រដ្ឋមន្រ្តីការពារជាតិអាល្លឺម៉ង់បាននិយាយកាលពីថ្ងៃទី៣ ខែមីនាថា រុស្ស៊ីកំពុងធ្វើ «សង្រ្គាមព័ត៌មាន» ក្នុងបំណងបង្កឱ្យមានការបែកបាក់ក្នុងសង្គមអាល្លឺម៉ង់ ដែលនេះជាប្រតិកម្មលើកដំបូងរបស់រដ្ឋមន្ត្រីការពារជាតិអាល្លឺម៉ង់រូបនេះ ទៅនឹងការផ្សព្វផ្សាយសារសំឡេងស្តីពីកិច្ចប្រជុំមន្រ្តីយោធាជាន់ខ្ពស់អាល្លឺម៉ង់។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
បណ្តាញព័ត៌មានរុស្ស៊ីបានចេញផ្សាយសារសំឡេងសន្ទនាតាមទូរស័ព្ទចំនូន៣៨នាទីកាលពីថ្ងៃទី១ ខែមីនាកន្លងទៅនេះ ដែលក្នុងនោះមន្រ្តីអាល្លឺម៉ង់បានពិភាក្សាពីការផ្តល់គ្រឿងសព្វាវុធដល់អ៊ុយក្រែន និងលទ្ធភាពនៃការវាយប្រហារលើស្ពានមួយនៅតំបន់ Crimea ដោយរដ្ឋាភិបាលក្រុងកៀវ ដែលការនេះបានធ្វើឱ្យមន្រ្តីរុស្ស៊ីទាមទារឱ្យមានការបកស្រាយមួយ។
កាលពីថ្ងៃទី២ ខែមីនា រដ្ឋាភិបាលអាល្លឺម៉ង់បានហៅការផ្សព្វផ្សាយសារសំឡេងនោះថា ជាទង្វើលួចស្តាប់ និងបានលើកឡើងថា ខ្លួនកំពុងធ្វើការស៊ើបអង្កេត។
រដ្ឋមន្រ្តីការពារជាតិអាល្លឺម៉ង់លោក Boris Pistorius បាននិយាយកាលពីថ្ងៃទី៣ខែមីនាថា៖ «ហេតុការណ៍នេះ គឺមានលើសពីការត្រឹមតែការលួចស្តាប់ថត និងការផ្សព្វផ្សាយការសន្ទនាគ្នាមួយ។ វាជាផ្នែកមួយនៃសង្រ្គាមព័ត៌មាន ដែលប្រធានាធិបតីរុស្ស៊ីលោក Vladimir Putin កំពុងធ្វើឡើង»។
លោកបានបន្តថា៖ «នេះជាការវាយប្រហារដោយព័ត៌មានបំភ្លៃបែបចម្រុះ។ គេចង់ធ្វើឱ្យមានការបែកបាក់គ្នា និងចង់បំផ្លាញសាមគ្គីភាពរបស់យើង»។
រដ្ឋាភិបាលវិមានក្រឹមឡាំងបានច្រានចោលជាច្រើនលើកច្រើនសារនូវការចោទប្រកាន់ ដែលថាខ្លួនធ្វើការផ្សព្វផ្សាយព័ត៌មានមិនពិត ឬព័ត៌មានដែលធ្វើឱ្យមានការយល់ច្រឡំ នៅពេលប្រឈមនឹងការចោទប្រកាន់ពីប្រទេសដទៃ។
អ្នកនាំពាក្យក្រសួងការបរទេសរុស្ស៊ីបានលើកឡើងនៅលើបណ្តាញសង្គមកាលពីថ្ងៃទី១ខែមីនាថា «យើងទាមទារឱ្យមានការបកស្រាយមួយពីប្រទេសអាល្លឺម៉ង់» ដោយមិនបានបញ្ជាក់លម្អិតពីការព្រួយបារម្ភរបស់ខ្លួនឡើយ។
ស្ថានទូតរុស្ស៊ីក្នុងទីក្រុងប៊ែរឡាំង ប្រទេសអាល្លឺម៉ង់ មិនបានឆ្លើយតបទៅនឹងសំណើសុំអធិប្បាយនោះទេ។
ក្រុមមន្រ្តីចូលរួមនៅក្នុងការសន្ទនាតាមប្រព័ន្ធទូរស័ព្ទនោះ បានពិភាក្សាពីលទ្ធភាពនៃការបញ្ជូនគ្រាប់មីស៊ីលប្រភេទ Taurus ទៅកាន់ក្រុងកៀវ ដែលអធិការបតីអាល្លឺម៉ង់លោក Olaf Scholz ធ្លាប់បានបដិសេធយ៉ាងមុតមាំជាសាធារណៈរហូតមកដល់ពេលនេះ។ ក្រុមមន្រ្តីទាំងនោះក៏បានពិភាក្សាអំពីការផ្តល់ការហ្វឹកហាត់ដល់ទាហានអ៊ុយក្រែន និងលទ្ធភាពគោលដៅយោធាផងដែរ។
អតីតប្រធានាធិបតីរុស្ស៊ីលោក Dmitry Medvedev ដែលឥឡូវនេះជាអនុប្រធានក្រុមប្រឹក្សាសន្តិសុខរុស្ស៊ី បាននិយាយកាលពីថ្ងៃទី៣ខែមីនាថា សារសំឡេងនោះបង្ហាញថា រដ្ឋាភិបាលក្រុងប៊ែរឡាំងកំពុងត្រៀមប្រយុទ្ធនឹងរដ្ឋាភិបាលក្រុងមូស្គូ៕
ប្រែសម្រួលដោយលោក ណឹម សុភ័ក្រ្តបញ្ញា
វេទិកាបញ្ចេញមតិ