រដ្ឋាភិបាលសម្រេចឱ្យម្ចាស់អង្គភាពអាជីវកម្មប្រព័ន្ធផ្សព្វផ្សាយដែលកំពុងដំណើរការ ដោយគ្មានអាជ្ញាបណ្ណ ត្រូវមកចុះឈ្មោះ ដោយទុករយៈពេលកំណត់៣ខែ មុននឹងអនុវត្តតាមផ្លូវច្បាប់។ នេះបើតាមលិខិតមួយច្បាប់ដែលចេញដោយទីស្តីការគណៈរដ្ឋមន្ត្រី ចុះថ្ងៃទី៣០ ខែតុលា ឆ្នាំ២០២៣។
ទីស្តីការគណៈរដ្ឋមន្រ្តីបញ្ជាក់ក្នុងលិខិតថាការចេញសេចក្តីណែនាំនេះធ្វើឡើងទៅតាមសំណើរបស់ក្រសួងព័ត៌មាន ចុះថ្ងៃទី១២ ខែតុលា ឆ្នាំ២០២៣។លិខិតដដែលលើកឡើងថាអង្គភាពសារព័ត៌មាននិងសមាគមអ្នកសារព័ត៌មាន ដែលបានចុះបញ្ជីហើយ ប៉ុន្តែមិនដំណើរការក្នុងរយៈពេល១ឆ្នាំ ក៏ត្រូវដកហូតអាជ្ញាបណ្ណដែរ និងទុកពេល៣ឆ្នាំសម្រាប់ស្ថានីយទូរទស្សន៍ ដោយសារប្រើទុនវិនិយោគច្រើន និងត្រូវសិក្សារយៈពេលយូរ។
លិខិតរបស់ទីស្តីការគណៈរដ្ឋមន្ត្រី បន្ថែមថាបុគ្គលណាដែលធ្វើអាជីវកម្មប្រព័ន្ធផ្សព្វផ្សាយដោយគ្មានច្បាប់អនុញ្ញាត ត្រូវប្រឈមមុខចំពោះច្បាប់ ខណៈព្រមានដកហូតអាជ្ញាបណ្ណបញ្ឈប់ការធ្វើអាជីវកម្មជាស្ថាពរ ក្នុងករណីបំពានក៏ដូចជាមិនព្រមអនុវត្តតាមការណែនាំរបស់ក្រសួងព័ត៌មាន។
លិខិតរបស់ទីស្តីការគណៈរដ្ឋមន្ត្រីបញ្ជាក់ក្នុងន័យដើមថា៖«អង្គភាពប្រព័ន្ធផ្សព្វផ្សាយទាំងអស់ត្រូវគោរព និងអនុវត្តតាមច្បាប់ស្តីពីរបបសារព័ត៌មាន និងក្រមសីលធម៌វិជ្ជាជីវៈ មិនព្រមអនុវត្តតាមការណែនាំ ក្រសួងព័ត៌មានត្រូវដកហូតអាជ្ញាបណ្ណបញ្ឈប់ការធ្វើអាជីវកម្មជាស្ថាពរ»។
លោក ប៉ែន បូណា អ្នកនាំពាក្យរដ្ឋាភិបាល ប្រាប់វីអូអេនៅថ្ងៃអង្គារថាការចេញសេចក្តីប្រកាសនេះ ជាការធ្វើបច្ចុប្បន្នភាពរបស់ស្ថានប័នសារព័ត៌មានឡើងវិញ ដើម្បីឱ្យដឹងពីចំនួនស្ថាប័នសារព័ត៌មានដែលកំពុងដំណើរការក្នុងប្រទេសកម្ពុជា។
លោកថ្លែងថា៖«កន្លងទៅមានស្ថាប័នសារព័ត៌មានច្រើនបានសុំអាជ្ញាបណ្ណ ក៏ប៉ុន្តែក៏មានស្ថាប័នមួយចំនួននោះក៏មិនទាន់បានមកបន្តអាជ្ញាបណ្ណ ឬក៏ផ្អាកដំណើរការអីយ៉ាងម៉េច គេចង់ដឹង ដើម្បីធ្វើបច្ចុប្បន្នភាពឱ្យបានជាក់លាក់តែប៉ុណ្ណឹងទេ»។
លោក ទេព អស្នារិទ្ធ អ្នកនាំពាក្យក្រសួងព័ត៌មាន ប្រាប់វីអូអេតាមប្រព័ន្ធតេឡេក្រាមថា វាមានភាពចាំបាច់នៅក្នុងការធ្វេីបច្ចុប្បន្នភាពដេីម្បីដឹងពីចំនួនជាក់លាក់របស់អង្គភាពសារព័ត៌មាននិងស្ថានភាពប្រតិបត្តិការរបស់ពួកគេ។ លោកបញ្ជាក់ថា៖ «ដេីម្បីយេីងដឹងអំពីចំនួនក៏ដូចជាស្ថានភាពប្រតិបត្តិការរបស់អង្គភាពសារព័ត៌មាន អ្នកសារព័ត៌មាន យេីងដេីម្បីយេីងអាចរៀបចំជួយសម្របសម្រួល កិច្ចគាំពារសម្រាប់អង្គភាពសារព័ត៌មាន អ្នកសារព័ត៌មាននៅទូទាំងប្រទេសកម្ពុជា»។
លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថាខេមបូចា ប្រាប់វីអូអេថាបច្ចុប្បន្នប្រជាពលរដ្ឋគ្រប់រូបបានចូលរួមចំណែកក្នុងការផ្សព្វផ្សាយព័ត៌មាន។ លោកបន្តថាប្រជាពលរដ្ឋអ្នកសារព័ត៌មានក៏បានរួមចំណែកក្នុងការប្រមូល ស្វែងរក និងផ្សព្វផ្សាយព័ត៌មានផងដែរ។ លោកបន្ថែមថាការតម្រូវឱ្យចុះឈ្មោះ អាចមានផលប៉ះពាល់ខ្លះទៅដល់ការអនុវត្តសិទិ្ធសេរីភាពរបស់ប្រជាពលរដ្ឋ ប៉ុន្តែលោកថាជាធម្មតាអ្នកសារព័ត៌មានត្រូវតែមានស្ថាប័នចុះបញ្ជីត្រឹមត្រូវ ដើម្បីប្រកបអាជីពរបស់ខ្លួន។
លោកថ្លែងថា៖ «រឿងការអនុវត្តមិនបានត្រឹមត្រូវ ល្មើសក្រមសីលធម៌វិជ្ជាជីវៈ យើងឈានទៅដល់ការដកអាជ្ញាបណ្ណប្រព័ន្ធផ្សព្វផ្សាយហ្នឹង ខ្ញុំគិតថាវាជារឿងមួយដែលជាការគំរាមគំហែងវាធ្វើឱ្យមានផលប៉ះពាល់ចំពោះការអនុវត្តតួនាទីរបស់អ្នកសារព័ត៌មាន ពីព្រោះយើងដឹងហើយថាខ្លះជាកំហុសវិជ្ជាជីវៈ ជាកំហុសក្រមសីលធម៌ទេដែលមិនគួរឈានទៅដល់ការដកអាជ្ញាបណ្ណ។ វាលើកលែងតែវាមានការបំពានធ្ងន់ធ្ងរ»។
លោកបន្ថែមថាក្រសួងព័ត៌មានគួរតែមានគោលការណ៍ណែនាំឱ្យបានច្បាស់លាស់ ទាក់ទងនឹងកំហុសធ្ងន់ធ្ងរកម្រិតណាដែលឈានទៅដល់ការដកអាជ្ញាបណ្ណ ទើបវាមិនអាចមានផលប៉ះពាល់ទៅលើសេរីភាពសារព័ត៌មាន។
កាលពីខែមេសា ឆ្នាំ២០២៣ លោក ខៀវ កាញារីទ្ធ អតីតរដ្ឋមន្រ្តីក្រសួងព័ត៌មានធ្លាប់ថ្លែងក្នុងវេទិកាសាធារណៈមួយថាសារព័ត៌មានបោះពុម្ពផ្សាយតាមបែបប្រពៃណីដែលរួមមានកាសែត ព្រឹត្តិបត្រ ទស្សនាវដ្តីដែលចុះបញ្ជីនៅក្រសួងព័ត៌មាន មានប្រមាណ៦៦០អង្គភាព គេហទំព័រ និងទូរទស្សន៍អនឡាញ ប្រមាណ៨៨០អង្គភាព វិទ្យុFMចំនួន២២១ស្ថានីយ ទូរទស្សន៍ផ្សាយផ្ទាល់មានចំនួន ១៩ស្ថានីយ និងផ្សាយបន្ត ចំនួន១៦៥ស្ថានីយ។ ចំណែកទីភ្នាក់ងារសារព័ត៌មានបរទេស និងការិយាល័យ តំណាងវិទ្យុទូរទស្សន៍បរទេសប្រចាំការអចិន្ត្រៃយ៍ មានចំនួន១៧អង្គភាព និងសមាគមសារព័ត៌មានសរុបចំនួន៥១អង្គភាព៕
