ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រុម​ប្រទេស G7 អំពាវនាវឱ្យ​​​រុស្ស៊ី​ដក​ទ័ព​ចេញ​ពី​​អ៊ុយក្រែន​​ជា​បន្ទាន់​និង​គ្មាន​លក្ខខណ្ឌ​​


រដ្ឋមន្ត្រី​ការបរទេសនៃ​ក្រុម​ប្រទេស​ដែល​មាន​​ឧស្សាហកម្ម​ជឿន​លឿនទាំង​៧​ឬ​ G7 ​នៅ​ថ្ងៃចន្ទ​ ទី​១៧ ខែ​មេសា ឆ្នាំ​២០២៣ នៅ​ទី​ក្រុង Karuizawa ប្រទេស​ជប៉ុន។
រដ្ឋមន្ត្រី​ការបរទេសនៃ​ក្រុម​ប្រទេស​ដែល​មាន​​ឧស្សាហកម្ម​ជឿន​លឿនទាំង​៧​ឬ​ G7 ​នៅ​ថ្ងៃចន្ទ​ ទី​១៧ ខែ​មេសា ឆ្នាំ​២០២៣ នៅ​ទី​ក្រុង Karuizawa ប្រទេស​ជប៉ុន។

រដ្ឋមន្ត្រី​ការបរទេសនៃ​ក្រុម​ប្រទេស​ដែល​មានឧស្សាហកម្ម​ជឿន​លឿនទាំង​៧​ឬ​ G7 ​នៅ​ថ្ងៃចន្ទ​នេះ​ បានពង្រឹងអនុវត្ត​ការ​សន្យា​របស់​ពួក​គេ​ ក្នុង​ការ​គាំទ្រ​ដល់​ប្រទេស​អ៊ុយក្រែន​ឱ្យ​កាន់​តែខ្លាំង​ថែម​ទៀត ខណៈ​ពេល«បង្កើន​ល្បឿន​និង​សម្របសម្រួល​ឱ្យកាន់​តែ​ពេញលេញ ក្នុង​ការ​ដាក់​ទណ្ឌកម្ម​ប្រឆាំង​នឹង​ប្រទេស​រុស្ស៊ី»។

នៅ​ក្នុង​កិច្ចប្រជុំមួយ​ក្នុង​ប្រទេស​ជប៉ុន​ ក្រុម​រដ្ឋមន្ត្រីការបរទេស​នៃប្រទេស G7 ​លើក​ឡើង​ថា រុស្ស៊ី​ត្រូវតែ​ដក​កងទ័ព​របស់ខ្លួននិង​យុទ្ធោបករណ៍​ទាំង​អស់​ចេញ​ពី​ទឹកដី​អ៊ុយក្រែនជា​បន្ទាន់​ និង​គ្មាន​លក្ខខណ្ឌ។ នេះ​បើ​យោង​ទៅ​លើ​សេចក្តី​ថ្លែងការណ៍​មួយ ​របស់​ក្រសួង​ការបរទស​ជប៉ុន។​ ​

រដ្ឋមន្ត្រី​ការបរទេស​ជប៉ុន​លោក ​Hayashi Yoshimasa ​ថ្លែង​ក្នុង​កិច្ចប្រជុំមួយ​ ដែល​ផ្តោត​ទៅ​លើ​សង្គ្រាម​របស់​រុស្ស៊ីក្នុងអ៊ុយក្រែន​នោះ​ថា​ វា​មាន​សារៈសំខាន់​ណាស់​ ដែល​យើង​ត្រូវ​រក្សា​ការ​ឯកភាព​គ្នា​ ក្នុង​ការ​ជំរុញ​អនុវត្ត​ការ​ដាក់ទណ្ឌកម្ម​ប្រឆាំង​នឹង​រុស្ស៊ី។ ​

ក្រោយ​ប្រធានាធិបតី​រុស្ស៊ី​លោក​ Vladimir Putin​ បាន​ប្រកាស​កាល​ពី​ខែ​មុន​ថា​ រុស្ស៊ី​នឹង​ដាក់​ពង្រាយអាវុធ​នុយក្លេអ៊ែរ​កលយុទ្ធ​របស់​ខ្លួននៅ​លើ​ទឹក​ដី​ប្រទេស​បេឡារុស​នោះ​ ក្រុម​រដ្ឋមន្ត្រី​ប្រទេស G-7 នៅ​ថ្ងៃ​ចន្ទ​នេះ​ បាន​ថ្កោលទោសសកម្មភាព​របស់​រុស្ស៊ី​ និង​បាន​បញ្ជាក់ថា​ «វោហាសាស្ត្រ​ដែលគ្មាន​ការ​ទទួល​ខុសត្រូវ​របស់​រុស្ស៊ី​ស្តី​ពី​អាវុធ​នុយក្លេអ៊ែរ​នោះ​ មិន​អាច​ទទួល​យក​បាន​ឡើយ»។​ នេះ​បើតាម​សេចក្តី​ថ្លែងការណ៍​ដដែលរបស់​ក្រសួង​ការបរទេស​ជប៉ុន។​ ​

រុស្ស៊ីធ្លាប់​ជា​សមាជិក​របស់​ក្រុម​ប្រទេស G-8 ម្តង​កាល​ពី​លើក​មុន​ តែ​ត្រូវ​បាន​បណ្តេញ​ចេញពី​ក្រុម​ប្រទេស​ទាំង​នេះ​ ក្រោយ​ខ្លួន​បានច្បាម​យក​ឧបទ្វីប​គ្រីមៀ​របស់​អ៊ុយក្រែន​ ធ្វើ​ជា​ផ្នែក​មួយ​នៃទឹក​ដី​របស់​ខ្លួន​កាល​ពី​ឆ្នាំ​២០១៤។​ ​

ទន្ទឹម​នឹង​នេះ​ដែរ​ ក្រសួង​ការពារ​ជាតិ​ចក្រភព​អង់គ្លេស​ បាន​បញ្ជាក់​នៅ​ថ្ងៃ​ចន្ទ​នេះ​ផង​ដែរ​ថា​ ​មាន​ជនស៊ីវិល​អ៊ុយក្រែនកាន់​តែ​ច្រើន​ឡើង​ បាន​ស្លាប់​ដោយ​សារគ្រាប់មីន​នៅ​ក្នុងប្រទេស​នេះ។

ក្រសួង​នេះ​ថា​ បញ្ហា​នេះ​បាន​កើត​ឡើង​កាន់​តែ​អាក្រក់នៅ​ក្នុង​តំបន់​ ដែល​កងទ័ព​រុស្ស៊ី​ធ្លាប់កាន់កាប់​ក្នុង​ពេល​កន្លង​ទៅ​ ដែល​ក្នុង​នោះ​មានតំបន់​ Kherson និង​តំបន់ ​Kharkiv ផង​ដែរ​ ហើយហានិភ័យ​នៃ​គ្រោះថ្នាក់​នេះ​ កើតឡើង​កាន់​តែ​ច្រើន​ ខណៈ​ពេលដែលរដូវ​ផ្ការីក​កំពុង​ចូល​មក​ដល់​សម្រាប់​ការងារ​កសិកម្ម៕​

ព័ត៌មាន​ខ្លះ​ក្នុង​របាយការណ៍​នេះ​បាន​មក​ពី​ទីភ្នាក់ងារ​សារព័ត៌មាន​ AP, AFPនិង​ Reuters

XS
SM
MD
LG