លោកប្រធានាធិបតី Joe Biden បានសម្តែងកង្វល់កាលពីថ្ងៃព្រហស្បតិ៍អំពីការលេចឯកសារយោធាសម្ងាត់ នៅពេលមានសេចក្តីលម្អិតអំពីបុគ្គលិកយោធាម្នាក់ដែលបានបង្ហោះផ្សាយឯកសារទាំងនេះតាមបណ្តាញអ៊ីនធឺណិត។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ការលេចឯកសារទាំងនេះដែលក្រសួងការពារជាតិស.រ.អ.បានហៅថាជាការគ្រោះ ថ្នាក់ដ៏ធ្ងន់ធ្ងរមួយដល់សន្តិសុខជាតិបានលាតត្រដាងឱ្យដឹងថាស.រ.អ.ខ្វល់ខ្វាយអំពីការធ្វើឱ្យសម្រេចការវាយលុកតបតរបស់អ៊ុយក្រែនប្រឆាំងនឹងកងកម្លាំងរុស្ស៊ី ហើយបង្ហាញថាស.រ.អ.បានធ្វើចារកម្មលើពួកសម្ព័ន្ធមិត្តគឺប្រទេសអ៊ីស្រាអែលនិងប្រទេសកូរ៉េខាងត្បូង។
រូបភាពនៃឯកសារទាំងនេះត្រូវបានផ្សាយតាមបណ្តាញសង្គមច្រើនសប្តាហ៍មកហើយ ហើយនាំឱ្យមានការច្របូកច្របល់ចាប់តាំងពីឯកសារទាំងនេះត្រូវបានបោះពុម្ពផ្សាយដោយបណ្តាញព័ត៌មានកាលពីប៉ុន្មានថ្ងៃថ្មីៗនេះ។
សមាជិកពីរនាក់នៃក្រុមបណ្តាញព័ត៌មានសង្គម Discord បាននិយាយប្រាប់កាសែត Washington Post ថាឯកសារនេះរាប់រយទំព័រត្រូវបានបង្ហោះនៅទីនោះ ដោយបុរសម្នាក់ដែលបាននិយាយប្រាប់ពួកគេថាខ្លួនធ្វើការនៅឯមូលដ្ឋានយោធាស.រ.អ.មួយហើយបាននាំយកឯកសារនេះមកផ្ទះខ្លួន។
ពួកសមាជិកក្រុមនេះបាននិយាយប្រាប់សារព័ត៌មាននេះដោយមានលក្ខខណ្ឌមិនឱ្យគេបញ្ចេញឈ្មោះថាបុរសនោះដែលប្រើឈ្មោះហៅក្រៅថា«OG»បានផ្សាយឯកសារតាមរយៈក្រុមនេះច្រើនខែមកហើយ។
កាសែត Washington Post បានរាយការណ៍ថាព័ត៌មានខ្លះនៅក្នុងឯកសារទាំងនេះមានសរសេរថា «NOFORM» មានន័យថាឯកសារនេះមិនត្រូវចែកចាយឱ្យជនបរទេសបានដឹងទេ។
កាសែត Washington Post បានរាយការណ៍ថាក្រុមនេះមានគ្នីគ្នាប្រមាណ២៤នាក់ មានរួមមនុស្សមកពីប្រទេសរុស្ស៊ីនិងប្រទេសអ៊ុយក្រែនផងដែលមាន«ទឹកចិត្តដូចគ្នាក្នុងការស្រឡាញ់កាំភ្លើង សម្ភារៈយោធានិងព្រះអាទិទេព»ហើយបានបង្កើត«ផ្ទះក្លិបមួយតាមសេចក្តីអញ្ជើញកាលពីឆ្នាំ២០២០តាមបណ្តាញ Discord»៕
វ៉ាស៊ីនតោន —
