ជិតមួយខែបន្ទាប់ពីផុតកំណត់កិច្ចព្រមព្រៀងស្តីពីវិធីបែងចែកការចំណាយសម្រាប់វត្តមានយោធាអាមេរិកនៅកូរ៉េខាងត្បូង ប្រជាជនស៊ីវិលកូរ៉េខាងត្បូងដែលធ្វើការនៅមូលដ្ឋានយោធាអាមេរិកមានការអាក់អន់ចិត្តកាន់តែខ្លាំង។
ពួកគេនឹងមិនបានប្រាក់ខែទេ ក្នុងពេលឆាប់ៗនេះ ប្រសិនបើមិនមានកិច្ចព្រមព្រៀងថ្មី។ មានការព្រួយបារម្ភថា ជម្លោះនេះកំពុងធ្វើឱ្យប៉ះពាល់សម្ព័ន្ធភាពរវាងអាមេរិកនិងកូរ៉េខាងត្បូង។
មូលដ្ឋាន Camp Humphreys នៅខាងត្បូងទីក្រុងសេអ៊ូលគឺជាមូលដ្ឋានយោធាអាមេរិកធំជាងគេនៅបរទេស។ មូលដ្ឋាននេះគឺដូចជាទីក្រុងតូចមួយអ៊ីចឹងដែរ។
ទោះយ៉ាងណា ប្រតិបត្ដិការជាច្រើននៅទីនោះអាចនឹងអាក់ខានក្នុងពេលឆាប់ៗនេះដោយសារជម្លោះអំពីវិធីបែងចែកចំណាយសម្រាប់វត្តមានយោធាអាមេរិក។
កងទ័ពអាមេរិកបានជូនដំណឹងដល់បុគ្គលិកជនជាតិកូរ៉េថា ពួកគេអាចនឹងត្រូវឈប់សម្រាកដោយគ្មានប្រាក់ខែចាប់ពីថ្ងៃទី១ខែមេសា។ បញ្ហានេះអាចប៉ះពាល់បុគ្គលិកស៊ីវិលកូរ៉េជាង៩ពាន់នាក់នៅមូលដ្ឋានយោធាអាមេរិកនេះ។ គម្រោងសាងសង់ និងសេវាកម្មផ្សេងទៀតអាចនឹងត្រូវបានផ្អាក។ បុគ្គលិកកូរ៉េជាច្រើននិយាយថា ពួកគេកំពុងស្វែងរកការងារផ្សេងទៀត។ ការទាមទារការបែងចែកថ្លៃចំណាយនេះសម្រេចដោយប្រធានាធិបតីអាមេរិកលោក ដូណាល់ ត្រាំ ដែលចោទប្រកាន់កូរ៉េខាងត្បូងជាយូរមកហើយថា មិនបានចំណាយប្រាក់គ្រប់គ្រាន់សម្រាប់ការការពាររបស់សហរដ្ឋអាមេរិក៕
