ទីភ្នាក់ងារព័ត៌មាន AP រាយការណ៍ថា រដ្ឋបាលរបស់លោកប្រធានាធិបតី Donald Trump កំពុងរុញស្ថានភាពនៃអន្តរកាលផ្ទេរអំណាច ឲ្យស្ថិតក្នុងភាពច្របូកច្របល់ ដោយរារាំងមន្ត្រីរដ្ឋាភិបាលរបស់លោក មិនឲ្យសហការជាមួយក្រុមការងាររបស់លោក Joe Biden ដែលត្រូវគេព្យាករណ៍ថានឹងក្លាយជាប្រធានាធិបតីអាមេរិកថ្មីនោះ។ ហើយរដ្ឋមន្រ្តីក្រសួងយុត្តិធម៌អាមេរិក លោក William Barr បានបញ្ជាឲ្យក្រសួងយុត្តិធម៌ធ្វើការស៊ើបអង្កេត ពីការចោទប្រកាន់ៗនានា ទាក់ទងនឹងការបន្លំសន្លឹកឆ្នោតនោះ។
មន្ត្រីគណបក្សសាធារណរដ្ឋមួយចំនួន ដែលក្នុងនោះរួមមានប្រធានព្រឹទ្ធសភា និងជាមេដឹកនាំសំឡេងភាគច្រើន លោក Mitch McConnell បានសម្តែងការគាំទ្ររបស់លោកចំពោះលោក ត្រាំ ក្នុងការប្រយុទ្ធតាមផ្លូវច្បាប់ប្រឆាំងលទ្ធផលបោះឆ្នោតនោះ។ មានមន្រ្តីគណបក្សសាធារណរដ្ឋមួយចំនួនតូចប៉ុណ្ណោះបានទទួលស្គាល់ជ័យជម្នះរបស់លោកBiden ឬថ្កោលទោសលោក ត្រាំ ចំពោះការបណ្តេញរដ្ឋមន្ត្រីក្រសួងការពារជាតិអាមេរិកលោក Mark Esper ចេញពីតំណែងកាលពីថ្ងៃចន្ទនោះ។
សកម្មភាពទាំងនេះ បានបង្កើតឲ្យមានភាពមន្ទិលសង្ស័យ ថាតើប្រទេសអាមេរិកនឹងមានការផ្ទេរអំណាចមួយដោយរលូនដែរឬយ៉ាងណា ដែលទម្លាប់ផ្ទេរអំណាចនេះបានចាក់គ្រឹះអស់រយៈពេលយ៉ាងយូរមកហើយក្នុងគន្លងលទ្ធិប្រជាធិបតេយ្យរបស់អាមេរិកនោះ។
តាមច្បាប់សហរដ្ឋអាមេរិក អង្គបោះឆ្នោត ឬ Electoral College រំពឹងថានឹងត្រូវប្រកាសជាផ្លូវការពីជ័យជម្នះដែលត្រូវបានព្យាករណ៍របស់លោក Joe Biden នៅថ្ងៃទី១៤ ខែធ្នូ ខាងមុខ ហើយបេក្ខជនជាប់ឆ្នោតរបស់គណបក្សប្រជាធិបតេយ្យរូបនេះ ត្រូវរំពឹងថានឹងស្បថចូលកាន់មុខតំណែងនៅចុងខែមករា ឆ្នាំ២០២១៕
