ព័ត៌មាននៃការកើនឡើងយ៉ាងគំហុកចំនួនករណីឆ្លងថ្មីនៃជំងឺកូវីដ១៩ រួមផ្សំនឹងព័ត៌មាននៃការណ៍ដែលទំនាក់ទំនងសហរដ្ឋអាមេរិកនិងប្រទេសចិនកាន់តែធ្លាក់ចុះដល់ដំណាក់កាលថ្មីមួយ បានធ្វើឲ្យទីផ្សារភាគហ៊ុននៅទ្វីបអឺរ៉ុបដាំក្បាលចុះកាលពីថ្ងៃពុធ។
ផ្សារសំខាន់ៗនៅប្រទេសអង់គ្លេស បារាំង និងអាល្លឺម៉ង់សុទ្ធតែបានធ្លាក់ចុះ ដោយផ្សារ CAC-40 របស់ទីក្រុងប៉ារីសបានធ្លាក់រហូត១,១ភាគរយ។
អ្នកវិនិយោគហាក់មានការបារម្ភខ្លាំងអំពីបទបញ្ជាដ៏គួរឲ្យភ្ញាក់ផ្អើលកាលពីថ្ងៃពុធរបស់ក្រសួងការបរទេសសហរដ្ឋអាមេរិកឲ្យចិនបិទស្ថានកុងស៊ុលរបស់ខ្លួននៅទីក្រុង Houston រដ្ឋ Texas។
ទីផ្សារហ៊ុននៅអាស៊ីប៉ាស៊ីហ្វិកមានភាពចម្រុះកាលពីថ្ងៃពុធ ដោយមានទីផ្សារខ្លះបានធ្លាក់ចុះយ៉ាងខ្លាំង។ ផ្សារហ៊ុន Nikkei របស់ជប៉ុនបានធ្លាក់ចុះ០,៥ភាគរយ ផ្សារ S&P/ASX នៅអូស្ត្រាលីធ្លាក់ចុះ១,២ភាគរយ ហើយទីផ្សារ Hang Seng នៅហុងកុង បានធ្លាក់ចុះរហូតដល់២,២ភាគរយ។
ភាគហ៊ុនរបស់ផ្សារ Dow Jones និង S&P 500 នៅសហរដ្ឋអាមេរិកបានធ្លាក់ចុះមុនការបើកទីផ្សារកាលពីថ្ងៃពុធ មួយផ្នែកជាការប្រតិកម្មនឹងភាពជាប់គាំងខាងនយោបាយរបស់អាមេរិកអំពីកញ្ចប់ជំនួយថវិកាថ្មីមួយសម្រាប់ជួយពលរដ្ឋអាមេរិកដែលបានបាត់បង់ការងារដោយសារវិបត្តិកូវីដ១៩៕
