ភ្ជាប់​ទៅ​គេហទំព័រ​ទាក់ទង

កិច្ច​ប្រជុំ​កំពូល​ G7 បន្ត​ដោយ​ពិភាក្សា​អំពី​ថាមពល​ជាមួយ​មេដឹកនាំ​អាហ្រ្វិក


ប្រធានាធិបតី​បារាំង Francois Hollande​ ប្រធានាធិបតី​សហរដ្ឋ​អាមេរិកបារ៉ាក់ អូបាម៉ា​​ និង​អធិការ​បតី​អាល្លឺម៉ង់ Angela Merkel បាន​អញ្ជើញ​មក​ដល់​កន្លែង​ប្រជុំ​ថ្ងៃ​ទី​២​ សម្រាប់​កិច្ច​ប្រជុំ​កំពូល​ G7 ក្នុង​ទីក្រុង​ Kruen ​ប្រទេស​អាល្លឺម៉ង់​ កាល​ពី​ថ្ងៃ​ទី​៨ ខែ​មិថុនា​ ឆ្នាំ​២០១៥។​

មេ​ដឹកនាំ​នៅ​កិច្ច​ប្រជុំ​កំពូល​ G7 ​នៅ​ប្រទេស​អាល្លឺម៉ង់​កំពុង​ពិភាក្សា​គ្នា​ ចូល​ដល់​ថ្ងៃ​ទី​២​និង​ជា​ថ្ងៃចុង​ក្រោយ​នៅ​ថ្ងៃច័ន្ទ​នេះ​ ដោយ​ផ្តោត​ការចាប់​អារម្មណ៍​លើ​បញ្ហា​អាកាស​ធាតុ​និង​ថាមពល ​ហើយ​និងការ​ពិភាក្សា​ជាមួយ​សមភាគី​របស់​គេ​មក​ពី​បណ្តា​ប្រទេស​នៅ​ទ្វីប​អាហ្វ្រិក។

នៅ​មុន​ពេល​កិច្ច​ប្រជុំ​កំពូល​នេះ​ចាប់​ផ្តើម​កាលពី​ថ្ងៃ​អាទិត្យ​ លោក​បារ៉ាក់​អូបាម៉ា​ ប្រធានាធិបតី​សហរដ្ឋ​អាមេរិក​និង​លោកស្រី ​Angela Merkel​ អធិការបតី​អាល្លឺម៉ង់​បាន​ជួប​ពិភាក្សា​គ្នា។ ភាគី​សេតវិមាន​បាន​ឲ្យ​ដឹង​ថា ​មាន​ការ​ព្រម​ព្រៀង​គ្នា​អំពី ​រយៈ​ពេល​នៃ​ការ​ដាក់​ទណ្ឌកម្ម​សេដ្ឋ​កិច្ច​ប្រឆាំង​ប្រទេស​រុស្ស៊ី​គឺ​អាស្រ័យ​លើ​ការអនុវត្ត​កិច្ច​ព្រមព្រៀង​បទ​ឈប់បាញ់​របស់​រុស្ស៊ី​ក្នុង​ប្រទេស​ អ៊ុយក្រែន។​

លោកស្រី​អធិការបតី​ Merkel​ បាន​ប្រាប់​សាធារណជន​អាល្លឺម៉ង់​ក្នុង​ការផ្សាយ​តាម​ទូរទស្សន៍​អាល្លឺម៉ង់ ​ARD ​ថា ​រដ្ឋាភិបាល​ក្រុង​មូស្គូ​គួរ​តែ​នៅ​ក្រៅ​សហគមន៍​ G7 ​ដោយ​សារ​តែ​សកម្មភាព​រុស្ស៊ី​នៅ​ក្នុង​ប្រទេស​អ៊ុយក្រែន។

លោកស្រី​និយាយ​ថា​ នៅ​ពេល​នេះ​មាន​ឧបសគ្គ​ច្រើន​ ហើយ​លោកស្រី​មិន​អាច​មើល​ឃើញ​ថា ​បញ្ហា​នេះ​នឹង​ចប់​ឆាប់ៗ​នោះ​ទេ។​

លោក​ Vladimir Putin ​ប្រធានាធិបតី​រុស្ស៊ី​មិន​ត្រូវ​បាន​អញ្ជើញ​ឲ្យ​ចូល​រួម​ក្នុង​កិច្ច​ប្រជុំ​នេះ​ពីរ​ឆ្នាំ​ជាប់ៗ​គ្នា៕

XS
SM
MD
LG