រដ្ឋាភិបាលកម្ពុជានិងដៃគូអភិវឌ្ឍន៍ពីរផ្សេងទៀតគឺក្រុមហ៊ុនផ្តល់សេវាដឹកជញ្ជូន Taxi Grab និងកម្មវិធីអភិវឌ្ឍន៍អង្គការសហប្រជាជាតិ (UNDP) ក្នុងសប្តាហ៍នេះ បានដាក់ឲ្យដំណើរការ គម្រោងថ្មីមួយឈ្មោះថា «សម័យ» ឬគម្រោងនិរន្តភាពចរាចរណ៍ក្នុងរាជធានីភ្នំពេញសម្រាប់គ្រប់គ្នា មានរយៈពេលបីឆ្នាំ។
គោលបំណងរបស់គម្រោង«សម័យ»នេះគឺធ្វើឲ្យប្រសើរឡើងទាំងគុណភាព និងការចងក្រងទិន្នន័យចរាចរណ៍ដែលចាំបាច់សម្រាប់ការបង្កើតនូវគោលនយោបាយ និងការវិនិយោគនានាក្នុងការដោះស្រាយបញ្ហាចរាចរណ៍ក្នុងទីក្រុងប្រកបដោយភាពឆ្លាតវៃ និងនិរន្តរភាព។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានប្រាប់ក្រុមអ្នកកាសែត ក្រោយពិធីប្រកាសដាក់ឲ្យអនុវត្តគម្រោង«សម័យ»នេះថា គម្រោងនេះនឹងប្រើប្រាស់ថវិកាចំនួន៥០០.០០០ដុល្លារ ដែលជាការឧបត្ថម្ភរបស់ក្រុមហ៊ុន Taxi Grab តាមរយៈកម្មវិធីអភិវឌ្ឍន៍អង្គការសហប្រជាជាតិ (UNDP)។ លោកមានប្រសាសន៍ថា UNDP ផ្ទាល់ក៏បានផ្តល់ថវិកាអនុវត្តគម្រោង«សម័យ» ដែលនឹងបើកផ្លូវឲ្យរកឃើញដំណោះស្រាយផ្សេងៗ ដើម្បី សម្រួលចរាចរណ៍ កាត់បន្ថយការកកស្ទះ ក៏ដូចជាពង្រឹងការយល់ដឹងអំពីការបើកបរប្រកបដោយសុវត្ថិភាព។
«ក្រសួងសាធារណការ និងដឹកជញ្ជូនចូលរួមជាមួយនឹង UNDP ជាមួយ Grab ដើម្បីមើលកិច្ចការហ្នឹង នែ៎។ ការកកស្ទះចរាចរណ៍ ព័ត៌មានគាត់មានច្រើនណាស់ ខាង Grab។ អីចឹងគាត់ដឹង គាត់ផ្តល់មកយើង ដើម្បីយើងយកកិច្ចការហ្នឹង យកទៅអនុវត្ត យកទៅសិក្សា ហើយរកនីតិវីធី ដោះស្រាយការកកស្ទះចរាចរណ៍របស់យើងផងដែរ»។
យោងតាមសេចក្តីប្រកាសរួមគ្នាមួយរបស់ក្រសួងសាធារណការ និងដឹកជញ្ជូន ក្រុមហ៊ុន Taxi Grab និង UNDP បានបញ្ជាក់ឲ្យដឹងថា ស្ថានភាពនៃនគរូបនីយកម្មនៅកម្ពុជា បានជំរុញឲ្យមានកំណើនប្រជាជនខ្ពស់នៅក្នុងទីក្រុង ហើយវាក៏ជាមូលហេតុនាំឲ្យមានតម្រូវការកាន់តែខ្ពស់នៃការធ្វើដំណើរ និងមធ្យោបាយដឹកជញ្ជូនដែរ។ តួយ៉ាង ក្នុងរាជធានីភ្នំពេញ ចំនួនរថយន្ត និងទោចក្រយានយន្តដែលបានចុះបញ្ជីត្រឹមត្រូវ ជាមធ្យមមានកំណើនប្រមាណជាង ២០ភាគរយ រៀងរាល់ឆ្នាំ ហើយបច្ចុប្បន្ន មានចំនួនរហូតដល់៤លាន៥សែនគ្រឿង បានចុះបញ្ជី។
សេចក្តីប្រកាសបានបញ្ជាក់ទៀតថា ដំណើរការនគរូបនីយកម្ម និងការប្រែប្រួលអាកាសធាតុជាបញ្ហាពីរដែលមិនអាចផ្តាច់ចេញពីគ្នាបាន ពីព្រោះ៨០ភាគរយនៃការបំភាយឧស្ម័នផ្ទះកញ្ចក់ដែលបណ្តាលឲ្យមានកំណើនកំដៅនៃភពផែនដី គឺចេញមកពីក្រុង។ បរិមាណប្រមាណជាពាក់កណ្តាលនៃការបំភាយឧស្ម័នផ្ទះកញ្ចក់នេះកើតចេញពីការប្រើប្រាស់ប្រេងឥន្ធនៈផ្សេងៗ ក្នុងការដឹកជញ្ជូន និងការធ្វើដំណើរក្នុងទីក្រុង។
លោក Nick Beresford នាយកប្រចាំប្រទេសកម្ពុជារបស់ UNDP ត្រូវបានស្រង់ប្រសាសន៍តាមន័យដើមថា៖
«"សម័យ" ឬគម្រោងនិរន្តភាពចរាចរណ៍ក្នុងទីក្រុងសម្រាប់គ្រប់គ្នានេះមានតួនាទីលើសពីអ្វីដែលយើងហៅថា ជាការទទួលខុសត្រូវសង្គម (Corporate Social Responsibility) ទៅទៀត ហើយវាផ្តល់នូវម៉ូដែលថ្មីមួយសម្រាប់ភាពជាដៃគួនៃវិស័យឯកជន និងសាធារណៈ ក្នុងការងារអភិវឌ្ឍន៍សង្គម។ គម្រោងនេះក៏ជាវេទិកាមួយជួយគាំទ្រដល់ការបង្កើតគោលនយោបាយនានា ដែលជំរុញឲ្យមានការវិនិយោគកាន់តែច្រើនលើការអភិវឌ្ឍទីក្រុងប្រកបដោយចីរភាព»។
លោក Russel Cohen នាយកប្រចាំតំបន់ផ្នែកប្រតិបត្តិការរបស់ក្រុមហ៊ុន Grab ថ្លែងថា Grab មានឆន្ទៈរួមក្នុងការកាត់បន្ថយការបំពុលខ្យល់អាកាស ក៏ដូចជាការបង្កើនសុវត្ថិភាព និងប្រសិទ្ធភាពនៃចរាចរណ៍តាមដងផ្លូវ។
«ក្រៅពីការគាំទ្រផ្នែកហិរញ្ញវត្ថុ Grab ក៏បានប្តេជ្ញាផ្តល់នូវការគាំទ្រផ្សេងៗទៀត ដូចជាការផ្តល់អ្នកជំនាញ ការអភិវឌ្ឍ Software ការគ្រប់គ្រងចរាចរ និង បុគ្គលិកធ្វើការតាមម៉ោង តាមរយៈគម្រោង"សម័យ"»។
ក្រុមហ៊ុន Grab គឺជាក្រុមហ៊ុនផ្តល់សេវាដឹកជញ្ជូនដោយការជួយចេញថ្លៃចំណាយរវាងអ្នកបើកបរ និងអ្នកធ្វើដំណើរដ៏ពេញនិយមមួយនៅតំបន់អាស៊ីអាគ្នេយ៍ និងបានធ្វើប្រតិបត្តិការក្នុងប្រទេសចំនួន៨នៅក្នុងតំបន់។ នេះបើយោងតាមគេហទំព័រក្រុមហ៊ុន Grab។
ក្រុមហ៊ុន Grab ដែលមានមូលដ្ឋាននៅប្រទេសសឹង្ហបុរី បានពង្រីកសេវាកម្មរបស់ខ្លួនពីការជួយចេញថ្លៃចំណាយរវាងអ្នកបើកបរ និងអ្នកធ្វើដំណើរផងដែរ ទៅជាការបង់ប្រាក់ និងដឹកជញ្ជូនអាហារតាមការបញ្ជាទិញ។ ក្រុមហ៊ុន Grab ដដែលនេះបានទិញយកជំនួញរបស់ក្រុមហ៊ុន Uber ដែលបានធ្វើប្រតិបតិ្តការនៅក្នុងតំបន់អាស៊ីអាគ្នេយ៍។ Uber ជាក្រុមហ៊ុនផ្តល់សេវាដឹកជញ្ជូនតាមការជួយចេញថ្លៃចំណាយរវាងអ្នកបើកបរ និងអ្នកធ្វើដំណើរផងដែរ។ នេះបើយោងតាមក្រុមហ៊ុនផ្សព្វផ្សាយរបស់សហរដ្ឋអាមេរិក CNBC។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ VOA ថា គម្រោង«សម័យ»នេះក៏ត្រូវបានដាក់ឲ្យអនុវត្តនៅខេត្តសៀមរាប និងបន្តពង្រីកដល់ទីក្រុងផ្សេងទៀតផងដែរ។
«Grab គាត់បានធ្វើការនៅភ្នំពេញហើយ ហើយគាត់ក៏បានធ្វើនៅសៀមរាបដែរ។ នៅសៀមរាប គាត់ដំណើរការ ហើយគាត់បានសហការគ្នាជាមួយរ៉ឺម៉កយើង Tuk-Tuk យើងហ្នឹងចំនួន២០០ហើយ នៅសៀមរាប ហើយគាត់នឹងបន្តទៅធ្វើនៅក្រុងផ្សេងៗទៀត»។
លោក ទឹម ម៉ាឡៃ ប្រធានបណ្តាញយុវជនកម្ពុជា ប្រាប់ VOA នៅថ្ងៃពុធនេះថា រដ្ឋាភិបាលត្រូវមានការបេ្តជ្ញាចិត្តខ្ពស់បំផុតដើម្បីអនុវត្តគម្រោងថ្មីនេះជាមួយដៃគូអភិវឌ្ឍន៍ឲ្យបានជោគជ័យ។
«ក្នុងកំណែទម្រង់ប្រទេសកម្ពុជា ខ្ញុំមើលឃើញថា ត្រូវការពេលវេលាយូរ រយៈពេលវែង ដោយសារការយល់ដឹងរបស់ពលរដ្ឋ ឬក៏គម្រោងនេះអាចមានប្រសិទ្ធភាពទៅបាន លុះត្រាតែ មានការប្តេជ្ញាចិត្តពីរដ្ឋាភិបាលខ្ពស់ណាស់ ពីប្រមុខរដ្ឋាភិបាល ធានាថា ត្រូវអនុវត្តឲ្យតឹងរ៉ឹងមែនទែនក្នុងដំណើរការនៃកំណែទម្រង់តាមរយៈគម្រោងនេះ ព្រោះយើងមើលឃើញគម្រោងផ្សេងៗទៀតជាច្រើននៅក្នុងប្រទេសកម្ពុជា កើតមានឡើងជាហូរហែ ប៉ុន្តែប្រើប្រាស់ អត់ទាន់បានពេញលេញ ហើយជាប្រយោជន៍ដល់ពលរដ្ឋ។ ប៉ុន្តែសង្ឃឹមថា គម្រោងមួយនេះបានធានា ឬក៏បង្ការគ្រោះថ្នាក់ចរាចរណ៍ ការបាត់បង់អាយុជីវិតរបស់អ្នកប្រើប្រាស់តាមដងផ្លូវ ឬក៏ធានាអំពីការធ្វើឲ្យមាន គេហៅថា សុវតិ្ថភាពដងផ្លូវ ឬក៏ការប្រើប្រាស់ដងផ្លូវនេះ មានគុណភាពល្អប្រសើរសម្រាប់ថ្ងៃអនាគត។ បើប្រៀបធៀបទៅប្រទេសមួយចំនួននៅតំបន់អាស៊ី គេអាចធ្វើបានល្អ ហើយយើងសង្ឃឹមថា ដំណើរការគម្រោងមួយនេះជាប្រយោជន៍សម្រាប់ប្រជាជាតិរបស់យើង»។
មេដឹកនាំបណ្តាញយុវជនកម្ពុជារូបនេះយល់ថា ការពង្រឹងការអនុវត្តច្បាប់ចរាចរណ៍ក៏ជាកត្តាចាំបាច់ដើម្បីធានានូវការបើកបរដោយសុវត្ថិភាព បន្ថែមលើគម្រោងដែលរដ្ឋាភិបាលបានចាប់ផ្តើមនេះ។
«សម្រាប់ខ្ញុំ ជាអ្នកប្រើប្រាស់ដងផ្លូវមួយរូបដែរ ខ្ញុំមើលឃើញថា ការអនុវត្តច្បាប់នេះពុំទាន់ពេញលេញនៅឡើយទេ ទាំងមន្ត្រីសាធារណៈ ឬក៏មន្ត្រីអនុវត្តច្បាប់ ទាំងពលរដ្ឋដែលកំពុងតែ រស់នៅក្នុងប្រទេសកម្ពុជាយើង»។
យោងតាមសេចក្តីប្រកាសរួមគ្នាមួយរបស់ក្រសួងសាធារណការ និងដឹកជញ្ជូន ក្រុមហ៊ុន Grab និង UNDP បានបញ្ជាក់ឲ្យដឹងថា ការអនុវត្តគម្រោង«សម័យ»ខាងលើនេះផ្តោតការគាំទ្រលើការធ្វើឲ្យប្រសើរឡើងនូវប្រសិទ្ធភាពនៃចរាចរណ៍ក្នុងទីក្រុងសព្វថ្ងៃ និងប្រព័ន្ធដឹកជញ្ជូនតាមរយៈការប្រមូលចងក្រងទិន្នន័យចរាចរណ៍ និងគុណភាពខ្យល់ក្នុងទីក្រុងភ្នំពេញ ការកាត់បន្ថយបំភាយឧស្ម័នផ្ទះកញ្ចក់ពីចរាចរណ៍ក្នុងទីក្រុង តាមរយៈវិធានការពាក់ព័ន្ធនឹងប្រេងឥន្ធនៈ និងការប្រើប្រាស់យានយន្តបែបបរិស្ថាន និងការលើកកម្ពស់ភាពច្នៃប្រឌិតក្នុងការដោះស្រាយបញ្ហាចរាចរណ៍ដោយភាពឆ្លាតវៃក្នុងគោលបំណងពន្លឿនវឌ្ឍនភាពផ្នែកសុវត្ថិភាព និងចរាចរណ៍សម្រាប់គ្រប់គ្នា៕
