ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

បណ្តាញ​សារព័ត៌មាន VOD ចាប់​ផ្ដើម​ផ្សាយ​ជា​ភាសា​អង់គ្លេស


រូបឯកសារ៖ លោក ប៉ា ងួនទៀង នាយកប្រតិបត្តិនៃ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ និងវិទ្យុសំឡេងប្រជាធិបតេយ្យ​ (VOD) និងសហការីកំពុងធ្វើការនៅការិយាល័យប្រចាំរាជធានីភ្នំពេញ ថ្ងៃទី៣១ ខែសីហា ឆ្នាំ២០១៧។
រូបឯកសារ៖ លោក ប៉ា ងួនទៀង នាយកប្រតិបត្តិនៃ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ និងវិទ្យុសំឡេងប្រជាធិបតេយ្យ​ (VOD) និងសហការីកំពុងធ្វើការនៅការិយាល័យប្រចាំរាជធានីភ្នំពេញ ថ្ងៃទី៣១ ខែសីហា ឆ្នាំ២០១៧។

ក្នុង​ទិវា​សេរីភាព​សារព័ត៌មាន​ពិភពលោក​ គេហទំព័រ​ជា​ភាសា​អង់គ្លេស​មួយ​បាន​ចាប់​ផ្ដើម​ចេញ​ផ្សាយ​កាល​ពី​ថ្ងៃ​សុក្រ ទី​០៣ កន្លង​ទៅ​នេះ ដើម្បី​ជួយ​ស្រោចស្រង់​ដល់​បណ្តាញ​សារព័ត៌មាន​ឯករាជ្យ​ដែល​លិចលង់​នៅ​ក្នុង​ប្រទេស​កម្ពុជា។

លោក ណុប វី នាយក​នៃ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ​ហៅ​កាត់​ថា CCIM បាន​ថ្លែង​ថា៖

«យើង​បង្កើត​វា​ឡើង​ដោយសារ​តែ​យើង​មើល​ឃើញ​នូវ​កង្វះខាត​បណ្តាញ​សារព័ត៌មាន​ឯករាជ្យ​នៅ​កម្ពុជា ដែល​ផ្តល់​ព័ត៌មាន​ឯករាជ្យ​ដល់​ប្រជាជន​ដែល​រស់​នៅ​ក្រៅ​ប្រទេស ជាពិសេស​សហគមន៍​អន្តរជាតិ‍»។

លោក ណុប វី បាន​បន្ថែម​ថា កាល​ពី​មុន​នេះ គេហទំព័រ​ព័ត៌មាន​របស់​សំឡេង​ប្រជាធិបតេយ្យ​ឬ​ហៅ​កាត់​ថា VOD មាន​ត្រឹម​តែ​ជា​ភាសាខ្មែរ​ប៉ុណ្ណោះ។ គេហទំព័រ VOD ដែល​បាន​បោះពុម្ពផ្សាយ​អត្ថបទ​មួយ​ចំនួន​កាល​ពី​ពេល​ថ្មីៗ​នេះ សង្ឃឹម​ថា​នឹង​អាច​បំពេញ​ចន្លោះ​ខ្វះខាត​ ដោយសារ​តែ​បណ្តាញ​សារព័ត៌មាន​ឯករាជ្យ​នានា​ត្រូវ​បាន​បង្ខំ​ឲ្យ​បិទទ្វារ ​ឬ​ត្រូវ​បាន​លក់​នៅ​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ។

កាសែត​ឯករាជ្យ The Cambodia Daily ត្រូវ​បាន​បង្ខំ​ឲ្យ​បិទទ្វារ​កាល​ពី​ខែកញ្ញា ឆ្នាំ ២០១៧ នៅ​ពេល​ដែល​ត្រូវ​ប្រឈម​នឹង​ការ​តម្រូវ​ឲ្យ​បង់ពន្ធ​ចំនួន​ ៦លាន​៣​សែន​ដុល្លារ។ មិន​តែ​ប៉ុណ្ណោះ វិទ្យុ​អាស៊ី​សេរី បាន​បិទ​ការិយាល័យ​របស់​ខ្លួន​ក្នុង​ទីក្រុង ភ្នំពេញ ដោយ​យោង​ហេតុផល​ថា​មក​ពី​សម្ពាធ​ពី​រដ្ឋាភិបាល។ ស្ថានីយ៍​វិទ្យុ​ក្នុង​ស្រុក​ចំនួន​៣០​ត្រូវ​បាន​ផ្អាក​ការ​ផ្សាយ ហើយ​កាសែត​ឯករាជ្យ​ជា​ភាសា​អង់គ្លេស ភ្នំពេញ​ប៉ុស្តិ៍ ត្រូវ​បាន​លក់​កាល​ពី​ខែ ឧសភា ឆ្នាំ​មុន។

រូបឯកសារ៖ ស្ត្រីម្នាក់ទិញកាសែត The Cambodia Daily នៅដងផ្លូវក្នុងរាជធានីភ្នំពេញ កាលពីថ្ងៃទី៤ ខែកញ្ញា ឆ្នាំ២០១៧។
រូបឯកសារ៖ ស្ត្រីម្នាក់ទិញកាសែត The Cambodia Daily នៅដងផ្លូវក្នុងរាជធានីភ្នំពេញ កាលពីថ្ងៃទី៤ ខែកញ្ញា ឆ្នាំ២០១៧។

​ដោយ​មាន​ក្រុម​ការងារ​ថ្មី​ប្រមាណ​ ៥​ទៅ​៧​នាក់ ដែល​រួម​ទាំង​អ្នក​កាសែត​និង​និពន្ធ​នាយក​ផង​នោះ លោក ណុប វី ​សង្ឃឹម​ថា គេហទំព័រ​នេះ​អាច​ដើរ ​«តួនាទី​ជា​អ្នក​ឃ្លាំ​មើល​សកម្មភាព​របស់​រដ្ឋាភិបាល‍» ដែល​ព័ត៌មាន​ទាំង​នោះ​ធ្លាប់​ត្រូវ​បាន​ចេញផ្សាយ​ដោយ​បណ្តាញ​សារព័ត៌មាន​នានា​កាល​ពី​មុន។​

លោក​បាន​លើក​ឡើង​បន្ថែម​ទៀត​ថា ការណ៍​នេះ​នឹង​ចូល​រួម​ចំណែក​ដល់​អភិបាល​កិច្ច​ល្អ​និង​លទ្ធិប្រជាធិបតេយ្យ​នៅ​ក្នុង​ប្រទេស។
លោក ណុប វី និយាយ​ថា លោក​មាន​បំណង​នឹង​បង្កើត​ប្រាក់​ចំណូល​សម្រាប់​គេហទំព័រ​ខ្មែរនិង​សកម្មភាព​នានា​នៅ​ក្នុង​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ ដែល​ជា​បណ្តាញ​មេ​របស់ VOD។

លោក Shawn Crispin អ្នក​តំណាង​គណៈកម្មាធិការ​ដើម្បី​ការពារ​អ្នក​កាសែត CPJ ​ប្រចាំតំបន់​អាស៊ីអាគ្នេយ៍​ស្វាគមន៍​ចំពោះ​ការ​បង្កើត​គេហទំព័រ​ជា​ភាសា​អង់គ្លេស​នេះ។

លោក​បាន​និយាយ​នៅ​ក្នុង​អ៊ីមែល​ថា៖ «ស្ថានភាព​សេរីភាព​សារព័ត៌មាន​នៅ​កម្ពុជា​បាន​ធ្លាក់ចុះ​យ៉ាង​ខ្លាំង​នៅ​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ ដោយសារ​តែ​ការ​ធ្វើ​ទុក្ខបុកម្នេញ​និង​ការ​គំរាមកំហែង​ពី​រដ្ឋាភិបាល‍»។

លោក​បាន​បន្ថែម​ទៀត​ថា៖ «រដ្ឋាភិបាល​របស់​លោក ហ៊ុន សែន ច្បាស់ណាស់​ ចាត់ទុក​សេរីភាព​សារព័ត៌មាន​ថា​ជា​ការ​គំរាមកំហែង​ដល់​រដ្ឋឯកបក្ស​ដែល​គ្មាន​គូ​ប្រជែង»។

រូបឯកសារ៖ លោកនាយករដ្ឋមន្ត្រី ហ៊ុន សែន ចូលរួមពិធីសម្ពោធគម្រោង​ការពារ​គ្រោះទឹកជំនន់មួយដែលឧបត្ថម្ភដោយរដ្ឋាភិបាលជប៉ុន នៅរាជធានីភ្នំពេញ ថ្ងៃទី៤ ខែមីនា ឆ្នាំ២០១៩។
រូបឯកសារ៖ លោកនាយករដ្ឋមន្ត្រី ហ៊ុន សែន ចូលរួមពិធីសម្ពោធគម្រោង​ការពារ​គ្រោះទឹកជំនន់មួយដែលឧបត្ថម្ភដោយរដ្ឋាភិបាលជប៉ុន នៅរាជធានីភ្នំពេញ ថ្ងៃទី៤ ខែមីនា ឆ្នាំ២០១៩។

លោក ហ៊ុយ វណ្ណៈ ដែល​កាន់​តំណែង​ជា​អនុរដ្ឋលេខាធិការ​ក្រសួង​មហាផ្ទៃ​ផង និង​ជា​ប្រធាន​សហជីព​អ្នក​កាសែត​កម្ពុជា​ផង​ បាន​បដិសេធ​ចំពោះ​ការ​ចោទប្រកាន់​នេះ។

លោក​បាន​ថ្លែង​ថា សេរីភាព​សារព័ត៌មាន​ «មាន​លក្ខណៈ​បើក​ចំហ​និង​ទូលំទូលាយ‍» ហើយ​ថា អ្នក​កាសែត​ដែល​ត្អូញត្អែរ​អំពី​កង្វះខាត​សេរីភាព​សារព័ត៌មាន​គឺ​យល់​ច្រឡំ​អំពី​និយមន័យ​នៃ​សេរីភាព​សារព័ត៌មាន។

លោក​ថ្លែង​ថា៖ «ខ្ញុំ​គិត​ថា ពួកគេ​ចង់​ប្រើប្រាស់​សេរីភាព​ដើម្បី​និយាយ​អំពី​ការ​ស្អប់ខ្ពើម។ ពួកគេ​ចង់​ប្រើប្រាស់​សេរីភាព​ដើម្បី​ធ្វើការ​ញុះញង់‍»។ អ្នក​កាសែត​ដែល​និយាយ​ថា ពួកគេ​មិន​អាច​រាយការណ៍​ដោយ​សេរី​បាន​ ជា​ញឹកញយ​សរសេរ​អត្ថបទ​«អសីលធម៌‍» ធ្វើ​ឲ្យ​ប៉ះពាល់​ដល់​ភាព​ថ្លៃថ្នូរ​របស់​អ្នក​ដទៃ ឬ​ប៉ះពាល់​ដល់​មន្ត្រី​រាជការ ដូចជា​ការ​ហៅ​រដ្ឋាភិបាល​របស់​លោក ហ៊ុន សែន ថា​ជា «របប​លោក​ ហ៊ុន សែន‍» ជាដើម។ ​

លោក ហ៊ុយ វណ្ណៈ បាន​បន្ដ​ទៀត​ថា៖ «ប្រសិន​បើ​ពួកគេ​មាន​បំណង​ល្អ ហើយ​ប្រសិន​បើ​ពួកគេ​ប្រកប​វិជ្ជាជីវៈ​ត្រឹមត្រូវ​នោះ ពួកគេ​អាច​ធ្វើ​អ្វី​ដែល​ពួកគេ​ចង់​ធ្វើ​បាន‍។ ប៉ុន្តែ​បញ្ហា​គឺ​ថា ពួកគេ​យល់​ច្រឡំ​ចំពោះ​ការ​ប្រើប្រាស់​សេរីភាព​សារព័ត៌មាន​របស់​ខ្លួន‍»។

លោក Phil Robertson នាយករង​ទទួល​បន្ទុក​តំបន់​អាស៊ី​នៃ​អង្គការ​ឃ្លាំ​មើ​សិទ្ធិមនុស្ស Human Rights Watch យល់​ស្រប​នឹង​ការ​វាយតម្លៃ​របស់​គណៈកម្មាធិការ​ការពារ​អ្នកកាសែត CPJ។

លោក​បាន​ថ្លែង​ប្រាប់ VOA តាម​អ៊ីមែល​ថា ខណៈ​ដែល​កម្មវិធី​ថ្មី​នេះ​«អាច​បំពេញ​ចន្លោះ​ខ្វះខាត​យ៉ាង​ច្រើនក្នុងការ​រាយការណ៍​ព័ត៌មាន‍» នេះ​មិនមែន​ជា​ដំណោះស្រាយ​យូរអង្វែង​នោះ​ទេ។

លោក​បាន​សរសេរ​ថា៖ «សំណួរ​សំខាន់គឺ​មិនមែន​សួរ​ថា​ប្រសិន​បើ​នោះ​ទេ ប៉ុន្តែ​ជា​សំណួរ​ថា​តើ​ពេល​ណា ដែល​រដ្ឋាភិបាល​កម្ពុជា​សម្រេច​ចិត្ត​ធ្វើ​ចំណាត់ការ​លើ​ VOD និង​អ្នក​យក​ព័ត៌មាន​របស់​ស្ថាប័ននេះ‍»។

លោក Robertson បាន​បន្ថែម​ទៀត​ថា៖ «សេរីភាព​សារព័ត៌មាន​នៅ​តែ​រងគ្រោះថ្នាក់​នៅ​ក្នុង​ប្រទេស​កម្ពុជា​របស់​លោក ហ៊ុន សែន‍។ មន្ត្រី​ការទូត​គួរ​តែ​ប្រាប់​ដល់​រដ្ឋាភិបាល​កម្ពុជា​ឲ្យ​គោរព​សេរីភាព​សារព័ត៌មាន និង​បញ្ចប់​ការ​ធ្វើ​ទុក្ខបុកម្នេញ​ទៅ​លើ​វិទ្យុ​អាស៊ីសេរី VOD និង​សារព័ត៌មាន​ឯករាជ្យ​ដទៃទៀត‍»។ ​

លោក ណុប វី នាយក​នៃ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ ថ្លែង​ថា ស្ថាប័ន​របស់​លោក​បាន​ព្យាយាម​ទប់ស្កាត់​កុំ​ឲ្យ​រឿង​នេះ​កើតឡើង តាមរយៈ​ការ​បង្កើត​ឲ្យ​មាន ​«ការ​យោគយល់​គ្នា​ទៅ​វិញ​ទៅ​មក​រវាង​រដ្ឋាភិបាល​និង​អ្នក​កាសែត​ឯករាជ្យ‍»៕

ប្រែសម្រួល​ដោយ​អ្នកស្រី ហុង ចិន្ដា

XS
SM
MD
LG