អាជ្ញាធរនៅរដ្ឋ Rhine-Westphalia នៅភាគខាងលិចរបស់ប្រទេសអាល្លឺម៉ង់ កាលពីថ្ងៃអង្គារ បានសម្រេចដាក់ជាថ្មីនូវការដាក់កំហិតរឹតត្បិតសកម្មភាពសេដ្ឋកិច្ចនិងសង្គមនៅក្នុងស្រុក Guetersloh ក្រោយពីមានសេចក្តីរាយការណ៍ពីការផ្ទុះរាតត្បាតនៃជំងឺកូវីដ១៩នៅរោងចក្រវេចខ្ចប់សាច់មួយកន្លែងនៅតំបន់នោះ។
ក្នុងសន្និសីទសារព័ត៌មានមួយក្នុងទីក្រុង Duesseldorf អភិបាលរដ្ឋ Rhine-Westphalia លោក Armin Laschet ថ្លែងថា វិធានការបិទតំបន់នេះជាថ្មីនេះនឹងមានសុពលភាពដល់ថ្ងៃទី៣០ ខែមិថុនា ហើយកើតឡើងក្រោយពីមានអ្នកធ្វើការនៅរោងចក្រនោះចំនួន១.៥០០នាក់និងសមាជិកក្រុមគ្រួសារពួកគេខ្លះបានធ្វើតេស្តរកឃើញថាមានវីរុសដែលបង្កជំងឺកូវីដ១៩។
ស្រុក Guetersloh មានប្រជាជនប្រមាណ៣៦០.០០០នាក់ ហើយជាតំបន់ទីមួយនៅប្រទេសអាល្លឺម៉ង់ដែលបានត្រឡប់បិទសកម្មភាពជាថ្មី ក្រោយពីអាជ្ញាធរបានចាប់ផ្តើមបន្ធូរបន្ថយការរឹតត្បិតសកម្មភាពសង្គមអស់៧សប្តាហ៍មកហើយ។
នៅជុំវិញពិភពលោកគិតមកត្រឹមថ្ងៃអង្គារ វីរុសកូរ៉ូណាបានឆ្លងដល់មនុស្សជាង៩.១២០.០០០នាក់ ហើយជំងឺកូវីដ១៩បានសម្លាប់មនុស្ស ជាង៤៧២.០០០នាក់៕
