនេះថាពិធីបុណ្យកាន់បិណ្ឌ ភ្ជុំបិណ្ឌ ត្រូវបានអនុញ្ញាតឲ្យរៀបចំឡើង ដោយសារជាពិធីបុណ្យសាសនាជាតិ។ លោកបន្តថាការអនុញ្ញាតឲ្យមានការប្រារព្ធនៅវត្តអារាម គឺដោយសារការថយចុះចំនួនករណីឆ្លងជំងឺកូវីដ១៩ ចំនួនអ្នកចាក់វ៉ាក់សាំងមានច្រើនជាងមុន ហើយពលរដ្ឋ និងព្រះសង្ឃយល់ដឹងខ្ពស់ជាងមុនពីជំងឺកូវីដ១៩។
អ្នកនាំពាក្យរបស់ក្រសួងធម្មការ និងសាសនារូបនោះ ក៏បានច្រានចោលការអះអាងថាការអនុញ្ញាតឲ្យធ្វើពិធីបុណ្យភ្ជុំបិណ្ឌនេះ គឺដោយសារតែវត្តអារាមមួយចំនួនជួបប្រទះបញ្ហាចង្ហាន់ និងបច្ច័យ ដោយលោកបានបញ្ជាក់ពីការជួយទំនុកបម្រុងពីសំណាក់ប្រជាពលរដ្ឋ និងរដ្ឋាភិបាលដល់បណ្តាវត្តអារាមនានា។
លោកថ្លែងថា៖ «ជាទូទៅ វត្តអារាមមិនជាប្រើភាសាមួយម៉ាត់ថាវត្តមិនមានរកចំណូលអីទេ។ វត្តគឺអាស្រ័យពុទ្ធបរិស័ទ។ អញ្ចឹងទោះជាមិនមានកាន់បិណ្ឌភ្ជុំបិណ្ឌក៏ពុទ្ធបរិស័ទចំណុះជើងវត្ត លោកទទួលគាំពារដោយព្រះអង្គក្នុងវត្តមានអង្ករ មានឆៃប៉ូវ មានអីអញ្ចឹងទៅ។ ហើយទន្ទឹមនឹងនោះ រាជរដ្ឋាភិបាលលោកបានធ្វើសកម្មភាពច្រើនណាស់ ស្ថាប័នពាក់ព័ន្ធទាំងអស់តាមរាជធានីខេត្តហ្នឹង គឺថា មានចុះចែកអង្ករ មី ទឹកត្រី ទឹកស៊ីអ៊ីវ ឧបត្ថម្ភទៅតាមវត្តហ្នឹង»។
លោក សេង សុមុនី ក៏បានអំពាវនាវឲ្យពលរដ្ឋដែលត្រៀមនឹងទៅវត្តអារាមនៅអំឡុងពេលពិធីបុណ្យភ្ជុំបិណ្ឌខាងមុខ ប្រកាន់ខ្ជាប់វិធានការពារជំងឺកូវីដ១៩ របស់ក្រសួងសុខាភិបាលផងដែរ៕
