ប៉ុន្មានម៉ោងមុនពេលលោកស្រី Michelle Obama អញ្ចើញមកដល់ខេត្តសៀមរាបដែលជាខេត្តទេសចរណ៍ដ៏សំខាន់របស់ប្រទេសកម្ពុជា កម្ពុជាមានការមមាញឹកក្នុងការចាប់ផ្តើមប្រកបការងារផ្ទាល់ខ្លួនរៀងៗខ្លួនជាធម្មតា។ ព្រះសង្ឃនៅតាមវត្តអារាមមានការសូត្រមន្តប្រតិបត្តិ កសិករចេញធ្វើស្រែចម្ការ និងសិស្សានុសិស្សធ្វើដំណើរទៅកាន់សាលារៀនរៀងៗខ្លួន។
ដោយឡែកអ្នកដែលធ្វើការងារក្នុងវិស័យទេសចរណ៍មានការងារមមាញឹកយ៉ាងខ្លាំង។ ពួកគាត់ក្រោកពីព្រឹកព្រហាម ២ ទៅ ៣ ម៉ោងមុនពេលព្រះអាទិត្យរះដើម្បី រៀបចំទទួលភ្ញៀវទេសចរណ៍ដែលមកទស្សនាព្រះអាទិត្យរះនាម៉ោងប្រមាណ៦.៣០នាទី។ នៅក្នុងនោះ ក៏មានសិស្សស្រីមួយចំនួនផងដែរ ដែលមកប្រកបរបរក្នុងវិស័យទេសចរណ៍ផងដែរ ដើម្បីយកកម្រៃបន្តិចបន្តួចទៅផ្គត់ផ្គង់គ្រួសារនិង ថ្លៃសម្ភារៈការសិក្សា។
ប្អូនស្រី ព្រុំ រស្មី ជាសិស្សថ្នាក់ទី៨នៃវិទ្យាល័យ ហ៊ុន សែន សៀមរាបត្រូវក្រោក ចាប់តាំងពីម៉ោង៥ព្រឹក ដើម្បីមកលក់សៀវភៅប្រត្តិសាស្រ្តអង្គរ ជាភាសាអង់គ្លេសដល់ ភ្ញៀវទេសចរណ៍ដែលមកលេងនៅប្រាសាទអង្គរវត្ត។ រស្មីអាចទទួលបានប្រាក់ កម្រៃពី៣ទៅ១០ដុល្លារក្នុងមួយថ្ងៃៗ។
«មុខរបរខ្ញុំតែប៉ុណ្ណឹង ខ្ញុំមកលក់សៀវភៅដើម្បីយកប្រាក់ចិញ្ចឹមគ្រួសារ។ ពេលព្រឹក ខ្ញុំមកលក់សៀវភៅ ពេលថ្ងៃខ្ញុំទៅសាលា ហើយម៉ោង៥ល្ងាចខ្ញុំមកទីនេះវិញ ដើម្បី លក់សៀវភៅ»។ នេះបើតាមសម្តីរបស់ប្អូនស្រី ព្រុំ រស្មី អាយុ១៧ឆ្នាំនិងជាកូនទីកូនទី៧ ក្នុងគ្រួសារដែលមានសមាជិក៩នាក់។
រស្មីបានប្រាប់ VOA ថា នាងទំនងនឹងអាចបោះបង់ការសិក្សានាពេលខាងមុខដោយនាងរៀនមិនពូកែ ហើយនាងចង់ផ្តោតអាម្មណ៍ទៅលើមុខរបររបស់នាង។
ជាមួយគ្នានេះដែរ ប្អូនស្រី ឌឿ មាឡា អាយុ១៤ឆ្នាំ ជាអ្នកលក់អាហារពេលព្រឹកដល់ភ្ញៀវដែលមកទស្សនាថ្ងៃរះនៅមុខប្រាសាទអង្គរវត្ត ក៏ត្រូវក្រោកចាប់តាំងពីម៉ោង៤ ទាបភ្លឺដើម្បីជួយម្តាយរបស់នាងក្នុងការរៀបចំចម្អិនម្ហូបនិងលក់ជូនភ្ញៀវ។ ខុសពី ប្អូនស្រី ព្រុំ រស្មី ប្អូនស្រី ឌឿ មាឡា ដែលជាសិស្សថ្នាក់ទី៨នៃវិទ្យាល័យ ហ៊ុន សែន ចាត់ទុកការសិក្សារបស់ខ្លួនជា ការសំខាន់និងមានគោលចំណងរៀនឲ្យចប់ឧត្តមសិក្សានិងក្លាយជាវេជ្ជបណ្ឌិតមួយរូប ដើម្បីរកប្រាក់កម្រៃច្រើនទៀតសម្រាប់ផ្គត់ផ្គង់គ្រួសាររបស់នាង។
លោកស្រី Michelle Obama ភរិយាប្រធានាធិបតីសហរដ្ឋអាមេរិកនឹងអញ្ជើញមកដល់កម្ពុជានៅយប់ថ្ងៃសុក្រ ដើម្បីចាប់ផ្តើមដំណើរទស្សនកិច្ចរយៈពេល៣ថ្ងៃក្នុងគោលបំណងបើក«គម្រោងផ្តល់ឱកាសឲ្យសិស្សស្រីបានសិក្សា» ឬ «Let Girls Learn» ដែលជាគម្រោងមួយមានគោលដៅលើកតម្កើងតួនាទីសង្គមស៊ីវិលនិងកិច្ចការអភិបាលកិច្ចល្អ។
ប្រទេសកម្ពុជាជាប្រទេសមួយក្នុងចំណោមប្រទេស១១ដែលចូលរួមនៅក្នុងគម្រោង «Let Girls Learn» ដែលត្រូវអនុវត្តដោយកម្មវិធីក្រុមអ្នកស្ម័គ្រចិត្ត Peace Corps របស់រដ្ឋាភិបាលសហរដ្ឋអាមេរិក ហើយនឹងត្រូវចាត់ចែងដោយលោកស្រី Michelle Obama ផ្ទាល់។
ប្អូនស្រីព្រុំ រស្មី និង ឌឿ មាឡាមានការអបអរសាទរ ចំពោះទស្សនកិច្ចរបស់លោកស្រី Michelle Obama មកកាន់ប្រទេសកម្ពុជានិងខេត្តសៀមរាបនេះ។ លើសពីនេះទៀត ប្អូនស្រី ឌឿ មាឡា មានការរីករាយយ៉ាងខ្លាំងដែលលោកស្រី Michelle Obama នឹងបើក «គម្រោងផ្តល់ឱកាសឲ្យសិស្សស្រីបានសិក្សា» ឬ «Let Girls Learn» ព្រោះគម្រោងនេះនឹងជួយបើកឱអាសឲ្យសិស្សស្រីនៅក្នុងប្រទេសកម្ពុជាបានរៀននៅក្នុងសាលាបានច្រើន។
«អាចជួយឲ្យបានច្រើន ព្រោះអាចជួយឲ្យយើងរៀនឲ្យបានច្រើន ដើម្បីរកប្រាក់ឲ្យបានច្រើន»។ នេះបើតាមសម្តីរបស់ប្អូនស្រី ឌឿ មាឡា។
សូមបញ្ជាក់ថា នៅថ្ងៃសៅរ៍ស្អែក ប្រាសាទអង្គរវត្តនឹងត្រូវបិទមិនឲ្យមានការលក់ដូរ ដូចជាការលក់ដូររបស់ប្អូនស្រី ឌឿ មាឡា និងប្អូនស្រី ព្រុំ រស្មី ប៉ុន្តែអ្នកទេសចរណ៍អាចចូលទស្សនាជាធម្មតា៕
