អង្គការសហប្រជាជាតិនិយាយថា មនុស្សជាង៨២០លាននាក់នៅជុំវិញពិភពលោកកំពុងស្រេកឃ្លាន ខណៈពេលមនុស្សធាត់ហួសហេតុកំពុងឈានដល់កម្រិតខ្ពស់បំផុត។ របាយការណ៍មួយចេញផ្សាយកាលពីថ្ងៃចន្ទដោយទីភ្នាក់ងារអ.ស.ប.ចំនួន៥ធ្វើការលើផ្នែកម្ហូបអាហារ អាហារូបត្ថម្ភ និងសុខភាព បាននិយាយថា ខណៈពេលកម្រិតនៃភាពអត់ឃ្លានភាគច្រើនមានលំនឹង មនុស្សជាច្រើននៅជុំវិញពិភពលោក ព្រួយបារម្ភដោយមិនដឹងថា គ្រួសាររបស់ពួកគេមានអាហារទៀតឬយ៉ាងណា។
ពេលចេញរបាយការណ៍នេះ លោក José Graziano da Silva អគ្គនាយកអង្គការកសិកម្ម និងស្បឿងអាហារនិយាយថា «មនុស្សមានអារម្មណ៍ថា ពួកគេគ្មានសុវត្ថិភាពអាហារពីព្រោះពួកគេនៅក្នុងតំបន់ដែលមានជម្លោះ មិនមានសុវត្ថិភាពដោយសារតែពួកគេនៅក្នុងប្រទេសមានអត្រាអតិផរណាខ្ពស់មិនមានសុវត្ថិភាព ពីព្រោះពួកគេទទួលបានប្រាក់ខែទាបបំផុតដែលពួកគេមិនមានលុយទិញម្ហូបអាហារ។ តួលេខនេះជាចំនួនធំមួយ ហើយយើងមានការភ្ញាក់ផ្អើលនៅពេលយើងរកឃើញតួលេខនេះ»។
របាយការណ៍នេះកត់សម្គាល់ថា អត្រាអត់ឃ្លានខ្ពស់បំផុតគឺនៅក្នុងទ្វីបអាហ្វ្រិកហើយកំពុងតែរីករាលដាលយ៉ាងខ្លាំងនៅស្ទើរគ្រប់ផ្នែកទាំងអស់។ ការធ្លាក់ចុះសេដ្ឋកិច្ចបាននាំឲ្យមនុស្សជាង២៥៦លាននាក់ជួបអសន្តិសុខស្បៀង។ នៅទ្វីបអាស៊ី មនុស្សជាង៥០០លាននាក់កង្វះអាហារូបត្ថម្ភ។
នេះជាលើកទីមួយហើយដែលភ្នាក់ងារអ.ស.ប.ប្រមូលទិន្នន័យពីអត្រាមនុស្សធាត់ហួសហេតុក្នុងពិភពលោកដែលមានការកើនឡើងខ្ពស់។ លោក Graziano da Silva បាននិយាយថា មានមនុស្សធាត់ហួសហេតុប្រហែល៨៣០លាននាក់នៅក្នុងពិភពលោក៕
